ನಾನೇಕೆ ಬ್ಲೂಟಿಕ್‌ಗೆ ಹಣ ಪಾವತಿಸಲಿ?-ಮೊದಲ ಟ್ವಿಟರ್ ಬಳಕೆದಾರಳ ಪ್ರಶ್ನೆ

•   Tue, Nov 08 2022 03:05:00 PM



• ನವದೆಹಲಿ, ನ 08 (DaijiworldNews/DB): ಟ್ವಿಟರ್ ಬ್ಲೂಟಿಕ್ ಪಡೆಯಲು ನಾನೇಕೆ ಶುಲ್ಕ ಪಾವತಿಸಲಿ? ಇದು ಭಾರತದ ಮೊದಲ ಟ್ವಿಟರ್‌ ಬಳಕೆದಾರ ಮಹಿಳೆಯ ಪ್ರಶ್ನೆ.

  ಭಾರತದ ಮೊದಲ ಟ್ವಿಟರ್ ಬಳಕೆದಾರರು ಎನ್ನಲಾದ ಮುಂಬೈ ಜೈಸಲ್ಮೇರ್ ಹೊಟೇಲ್‌ನಲ್ಲಿ ಕೆಲಸ ಮಾಡುತ್ತಿರುವ ನೈನಾ ರೆಧು ಅವರನ್ನು ಸುದ್ದಿಸಂಸ್ಥೆಯೊಂದು ಮಾತನಾಡಿಸಿದಾಗ ಅವರು ಈ ಪ್ರಶ್ನೆಯನ್ನು ಮುಂದಿಟ್ಟಿದ್ದಾರೆ. ಬ್ಲೂಟಿಕ್‌ ಪಡೆಯಲು ತಿಂಗಳಿಗೆ 8 ಡಾಲರ್‌ನ್ನು ಟ್ವಿಟರ್ ಸಂಸ್ಥೆ ವಿಧಿಸಿರುವ ಕುರಿತು ನೈನಾರಲ್ಲಿ ಕೇಳಿದಾಗ, ಕಳೆದ ಹದಿನಾರು ವರ್ಷಗಳಿಂದ ಹಣ ಪಾವತಿಸದೇ ಟ್ವಿಟರ್ ಬಳಕೆ ಮಾಡಿದ ನಾನೇಕೆ ಈಗ ಹಣ ಪಾವತಿ ಮಾಡಿ ಟ್ವಿಟರ್ ಬಳಕೆ ಮಾಡಬೇಕು ಎಂದು ಪ್ರಶ್ನಿಸಿದ್ದಾರೆ.

  ಸಾಮಾನ್ಯವಾಗಿ ಬ್ಲೂಟಿಕ್ ಹೊಂದುವುದು ತೀರಾ ಅಗತ್ಯವಲ್ಲ. ಇದರಿಂದ ಜನಸಾಮಾನ್ಯರ ಮೇಲೆ ಯಾವುದೇ ಪರಿಣಾಮವೂ ಬೀರುವುದಿಲ್ಲ. ಆದರೆ ಪತ್ರಿಕೋದ್ಯಮ ಮತ್ತು ಇತರ ಕ್ಷೇತ್ರಗಳಲ್ಲಿ ಕೆಲಸ ಮಾಡುವವರ ಮೇಲೆ ಇದು ಪರಿಣಾಮ ಬೀರಬಹುದೇನೋ ಎಂದಿದ್ದಾರೆ ನೈನಾ. ಬದಲಾದ ನಿಯಮ ಅನಿವಾರ್ಯ ಅಲ್ಲ, ಅಗತ್ಯವುಳ್ಳವರು ಪಡೆದುಕೊಳ್ಳಬಹುದು ಎಂದವರು  ಹೇಳಿದ್ದಾರೆ. 

  ಟ್ವಿಟರ್‌ನಲ್ಲಿ ಬ್ಲೂಟಿಕ್ ಬೇಕಾದರೆ ತಿಂಗಳಿಗೆ 8 ಡಾಲರ್ ಹಣ ಪಾವತಿ ಮಾಡಬೇಕು ಎಂಬುದಾಗಿ ಟ್ವಿಟರ್‌ನ ಹೊಸ ಮಾಲಕ ಎಲೋನ್ ಮಸ್ಕ್ ಕಟ್ಟಾಜ್ಞೆ ಹೊರಡಿಸಿದ್ದರು. ಆದರೆ ಮಸ್ಕ್ ಅವರ ಈ ನಿರ್ಧಾರಕ್ಕೆ ಹಲವರು ವಿರೋಧ ವ್ಯಕ್ತಪಡಿಸಿದ್ದರು.

  2006 ರಲ್ಲಿ ಟ್ವಿಟರ್ ಖಾತೆ ತೆರೆದಿದ್ದ ನೈನಾ ಇಲ್ಲಿಯವರೆಗೆ ಸುಮಾರು 1.75 ಲಕ್ಷ ಟ್ವೀಟ್‌ ಮಾಡಿದ್ದಾರೆ. .