ಬಿಎಚ್​​ ನೋಂದಣಿ ನಿಯಮ ಬದಲಾವಣೆ - ಎಲ್ಲಾ ವಾಹನಗಳಿಗೂ ಅವಕಾಶ

•   Sat, Dec 17 2022 09:26:12 AM



• ನವದೆಹಲಿ, ಡಿ 17 ( DaijiworldNews/MS): ಎಲ್ಲಾ ವಾಹನಗಳಿಗೂ ಭಾರತ್ ಸರಣಿಯ ನೋಂದಣಿ (ಬಿಹೆಚ್) ವ್ಯವಸ್ಥೆಯನ್ನು ಮತ್ತಷ್ಟು ವಿಸ್ತರಿಸುವ ನಿಟ್ಟಿನಲ್ಲಿ ಕ್ರಮ ಕೈಗೊಂಡಿರುವ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ನಿಯಮಗಳಲ್ಲಿ ಬದಲಾವಣೆ ಮಾಡಿದೆ.

  ಬಿಎಚ್​​ ನೋಂದಣಿ ಮಾಡಲು ಈ ಹಿಂದೆ ಹೊಸದಾಗಿ ಖರೀದಿಸುವ ವಾಹನಗಳಿಗೆ ಮಾತ್ರ ಅವಕಾಶವಿತ್ತು. ಬಿಎಚ್ ನೋಂದಣಿ ನಿಯಮವನ್ನು ಇನ್ನಷ್ಟು ಬಲಪಡಿಸುವ ನಿಟ್ಟಿನಲ್ಲಿ ಹಲವಾರು ಸಲಹೆಗಳನ್ನು ಸ್ವೀಕರಿಸಲಾಗಿತ್ತು. ಅದರಂತೆ, ಇದೀಗ ನಿಯಮದಲ್ಲಿ ಬದಲಾವಣೆ ಮಾಡಲಾಗಿದೆ ಎಂದು ಸಚಿವಾಲಯದ ಪ್ರಕಟಣೆ ತಿಳಿಸಿದೆ.

  ಇದಕ್ಕಾಗಿ ಬಿಎಚ್‌ ಸರಣಿಯ ನೋಂದಣಿಗೆ ಅರ್ಜಿ ಸಲ್ಲಿಸುವ ಪ್ರಕ್ರಿಯೆಯನ್ನು ಸರಳಗೊಳಿಸುವ ನಿಟ್ಟಿನಲ್ಲಿ ನಿಯಮ 48ಕ್ಕೆ ತಿದ್ದುಪಡಿ ತರಲು ಸಚಿವಾಲಯ ಪ್ರಸ್ತಾಪಿಸಿದೆ.ವಾಹನದ ಮಾಲೀಕತ್ವವನ್ನು ಇತರರಿಗೆ ವರ್ಗಾವಣೆ ಮಾಡುವ ವೇಳೆ ಬಿಎಚ್‌ ಸರಣಿಯಡಿ ನೋಂದಣಿಗೆ ಅವಕಾಶ ಕಲ್ಪಿಸಲಾಗಿದೆ ಎಂದು ಸಚಿವಾಲಯ ಹೇಳಿದೆ.

  ಬಿಎಚ್​ ಸರಣಿ ನಂಬರ್​ ಹೇಗಿರುತ್ತದೆ? ಭಾರತ್ ಸರಣಿ ನೋಂದಣಿಯಲ್ಲಿ ನಂಬರ್ ಪ್ಲೇಟ್​ನಲ್ಲಿ YY BH #### XX YY ಮಾದರಿಯಲ್ಲಿ ಸಂಖ್ಯೆ ಇರುತ್ತದೆ. ಇಲ್ಲಿ YY ಅಂದರೆ ಮೊದಲ ನೋಂದಣಿಯ ವರ್ಷ. ಬಿಎಚ್​ ಎಂದರೆ ಭಾರತ್​ ಸರಣಿಯ ಕೋಡ್​. #### ಎಂದರೆ 0000 ದಿಂದ 9999ರವರೆಗಿನ ಯಾವುದೇ ನಂಬರ್​ ಮತ್ತು XX-AA ದಿಂದ ZZ ವರೆಗಿನ ಅಕ್ಷರಗಳು.