ಮುಂಬೈ, ಡಿ 04 (DaijiworldNews/DB): ಎಂಜಿನಿಯರ್ ಆಗಿರುವ ಅವಳಿ ಸಹೋದರಿಯರು ಪರಸ್ಪರ ಬಿಟ್ಟಿರಲಾರದೆ ಒಂದೇ ವ್ಯಕ್ತಿಯನ್ನು ಮದುವೆಯಾಗಿ ಸುದ್ದಿಯಾಗಿದ್ದಾರೆ. ಸದ್ಯ ಇವರ ಮದುವೆಯ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಮಹಾರಾಷ್ಟ್ರದ ಸೊಲ್ಲಾಪುರ ಜಿಲ್ಲೆಯ ಮಲ್ಶಿರಸ್ ತಾಲೂಕಿನ ಅಕ್ಲುಜ್ ಎಂಬ ಗ್ರಾಮದಲ್ಲಿ ಈ ವಿವಾಹ ನಡೆದಿದ್ದು, ಅವಳಿ ಸಹೋದರಿಯರ ನಿರ್ಧಾರಕ್ಕೆ ಕುಟುಂಬವೂ ಸಮ್ಮತಿಸಿದ್ದರಿಂದ ಶುಕ್ರವಾರ ಶಾಸ್ತ್ರೋಕ್ತವಾಗಿ ವಿವಾಹ ಕಾರ್ಯ ನಡೆದಿದೆ.
ಮುಂಬೈನಲ್ಲಿ ಎಂಜಿನಿಯರ್ಗಳಾಗಿರುವ ಪಿಂಕಿ ಮತ್ತು ರಿಂಕಿ ಅವಳಿ ಸಹೋದರಿಯರು. ಎಳವೆಯಿಂದಲೇ ಒಟ್ಟಿಗೆ ಬೆಳೆದಿದ್ದರಿಂದ ಬಿಟ್ಟಿರಲಾಗದಷ್ಟು ಬಾಂಧವ್ಯ. ಆದರೆ ವಿವಾಹವಾದ ಮೇಲೆ ಇಬ್ಬರೂ ಬೇರೆ ಬೇರೆ ಇರಬೇಕೆಂಬ ನೋವು ಇಬ್ಬರದಾಗಿತ್ತು. ಕೊನೆಗೆ ಇಬ್ಬರೂ ಒಬ್ಬನೇ ವರನನ್ನು ವರಿಸುವ ನಿರ್ಧಾರಕ್ಕೆ ಬಂದಿದ್ದು, ಕುಟುಂಬದೊಂದಿಗೆ ಮಾತನಾಡಿದಾಗ ಅವರ ನಿರ್ಧಾರಕ್ಕೆ ಗ್ರೀನ್ ಸಿಗ್ನಲ್ ಸಿಕ್ಕಿದೆ. ಹೀಗಾಗಿ ಕುಟುಂಬಕ್ಕೆ ತೀರಾ ಆತ್ಮೀಯವಾಗಿದ್ದ ಅತುಲ್ ಎಂಬಾತನೂ ಸಹೋದರಿಯರಿಬ್ಬರನ್ನು ಮದುವೆಯಾಗುವ ಆಕಾಂಕ್ಷೆ ವ್ಯಕ್ತಪಡಿಸಿದ್ದರಿಂದ ಆತನೊಂದಿಗೆ ಪಿಂಕಿ ಮತ್ತು ರಿಂಕಿಯ ಮದುವೆ ನಡೆದು ಹೋಗಿದೆ.
ಅವಳಿ ಸಹೋದರಿಯರ ತಂದೆ ಇತ್ತೀಚೆಗೆ ನಿಧನರಾಗಿದ್ದು, ತಾಯಿಗೆ ಅನಾರೋಗ್ಯ ಕಾಡಿದ್ದಾಗ ಅತುಲ್ನೇ ಅವರನ್ನು ಆಸ್ಪತ್ರೆಗೆ ಒಯ್ದಿದ್ದರು. ಆ ಬಳಿಕ ಅತುಲ್ ಸಹೋದರಿಯಿಬ್ಬರೊಂದಿಗೆ ಹೆಚ್ಚು ಸಲುಗೆಯಿಂದಿದ್ದು, ಆ ಸಲುಗೆ ಮದುವೆಯಾಗುವಂತೆ ಪ್ರೇರೇಪಿಸಿದೆ. ಇದೀಗ ಮೂವರೂ ಹಸೆಮಣೆ ಏರಿದ್ದಾರೆ.