ಜಮ್ಮು , ಡಿ 16 (DaijiworldNews/HR): ನಿರ್ಮಾಣ ಹಂತದಲ್ಲಿದ್ದ 111 ಕಿ.ಮೀ . ದೂರದ ಬನಿಹಾಲ್ -ಕಟ್ರಾ ರೈಲ್ವೇ ಮಾರ್ಗದಲ್ಲಿ 12.89 ಕಿ.ಮೀ. ಉದ್ದದ ಸುರಂಗ ಮಾರ್ಗ ನಿರ್ಮಾಣವನ್ನು ಗುರುವಾರ ಯಶಸ್ವಿಯಾಗಿ ಪೂರ್ಣಗೊಳಿಸಲಾಯಿತು.
ಭಾರತದ ಅತಿ ಉದ್ದದ ರೈಲ್ವೇ ಸುರಂಗ ಎಂಬ ಖ್ಯಾತಿಗೆ ಇದು ಪಾತ್ರವಾಗಿದ್ದು, ಇದು ತುರ್ತು ಸಂದರ್ಭಗಳಲ್ಲಿ ಬಳಸಲ್ಪಡುತ್ತದೆ. ಉದಮ್ ಪುರ-ಶ್ರೀನಗರ -ಬಾರಾಮುಲ್ಲಾ ರೈಲ್ವೆ ಯೋಜನೆಯ ಭಾಗವಾಗಿರುವ ಮಾರ್ಗದಲ್ಲಿ ಈಗಾಗಲೇ ನಿರ್ಮಾಣ ಮಾಡಿರುವ 12.75 ಕಿ .ಮೀ. ಉದ್ದದ ಟಿ-49 ಸುರಂಗಕ್ಕೆ ಸಮಾನಾಂತರವಾಗಿ ಈ ರಕ್ಷಣಾ ಸುರಂಗ ಮಾರ್ಗವನ್ನು ನಿರ್ಮಾಣ ಮಾಡಲಾಗಿದೆ.
ಇನ್ನು ಇದು ಮುಖ್ಯ ಸುರಂಗ ಮಾರ್ಗಕ್ಕಿಂತಲೂ 140 ಮೀ. ಉದ್ದವಾಗಿದ್ದು, ಈ 2 ಮಾರ್ಗಗಳ ನಡುವೆ 33 ಕಡೆ ದಾಟುವಂತಹ ಮಾರ್ಗಗಳನ್ನು ನಿರ್ಮಾಣ ಮಾಡಲಾಗಿದೆ.
12.89 ಕಿ.ಮೀ. ಉದ್ದದ ಸುರಂಗ ಮಾರ್ಗವನ್ನು ವಿಶೇಷ ತಂತ್ರಜ್ಞಾನವನ್ನು ಬಳಕೆ ಮಾಡಿ ಕುದುರೆ ಲಾಳಾಕಾರದಲ್ಲಿ ನಿರ್ಮಾಣ ಮಾಡಲಾಗಿದೆ ಎಂದು ವರದಿಯಾಗಿದೆ.