ಭೋಪಾಲ್, ಡಿ 06 (DaijiworldNews/DB): ರೋಗಿಗಳಿಗೆ ಮಲಗಲು ನೀಡುವ ಹಾಸಿಗೆ ಮೇಲೆ ನಾಯಿಗಳು ಮಲಗಿರುವ ಪ್ರಸಂಗ ಜಬಲ್ಪುರದ ಆರೋಗ್ಯ ಕೇಂದ್ರದಲ್ಲಿ ನಡೆದಿದ್ದು, ಇದರ ಫೋಟೋ/ವೀಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಶಹಪುರ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ರೋಗಿಗಳಿಗೆ ಮಲಗಲು ಇರುವ ಹಾಸಿಗೆಗಳ ಮೇಲೆ ಬೀದಿನಾಯಿಗಳೆರಡು ಮಲಗಿಕೊಂಡಿವೆ. ಶಹಪುರ (ಜಬಲ್ಪುರ) ನಿವಾಸಿ ಸಿದ್ಧಾರ್ಥ್ ಜೈನ್ ಎಂಬವರು ತನ್ನ ಗರ್ಭಿಣಿ ಪತ್ನಿಯನ್ನು ತಪಾಸಣೆಗೆಂದು ಈ ಆರೋಗ್ಯ ಕೇಂದ್ರಕ್ಕೆ ಕರೆದೊಯ್ದಿದ್ದಾಗ ಆಸ್ಪತ್ರೆಯ ಹಾಸಿಗೆ ಮೇಲೆ ನಾಯಿಗಳು ಮಲಗಿರುವುದನ್ನು ನೋಡಿ ವೀಡಿಯೋ ಚಿತ್ರೀಕರಣ ಮಾಡಿದ್ದಾರೆ.
ಇನ್ನು ಈ ಆಸ್ಪತ್ರೆಯಲ್ಲಿ ಕೇವಲ ಓರ್ವ ನರ್ಸ್ ಮಾತ್ರ ಇದ್ದು, ಇತರ ವೈದ್ಯರಾಗಲೀ, ಅರೆ ವೈದ್ಯಕೀಯ ಅಥವಾ ಭದ್ರತಾ ಸಿಬಂದಿಯಾಗಲೀ ಕರ್ತವ್ಯದಲ್ಲಿರಲಿಲ್ಲ. ಇದೀಗ ಹಾಸಿಗೆಗಳ ಮೇಲೆ ನಾಯಿಗಳು ಮಲಗಿರುವ ವೀಡಿಯೋ ವೈರಲ್ ಆಗುತ್ತಿದ್ದಂತೆ ಜಿಲ್ಲಾಡಳಿತ ಎಚ್ಚೆತ್ತುಕೊಂಡಿದ್ದು, ಬ್ಲಾಕ್ ಮೆಡಿಕಲ್ ಆಫೀಸರ್ ಡಾ. ಸಿಕೆ ಅಟ್ರೌಲಿಯಾ ಅವರಿಗೆ ನೋಟಿಸ್ ನೀಡಿದೆ. ಮುಂದಿನ 24 ಗಂಟೆಗಳೊಳಗೆ ಉತ್ತರಿಸಲು ಸೂಚಿಸಲಾಗಿದ್ದು, ಅವರ ಉತ್ತರದ ಆಧಾರದ ಮೇಲೆ ಕ್ರಮ ಕೈಗೊಳ್ಳುವುದಾಗಿ ಜಿಲ್ಲಾಡಳಿತ ತಿಳಿಸಿದೆ.