ನವದೆಹಲಿ, ಡಿ 03 (DaijiworldNews/DB): ಭಾರತ-ಪಾಕಿಸ್ತಾನ ಗಡಿಯಲ್ಲಿ ಪಾಕ್ನ ಡ್ರೋನ್ ಹಾವಳಿ ಮುಂದುವರಿದಿದ್ದು, ಇಂದು ಮುಂಜಾನೆ ಪಾಕ್ ಡ್ರೋನ್ವೊಂದನ್ನು ಗಡಿ ಭದ್ರತಾ ಪಡೆ ಸಿಬಂದಿ ಹೊಡೆದುರುಳಿಸಿದ್ದಾರೆ. ಅಲ್ಲದೆ ಡ್ರೋನ್ನೊಳಗಿದ್ದ ಹೆರಾಯಿನ್, ಮದ್ದು ಗುಂಡುಗಳಿರುವ ಪ್ಯಾಕೆಟ್ನ್ನು ವಶಪಡಿಸಿಕೊಂಡಿದ್ದಾರೆ.
ಪಂಜಾಬ್ನ ಭಾರತ-ಪಾಕ್ ಗಡಿಯಲ್ಲಿ ಅಕ್ರಮವಾಗಿ ಪಾಕಿಸ್ತಾನದ ಡ್ರೋನ್ ಹಾವಳಿ ನಿರಂತರವಾಗಿ ನಡೆಯುತ್ತಿದೆ. ನಿನ್ನೆ ಹೆಕ್ದಾಕಾಪ್ಟರ್ ಡ್ರೋನ್ನ್ನು ಬಿಎಸ್ಸೆಫ್ ಹೊಡೆದುರುಳಿಸಿತು. ಅದರ ಬೆನ್ನಲ್ಲೇ ಇಂದು ಮುಂಜಾನೆ ಮತ್ತೆ ಡ್ರೋನ್ ಕಾಣಿಸಿಕೊಂಡಿದ್ದು, ಕೂಡಲೇ ಕಾರ್ಯಾಚರಣೆಗಿಳಿದ ಗಡಿ ಭದ್ರತಾ ಪಡೆ ಸಿಬಂದಿ ಪಾಕ್ನ ಡ್ರೋನ್ನ್ನು ಹೊಡೆದುರುಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಡ್ರೋನ್ ಕಡೆಗೆ ಗುಂಡು ಹಾರಿಸಿ ಅದನ್ನು ಬಿಎಸ್ಸೆಫ್ ಸಿಬಂದಿ ಕೆಳಗುರುಳಿಸಿದ್ದಾರೆ. ಡ್ರೋನ್ನಲ್ಲಿದ್ದ 7.5 ಕೆಜಿ ಶಂಕಿತ ಹೆರಾಯಿನ್, 1 ಪಿಸ್ತೂಲ್, 2 ಮ್ಯಾಗಜೀನ್ಗಳು ಮತ್ತು 50 ಸುತ್ತು 9 ಎಂಎಂ ಮದ್ದುಗುಂಡುಗಳನ್ನು ಒಳಗೊಂಡಿರುವ 3 ಪ್ಯಾಕೆಟ್ಗಳನ್ನು ಇದೇ ವೇಳೆ ವಶಪಡಿಸಿಕೊಳ್ಳಲಾಗಿದೆ. ಪಾಕಿಸ್ತಾನದಿಂದ ಭಾರತ ಗಡಿಗೆ ಪ್ರವೇಶಿಸಿದ ಪಾಕ್ ಡ್ರೋನ್ನಲ್ಲಿ ಚುರಿವಾಲಾ ಚುಸ್ತಿ, ಫಾಜಿಲ್ಕಾ ಬಳಿಯ ಪ್ರದೇಶದಲ್ಲಿ ಇವುಗಳನ್ನು ಸಾಗಾಟ ಮಾಡಲಾಗುತ್ತಿತ್ತು ಎಂದು ಬಿಎಸ್ಸೆಫ್ ಅಧಿಕಾರಿಯೊಬ್ಬರು ತಿಳಿಸಿರುವುದಾಗಿ ವರದಿಯಾಗಿದೆ.