ನವದೆಹಲಿ, ಡಿ 15 (DaijiworldNews/DB): ದೇಶದಲ್ಲಿ 10-17 ವರ್ಷದೊಳಗಿನ 1.58 ಕೋಟಿ ಮಕ್ಕಳು ಮಾದಕ ದ್ರವ್ಯ ವ್ಯಸನಿಗಳಾಗಿದ್ದಾರೆ ಎಂಬ ಆಘಾತಕಾರಿ ಮಾಹಿತಿಯನ್ನು ಕೇಂದ್ರ ಸರ್ಕಾರ ಸುಪ್ರೀಂ ಕೋರ್ಟ್ ಗೆ ನೀಡಿದೆ.
ಸುಪ್ರೀಂ ಕೋರ್ಟ್ ಆದೇಶಾನುಸಾರ ನಡೆಸಿದ ಸಮೀಕ್ಷೆಯಡಿ ಈ ವಿಚಾರ ಬಯಲಾಗಿದ್ದು, ಆಲ್ಕೋಹಾಲ್ ನಂತರ ಅತೀ ಹೆಚ್ಚು ಬಳಕೆಯಾಗುತ್ತಿರುವುದು ಗಾಂಜಾ ಮತ್ತು ಒಪಿಯಾಡ್ಸ್ ಆಗಿದೆ. ದೇಶದಲ್ಲಿ 16 ಕೋಟಿ ಮಂದಿ ಆಲ್ಕೋಹಾಲ್ ಚಟ ಅಂಟಿಸಿಕೊಂಡಿದ್ದಾರೆ. 3.1 ಕೋಟಿ ಮಂದಿ ಗಾಂಜಾ ಉತ್ಪನ್ನಗಳನ್ನು ಬಳಸಿದರೆ, ಈ ಪೈಕಿ 1.58 ಕೋಟಿ ಮಕ್ಕಳು ಸೇರಿದ್ದಾರೆ ಎಂದು ಕೇಂದ್ರ ಕಳವಳ ವ್ಯಕ್ತಪಡಿಸಿದೆ.
5.7 ಕೋಟಿಗೂ ಹೆಚ್ಚು ಮಂದಿ ಹಾನಿಕಾರಕ ಅಥವಾ ಅವಲಂಬಿತ ಆಲ್ಕೋಹಾಲ್ ಸೇವನೆಗೆ ಒಳಗಾಗಿದ್ದಾರೆ.25 ಲಕ್ಷದಷ್ಟು ಜನ ಗಾಂಜಾವನ್ನು ಅವಲಂಬಿಸಿಕೊಂಡು ಅದರಿಂದ ಹೊರಬರಲಾಗದೆ ಚಡಪಡಿಸುತ್ತಿದ್ದಾರೆ. 2.26 ಕೋಟಿ ಜನ ಒಪಿಯಾಡ್ ಬಳಸುತ್ತಿದ್ದರೆ ಅದರ ಗಂಭೀರ ಚಟಕ್ಕೆ77 ಲಕ್ಷಜನ ನರಳುತ್ತಿದ್ದಾರೆ ಎಂದು ಸರ್ಕಾರ ತಿಳಿಸಿದೆ.
ಇನ್ನು ಹೆಚ್ಚುವರಿ ಸಾಲಿಸಿಟರ್ ಜನರಲ್ ಐಶ್ವರ್ಯಾ ಭಾಟಿ ಸರ್ಕಾರದ ಪರ ವಾದ ಮಂಡಿಸಿದರು. ನ್ಯಾಯಮೂರ್ತಿಗಳಾದ ಕೆ.ಎಂ. ಜೋಸೆಫ್, ಬಿ.ವಿ. ನಾಗರತ್ನ ಅವರ ಪೀಠದೆದುರು ಸಮೀಕ್ಷೆ ಬಗ್ಗೆ ಮಾಹಿತಿ ನೀಡಲಾಯಿತು.