ಕೇರಳದ ಚಿತ್ರಮಂದಿರಗಳಲ್ಲಿ ಅಳುವ ಮಕ್ಕಳಿಗೆಂದೇ ಇನ್ಮುಂದೆ ಕ್ರೈ ರೂಂ

•   Tue, Dec 06 2022 06:37:13 PM



• ತಿರುವನಂತಪುರಂ, ಡಿ 06 (DaijiworldNews/DB): ಮಕ್ಕಳಿರುವ ಪೋಷಕರು ಮತ್ತು ಇತರ ವೀಕ್ಷಕರಿಗೆ ಚಲನಚಿತ್ರ ವೀಕ್ಷಣೆಗೆ ತೊಂದರೆಯಾಗದಂತೆ ಕೇರಳದ ಸರ್ಕಾರಿ ಸ್ವಾಮ್ಯದ ಚಲನಚಿತ್ರ ಮಂದಿರಗಳಲ್ಲಿ ಧ್ವನಿ ನಿರೋಧಕ ಅಳುವ ಕೋಣೆಯನ್ನು ಪರಿಚಯಿಸಲಾಗುತ್ತಿದೆ.

  ತಿರುವನಂತಪುರಂನಲ್ಲಿರುವ ಕೈರಲಿ-ಶ್ರೀ-ನಿಲಾ ಥಿಯೇಟರ್ ಸಂಕೀರ್ಣದಲ್ಲಿ ಸ್ಥಾಪಿಸಲಾದ ಧ್ವನಿ ನಿರೋಧಕ ಅಳುವ ಕೋಣೆಗಳನ್ನು ಕೇರಳದ ಸಾಂಸ್ಕೃತಿಕ ವ್ಯವಹಾರಗಳ ಸಚಿವ ವಿಎನ್ ವಾಸವನ್ ಅವರು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು, ರಾಜ್ಯ ಸರ್ಕಾರದ ಕೇರಳ ರಾಜ್ಯ ಚಲನಚಿತ್ರ ಅಭಿವೃದ್ಧಿ ನಿಗಮದ ಮುಖಾಂತರ ಇತರ ಚಿತ್ರಮಂದಿರಗಳಲ್ಲಿಯೂ ಕ್ರೈ ರೂಮ್ ಸ್ಥಾಪಿಸುವ ಪ್ರಕ್ರಿಯೆ ನಡೆಯುತ್ತಿದೆ ಎಂದಿದ್ದಾರೆ.

  ಈ ಕ್ರೈ ರೂಂಗಳು ಧ್ವನಿ ನಿರೋಧಕ ವ್ಯವಸ್ಥೆಯನ್ನು ಹೊಂದಿದ್ದು, ಪುಟ್ಟ ಮಕ್ಕಳಿರುವ ಪೋಷಕರು ಇದರಲ್ಲಿ ಕುಳಿತುಕೊಳ್ಳುತ್ತಾರೆ. ಇದರಿಂದ ಮಕ್ಕಳು ಅತ್ತಾಗ ಇತರ ವೀಕ್ಷಕರಿಗೆ ಚಿತ್ರ ವೀಕ್ಷಣೆಗೆ ತೊಂದರೆಯಾಗುವುದಿಲ್ಲ. ಮಕ್ಕಳನ್ನು ಕರೆದೊಯ್ದು ಪೋಷಕರು ಚಿತ್ರ ವೀಕ್ಷಿಸಲು ಇದರಿಂದ ಸುಲಭವಾಗಲಿದೆ. ಮಹಿಳಾ ಮತ್ತು ಮಕ್ಕಳ ಸ್ನೇಹಿ ಚಿತ್ರಮಂದಿರ ಇದಾಗಲಿದೆ ಎಂದು ಅವರು ವಿವರಿಸಿದ್ದಾರೆ.