ಹಲ್ದ್ವಾನಿ (ಉತ್ತರಾಖಂಡ), ನ 12 (DaijiworldNews/DB): ವರನ ಕಡೆಯವರು ಕಡಿಮೆ ಬೆಲೆಯ ಲೆಹೆಂಗಾ ನೀಡಿದ್ದಕ್ಕೆ ಯುವತಿಯೊಬ್ಬಳು ಮದುವೆಯನ್ನೇ ನಿಲ್ಲಿಸಿದ ಘಟನೆ ಉತ್ತರಾಖಂಡ ರಾಜ್ಯದ ಹಲ್ದ್ವಾನಿಯಲ್ಲಿ ನಡೆದಿದೆ.
ಹಲ್ದ್ವಾನಿಯ ಯುವತಿ ಮತ್ತು ಅಲ್ಮೋರಾದ ಯುವಕನ ಮದುವೆ ನಿಶ್ಚಿತಾರ್ಥ ಇದೇ ಜೂನ್ನಲ್ಲಿ ನಡೆದಿದ್ದು, ನವೆಂಬರ್ 5ಕ್ಕೆ ಮದುವೆ ನಡೆಯಬೇಕಿತ್ತು. ಮದುವೆಗಾಗಿ ವರನ ತಂದೆ ವಧುವಿಗಾಗಿ ಲಕ್ನೋದಿಂದ 10 ಸಾವಿರ ರೂ. ಬೆಲೆಯ ಲೆಹೆಂಗಾವನ್ನು ತರಿಸಿದ್ದರು. ಆದರೆ ಈ ಲೆಹೆಂಗಾ ಕಡಿಮೆ ಬೆಲೆಯದ್ದೆಂದು ಮತ್ತು ಗುಣಮಟ್ಟ ಚೆನ್ನಾಗಿಲ್ಲವೆಂದು ಆಕ್ಷೇಪವೆತ್ತಿದ ವಧು ಮದುವೆಯೇ ಬೇಡವೆಂದು ಹೇಳಿದ್ದಾಳೆ.
ವಧುವಿನ ನಿರ್ಧಾರದಿಂದಾಗಿ ಎರಡೂ ಕಡೆಯವರಿಗೂ ಆಘಾತವಾಗಿದ್ದು, ವರನ ತಂದೆ ತನ್ನ ಎಟಿಎಂ ಕಾರ್ಡ್ನ್ನು ಆಕೆಗೆ ನೀಡಿ ಇಷ್ಟದ ಲೆಹೆಂಗಾವನ್ನು ಖರೀದಿಸುವಂತೆ ಹೇಳಿದರು. ಆದರೂ ವಧು ಇದಕ್ಕೆ ಒಪ್ಪದೆ ಮದುವೆಯನ್ನೇ ರದ್ದು ಮಾಡಿದಳು. ಯಾವುದೇ ಸಂಧಾನವೂ ಪ್ರಯೋಜನವಾಗಲಿಲ್ಲ ಎಂದು ವರದಿಯಾಗಿದೆ.