ಗೋವಾದಲ್ಲಿ ರಷ್ಯಾ ಮಹಿಳೆ ಮೇಲೆ ಇಬ್ಬರು ನೇಪಾಳಿಗರಿಂದ ಅತ್ಯಾಚಾರ-ಬಂಧನ

•   Sun, Dec 04 2022 03:52:54 PM



• ಪಣಜಿ, ಡಿ 04 (DaijiworldNews/DB): ರಷ್ಯಾದ ಮಹಿಳೆ ಮೇಲೆ ಹೊಟೇಲ್ ಸಿಬಂದಿ ಅತ್ಯಾಚಾರ ಎಸಗಿದ ಘಟನೆ ಉತ್ತರ ಗೋವಾದಲ್ಲಿ ನಡೆದಿದೆ. ಆರೋಪಿಗಳಿಬ್ಬರನ್ನು ಪೊಲೀಸರು ಬಂಧಿಸಿದ್ದಾರೆ.

  ಸಖಿಲ್ ಅನ್ಸಾರಿ (23) ಮತ್ತು ಸಾಯುಂಧೀನ್ ಅನ್ಸಾರಿ (23) ಬಂಧಿತ ಆರೋಪಿಗಳು. 37 ವರ್ಷದ ರಷ್ಯಾ ಮೂಲದ ಮಹಿಳೆ ಅತ್ಯಾಚಾರಕ್ಕೊಳಗಾದವರು. ರೂಮ್ ಬಾಯ್‌ಗಳಾಗಿದ್ದ ಇಬ್ಬರು ನೇಪಾಳಿ ಪ್ರಜೆಗಳು ಕೊಠಡಿ ಶುಚಿತ್ವದ ನೆಪದಲ್ಲಿ ಮಹಿಳೆಯಿದ್ದ ಕೊಠಡಿಗೆ ನುಗ್ಗಿ ಮಹಿಳೆ ಮೇಲೆ ಅತ್ಯಾಚಾರ ಎಸಗಿದ್ದಾರೆ ಎಂದು ಎಂದು ಉತ್ತರ ಗೋವಾದ ಪೊಲೀಸ್ ವರಿಷ್ಠಾಧಿಕಾರಿ(ಎಸ್‌ಪಿ) ನಿಧಿನ್ ವಲ್ಸನ್ ತಿಳಿಸಿದ್ದಾರೆ.

  ಗುರುವಾರ ಮಹಿಳೆ ಗೋವಾಕ್ಕೆ ಪ್ರವಾಸಕ್ಕೆಂದು ಬಂದಿದ್ದು, ಇತರ ಇಬ್ಬರೊಂದಿಗೆ ಹೊಟೇಲ್‌ನಲ್ಲಿ ತಂಗಿದ್ದರು. ಅಂದು ಪ್ರವಾಸಿ ಸ್ಥಳಗಳಿಗೆ ಭೇಟಿ ನೀಡಿ ಮತ್ತೆ ತಮ್ಮ ಹೊಟೇಲ್ ಕೊಠಡಿಗೆ ಆಗಮಿಸಿದ್ದರು. ಅಲ್ಲಿ ಆಕೆ ಮದ್ಯ ಸೇವನೆ ಮಾಡಿ ಮಲಗಿದ್ದಳು. ಈ ವೇಳೆ ಆಕೆಯೊಂದಿಗೆ ಇದ್ದ ಇತರ ಇಬ್ಬರು ಹೊರಗಡೆ ಹೋಗಿದ್ದು, ಅದೇ ಸಮಯ ಅಲ್ಲಿಗೆ ಆಗಮಿಸಿದ ನೇಪಾಳಿ ಪ್ರಜೆಗಳಿಬ್ಬರು ಆಕೆಯ ಕೋಣೆಯೊಳಗೆ ನುಗ್ಗಿ ಅತ್ಯಾಚಾರ ಎಸಗಿದ್ದಾರೆ. ಮೊದಲ ವ್ಯಕ್ತಿ ಲೈಂಗಿಕ ದೌರ್ಜನ್ಯ ಎಸಗಿರುವುದು ಆಕೆಗೆ ತಿಳಿದಿರಲಿಲ್ಲ. ಆದರೆ ತುಸು ಹೊತ್ತಿನ ಬಳಿಕ ಇನ್ನೊಬ್ಬ ರೂಮ್ ಬಾಯ್ ಆಕೆಯ ಕೋಣೆ ಪ್ರವೇಶಿಸಿ ಅತ್ಯಾಚಾರ ಎಸಗಲು ಮುಂದಾದಾಗ ಎಚ್ಚರಗೊಂಡು ಆಕೆ ಕೂಗಾಡಿದ್ದಾಳೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಆರೋಪಿಗಳನ್ನು ಬಂಧಿಸಿದ್ದು, ತನಿಖೆ ನಡೆಸುತ್ತಿದ್ದಾರೆ.