ಮಕ್ಕಳಾಗದ್ದಕ್ಕೆ ಮೂದಲಿಕೆ-ಪ್ಲಾಸ್ಟಿಕ್ ಗೊಂಬೆಯನ್ನು ಶಿಶುವೆಂದ ಮಹಿಳೆ!

•   Fri, Nov 11 2022 11:39:46 AM



• ಉತ್ತರಪ್ರದೇಶ, ನ 11 (DaijiworldNews/DB): ಮದುವೆಯಾಗಿ ದಶಕ ಕಳೆದರೂ ಮಕ್ಕಳಾಗಿಲ್ಲವೆಂಬ ಮನೆಯವರ ಮಾತಿನಿಂದ ಬೇಸತ್ತು ಮಹಿಳೆಯೊಬ್ಬಳು ನಕಲಿ ಗರ್ಭದ ಕತೆ ಕಟ್ಟಿ ಪ್ಲಾಸ್ಟಿಕ್‌ ಗೊಂಬೆಯನ್ನು ಮಗುವೆಂದು ನಂಬಿಸಿದ ಘಟನೆ ಉತ್ತರಪ್ರದೇಶದಲ್ಲಿ ನಡೆದಿದೆ.

  ಉತ್ತರ ಪ್ರದೇಶದ ಎತಾವಾಹ್ ನಿವಾಸಿ 40 ವರ್ಷದ ಮಹಿಳೆಗೆ ಮದುವೆಯಾಗಿ 18 ವರ್ಷ ಕಳೆದರೂ ಮಕ್ಕಳಾಗಿರಲಿಲ್ಲ. ಇದರಿಂದ ಆಕೆ ಮನೆಯವರು, ಕುಟುಂಬಿಕರು, ಸಂಬಂಧಿಕರು ಹಾಗೂ ನೆರೆಹೊರೆಯವರಿಂದ ನಿತ್ಯ ಮೂದಲಿಕೆ ಕೇಳಿ ಬೇಸತ್ತಿದ್ದಳು. ಕೊನೆಗೆ ತಾನು ಗರ್ಭ ಧರಿಸಿದ್ದೇನೆ ಎಂಬುದಾಗಿ ಮನೆಯಲ್ಲಿ ಸುಳ್ಳು ಹೇಳಿದ್ದಳು. ಅಲ್ಲದೆ, ಪ್ರತಿ ತಿಂಗಳು ವೈದ್ಯರ ಬಳಿ ಪರೀಕ್ಷಿಸಿಕೊಳ್ಳುತ್ತಿರುವುದಾಗಿಯೂ ನಂಬಿಸಿದ್ದಳು.

  ಆರು ತಿಂಗಳು ಕಳೆದ ಬಳಿಕ ತಾನು ಆರು ತಿಂಗಳಿಗೇ ಮಗುವಿಗೆ ಜನ್ಮ ನೀಡಿದ್ದಾಗಿ ಹೇಳಿದ್ದಾಳೆ. ಅಲ್ಲದೆ ಅವಧಿಪೂರ್ವ ಜನಿಸಿದ ಶಿಶುಗಳಂತೆಯೇ ಇರುವ ಪ್ಲಾಸ್ಟಿಕ್ ಗೊಂಬೆಯೊಂದನ್ನು ಖರೀದಿಸಿ ಅದೇ ಆರು ತಿಂಗಳಿಗೆ ಜನಿಸಿದ ಮಗುವೆಂದು ಮನೆಯವರನ್ನು ನಂಬಿಸಿದ್ದಾಳೆ. ಆದರೆ ಮನೆಯವರು ಆಕೆಯನ್ನು ಮತ್ತು ಮಗುವಿನ ರೂಪದಲ್ಲಿದ್ದ ಗೊಂಬೆಯನ್ನು ಆಸ್ಪತ್ರೆಗೆ ಕೊಂಡೊಯ್ದು ಕೇಳಿದಾಗ ಮಹಿಳೆಯ ಸುಳ್ಳಿನ ಪುರಾಣ ಬಯಲಾಗಿದೆ. ಅಲ್ಲದೆ ಮಹಿಳೆ ತೆಗೆದುಕೊಂಡಿರುವ ಎಕ್ಸ್‌ರೇಗಳೆಲ್ಲವೂ ನಕಲಿ ಎಂಬುದು ಗೊತ್ತಾಗಿದೆ.

  ಬಳಿಕ ಈ ಕುರಿತು ಆಕೆಯನ್ನು ವಿಚಾರಿಸಿದಾಗ ಒಂದೂವರೆ ದಶಕಗಳಿಂದ ಮಕ್ಕಳಾಗಲಿಲ್ಲವೆಂದು ಮೂದಲಿಕೆಯ ಮಾತುಗಳನ್ನು ಕೇಳಿ ಕೇಳಿ ಸಾಕಾಗಿದ್ದು, ಅದೇ ಕಾರಣಕ್ಕೆ ಈ ರೀತಿ ಮಾಡಿದೆ ಎಂದು ಹೇಳಿದ್ದಾಳೆ. ಸದ್ಯ ಕುಟುಂಬಸ್ಥರು ಮೌನವಹಿಸಿದ್ದಾರೆ ಎಂದು ತಿಳಿದು ಬಂದಿದೆ.