ಷೇರು ಮಾರುಕಟ್ಟೆ ಮಾದರಿಯಲ್ಲಿ ಮದುವೆ ಆಹ್ವಾನ ಪತ್ರಿಕೆ!

•   Sun, Dec 04 2022 11:28:42 AM



• ಮಹಾರಾಷ್ಟ್ರ, ಡಿ 04 (DaijiworldNews/DB): ಸಾಮಾನ್ಯವಾಗಿ ಮದುವೆ ಆಮಂತ್ರಣ ಪತ್ರಿಕೆಯನ್ನು ಕ್ರಿಯಾಶೀಲವಾಗಿ ವಿನ್ಯಾಸಗೊಳಿಸುವುದು ಈಗಿನ ಟ್ರೆಂಡ್. ಆದರೆ ಮಹಾರಾಷ್ಟ್ರದ ಜೋಡಿಯೊಂದು ಷೇರು ಮಾರುಕಟ್ಟೆ ಥೀಮ್‌ನಲ್ಲಿ ತಮ್ಮ ಮದುವೆ ಕಾರ್ಡ್ ತಯಾರಿಸಿ ಸುದ್ದಿಯಾಗಿದೆ.

  ವರ ಮತ್ತು ವಧುವಿನ ಹೆಸರು ಸಂದೇಶ್ ಹಾಗೂ ದಿವ್ಯಾ ಆಗಿದ್ದು, ಮದುವೆ ಆಮಂತ್ರಣ ಪತ್ರದಲ್ಲಿ ಡಾ. ಸಂದೇಶ್‌ ಮೆಡಿಸಿನ್‌ ಲಿಮಿಟೆಡ್‌ ಮತ್ತು ಡಾ. ದಿವ್ಯಾ ಅನಸ್ತೇಷಿಯಾ ಲಿ. ಎಂದು ನಮೂದಿಸಲಾಗಿದೆ. ಅಲ್ಲದೇ ಐಪಿಒ (ಇನ್ವಿಟೇಷನ್‌ ಆಫ್ ಪ್ರೀಷಿಯಸ್‌ ಅಕೇಶನ್‌) ಎಂದು ಕಾರ್ಡ್‌ಗೆ ಶೀರ್ಷಿಕೆ ನೀಡಲಾಗಿದೆ.

  ಇತ್ತೀಚೆಗೆ ಷೇರು ಮಾರುಕಟ್ಟೆಗಳ ಮೇಲೆ ಆಕರ್ಷಿತರಾಗುತ್ತಿರುವವರ ಸಂಖ್ಯೆ ಹೆಚ್ಚುತ್ತಿದ್ದು, ಇದೇ ಮಾದರಿಯಲ್ಲಿ ಮದುವೆ ಆಮಂತ್ರಣ ಪತ್ರಿಕೆಯನ್ನು ಈ ಜೋಡಿ ಕ್ರಿಯಾಶೀಲವಾಗಿ ಮುದ್ರಿಸಿದೆ. ವಿಲೀನ ಒಪ್ಪಂದದ ಪ್ರಕಾರ, ವಿಲೀನಗೊಂಡ ಕಂಪೆನಿಗಳು ನಿಬಂಧನೆಗಳ ಅನ್ವಯ (ಹಿಂದೂ ಸಂಪ್ರದಾಯ) ಲಿಸ್ಟಿಂಗ್ ಆಗುತ್ತಿವೆ ಎಂದೂ ಕಾರ್ಡ್‌ನಲ್ಲಿ ಬರೆದಿರುವುದು ಗಮನ ಸೆಳೆಯುತ್ತಿದೆ. ಇನ್ನು ವಿವಾಹ ಮಹೋತ್ಸವವನ್ನು ಲಿಸ್ಟಿಂಗ್ ಕಂಪೆನಿ ಎಂಬುದಾಗಿ ಮತ್ತು ಅತಿಥಿಗಳನ್ನು ರಿಟೇಲ್ ಹೂಡಿಕೆದಾರರು ಎಂಬುದಾಗಿ ಮುದ್ರಿಸಲಾಗಿದೆ.

  ವಿಲೀನಗೊಳ್ಳುತ್ತಿರುವ ಕಂಪೆನಿಗೆ ರಿಟೇಲ್ ಹೂಡಿಕೆದಾರರು ಆಶೀರ್ವಾದವೆಂಬ ಬಂಡವಾಳವನ್ನು ಹೂಡಿಕೆ ಮಾಡಲು ಬರಬೇಕು ಎಂದು ಅತಿಥಿಗಳನ್ನು ಆಮಂತ್ರಿಸಲಾಗಿದೆ. ಸದ್ಯ ಈ ಜೋಡಿಯ ಮದುವೆ ಕಾರ್ಡ್ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಸೃಜನಶೀಲತೆಗೆ ನೆಟ್ಟಿಗರು ಮನಸೋತಿದ್ದಾರೆ.