ಜನಜಂಗುಳಿಯಿರುವ ಮಾರುಕಟ್ಟೆಯಲ್ಲಿ ಹಾಡುಹಗಲೇ ಮಹಿಳೆಯ ಅಂಗಾಂಗ ಕತ್ತರಿಸಿ ಹತ್ಯೆ

•   Wed, Dec 07 2022 09:54:41 AM



• ಪಾಟ್ನಾ, ಡಿ 07 (DaijiworldNews/DB): ಜನನಿಬಿಡ ಮಾರುಕಟ್ಟೆಯೊಂದರಲ್ಲಿ ಹಾಡುಹಗಲೇ ಮಹಿಳೆ ಮೇಲೆ ಮಾರಕಾಸ್ತ್ರಗಳಿಂದ ಧಾಳಿ ನಡೆಸಿ ಅಂಗಾಂಗ ಕತ್ತರಿಸಿ ಹತ್ಯೆಗೈದ ಘಟನೆ ಬಿಹಾರದ ಭಾಗಲ್ಪುರದದಲ್ಲಿ ನಡೆದಿದೆ.

  ನೀಲಂ ಹತ್ಯೆಗೀಡಾದ ಮಹಿಳೆ. ಶಕೀಲ್ ಮಿಯಾನ್ ಎಂಬ ಲೇವಾದೇವಿದಾರನ ಕೈಯಿಂದ ಈಕೆ ಮಗಳ ಮದುವೆಗಾಗಿ ಸಾಲ ಪಡೆದಿದ್ದಳು. ಮರುಪಾವತಿಗೆ ವಿಫಲಳಾದ ಕಾರಣ ಶಕೀಲ್ ಮತ್ತು ಜುದ್ದೀನ್ ಮಿಯಾನ್ ಆಕೆಯ ಮೇಲೆ ಮಾರಕಾಸ್ತ್ರಗಳಿಂದ ದಾಳಿ ನಡೆಸಿದ್ದರು. ತಲೆ ಮತ್ತು ಬೆನ್ನಿಗೆ ತೀವ್ರವಾಗಿ ಇರಿದಿದ್ದಾರೆ. ಆ ಬಳಿಕ ಕೈ, ಕಿವಿಗಳನ್ನು ಕತ್ತರಿಸಿ ಭಯಾನಕವಾಗಿ ಆಕೆಯನ್ನು ಹತ್ಯೆ ಮಾಡಿದ್ದಾರೆ. ಜನಜಂಗುಳಿಯಿದ್ದ ಮಾರುಕಟ್ಟೆಯಲ್ಲಿ ಹಾಡುಹಗಲೇ ಈ ಪೈಶಾಚಿಕ ಕೃತ್ಯ ನಡೆದಿದೆ. ಶನಿವಾರ ಘಟನೆ ನಡೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

  ಮಹಿಳೆ ರಕ್ತದ ಮಡುವಿನಲ್ಲಿ ಬಿದ್ದಿದ್ದರೂ ಯಾರೂ ಆಕೆಯ ನೆರವಿಗೆ ಬಂದಿರಲಿಲ್ಲ. ಆಕೆ ಪ್ರಜ್ಞೆ ಕಳೆದುಕೊಳ್ಳುವ ಮುನ್ನ ಆರೋಪಿಗಳ ಹೆಸರು ಹೇಳಿದ್ದನ್ನು ಪ್ರತ್ಯಕ್ಷದರ್ಶಿಗಳು ಮೊಬೈಲ್ ಫೋನ್‌ನಲ್ಲಿ ದಾಖಲು ಮಾಡಿಕೊಂಡಿದ್ದರು. ಆಕೆಯನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿ ಬಳಿಕ ಜವಾಹರಲಾಲ್ ನೆಹರೂ ವೈದ್ಯಕೀಯ ಕಾಲೇಜು ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಆಕೆ ಚಿಕಿತ್ಸೆಗೆ ಸ್ಪಂದಿಸದೆ ಮೃತಪಟ್ಟಿದ್ದಾಳೆ. ಆರೋಪಿಗಳನ್ನು ಬಂಧಿಸಲಾಗಿದೆ ಎಂದು ಸುದ್ದಿಸಂಸ್ಥೆಯೊಂದು ವರದಿ ಮಾಡಿದೆ.