3 ರಾಜ್ಯದಲ್ಲಿ 6 ಮದುವೆಯಾದಾತ ಸಿಕ್ಕಿ ಬಿದ್ದಿದ್ದು ಹೇಗೆ?

•   Wed, Nov 30 2022 02:42:30 PM



• ಪಾಟ್ನಾ, ನ 30 (DaijiworldNews/DB): ಮೂರು ರಾಜ್ಯಗಳಲ್ಲಿ ಆರು ಮಂದಿ ಮಹಿಳೆಯರನ್ನು ಮದುವೆಯಾಗಿದ್ದ ಬಿಹಾರದ ವ್ಯಕ್ತಿಯನ್ನು ಪೊಲೀಸರು ಬಂಧಿಸಿದ ಘಟನೆ ಪಾಟ್ನಾದಲ್ಲಿ ನಡೆದಿದೆ.

  ಛೋಟು (50) ಬಂಧಿತ ಆರೋಪಿ. ಜಮುಯಿ ರೈಲ್ವೇ ನಿಲ್ದಾಣದಲ್ಲಿ ಛೋಟು ಬೇರೊಬ್ಬ ಮಹಿಳೆಯೊಂದಿಗೆ ತಿರುಗಾಡುತ್ತಿದ್ದಾಗ ಆತನ ನಾಲ್ಕನೇ ಪತ್ನಿಯ ಸಹೋದರ ವಿಕಾಸ್ ಎಂಬಾತ ನೋಡಿದ್ದು, ಈ ವೇಳೆ ಆತನನ್ನು ತಡೆದು ಪ್ರಶ್ನಿಸಿದ್ದಾನೆ. ಆತನೊಂದಿಗಿದ್ದ ಮಹಿಳೆಯನ್ನು ಕೇಳಿದಾಗ ಈತ ತನ್ನ ಪತಿ ಎಂಬುದಾಗಿ ಹೇಳಿದ್ದಾಳೆ. ಬಳಿಕ ಈ ವಿಚಾರವನ್ನು ಕುಟುಂಬ ಸದಸ್ಯರಿಗೆ ತಿಳಿಸಿ ಛೂಟುನನ್ನು ರೈಲ್ವೇ ಪೊಲೀಸ್ ಠಾಣೆಗೆ ಕರೆದೊಯ್ದಿದ್ದಾರೆ.

  ವಿಚಾರಣೆ ನಡೆಸಿದ ಪೊಲೀಸರಿಗೆ ತನ್ನ ಆರು ಮದುವೆಯ ಕತೆಯನ್ನು ಬಿಚ್ಚಿಟ್ಟಿದ್ದಾನೆ. ಬಳಿಕ ಯಾವುದೇ ಸಮಯದಲ್ಲಿ ವಿಚಾರಣೆಗೆ ಹಾಜರಾಗಬೇಕೆಂದು ವೈಯಕ್ತಿಕ ಬಾಂಡ್ ಬರೆಸಿಕೊಂಡು ಆತನನ್ನು ಪೊಲೀಸರು ಬಿಡುಗಡೆಗೊಳಿಸಿರುವುದಾಗಿ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

  ಮೊದಲು ಆತ ಚೆಂಬೇರಿಯಾ ಮಹಿಳೆಯನ್ನು ವಿವಾಹವಾಗಿದ್ದು, ಬಳಿಕ ಸುಂದರಕಾಂಡ್‌ನ ಮಹಿಳೆಯನ್ನು ವರಿಸಿದ್ದ. ಇದು ಎರಡೂ ಮದುವೆಗಳನ್ನು ಕುಟುಂಬಿಕರೇ ಮಾಡಿದ್ದರು. ಬಳಿಕ 2011ರಲ್ಲಿ ರಾಂಚಿಯ ಕಲಾವತಿ ಎಂಬಾಕೆಯನ್ನು ಮದುವೆಯಾಗಿದ್ದು, ಆಕೆಗೆ ನಾಲ್ಕು ಮಕ್ಕಳಿದ್ದಾರೆ. 2018ರಲ್ಲಿ ಸಂಗ್ರಾಮ್ಪುರದ ಮಂಜುದೇವಿ ಎಂಬಾಕೆಯನ್ನು ಮದುವೆಯಾಗಿದ್ದ. ಈ ಮದುವೆ ವಿಚಾರ ಮೂರನೇ ಪತ್ನಿ ಕಲಾವತಿಗೆ ತಿಳಿದಿತ್ತಾದರೂ, ಕುಟುಂಬದ ಹಿತದೃಷ್ಟಿಯಿಂದಾಗಿ ಪ್ರಶ್ನಿಸದೇ ಮೌನವಾಗಿದ್ದಳು. ಇನ್ನು ಐದು ಮತ್ತು ಆರನೇ ಪತ್ನಿಯರು ಕ್ರಮವಾಗಿ ದೆಹಲಿ ಹಾಗೂ ದಿಯೋಘರ್‌ನವರು ಎಂದು ತಿಳಿದು ಬಂದಿದೆ.

  ಈತ ಆರ್ಕೆಸ್ಟ್ರಾ ತಂಡವೊಂದರ ಸದಸ್ಯನಾಗಿದ್ದು, ಸಾಂಸ್ಕೃತಿಕ ಕಾರ್ಯಕ್ರಮ ನೀಡಲು ಊರಿಂದೂರಿಗೆ ತೆರಳುತ್ತಿದ್ದಾಗ ಅಲ್ಲಿಯೇ ಯುವತಿಯರನ್ನು ಪುಸಲಾಯಿಸಿ ಮದುವೆಯಾಗುತ್ತಿದ್ದ ಎಂದು ಪೊಲೀಸರು ತಿಳಿಸಿರುವುದಾಗಿ ವರದಿಯಾಗಿದೆ.