ಸ್ಟ್ರೆಚರ್ ಇಲ್ಲದಕ್ಕೆ ಬೆಡ್‌ಶೀಟ್‌ನಲ್ಲೇ ವೃದ್ದ ರೋಗಿಯನ್ನು ಕರೆ ತಂದ ಸಂಬಂಧಿಕರು!

•   Sun, Nov 06 2022 12:25:30 PM



• ಲಕ್ನೋ, ನ 06 (DaijiworldNews/DB): ಒಂದೇ ಹಾಸಿಗೆ ಮೇಲೆ ಇಬ್ಬರು ರೋಗಿಗಳು ಮಲಗಿರುವ ಹಾಗೂ ಸ್ಟ್ರೆಚರ್ ಇಲ್ಲದಕ್ಕೆ ಬೆಡ್‌ಶೀಟ್‌ನಲ್ಲೇ ವೃದ್ದರೋಗಿಯನ್ನು ಮಲಗಿಸಿ ಆಸ್ಪತ್ರೆಗೆ ಕರೆತಂದ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಇದು ಉತ್ತರಪ್ರದೇಶದ ಜಿಲ್ಲಾಸ್ಪತ್ರೆಯೊಂದರಲ್ಲಿನ ಘಟನೆ ಎನ್ನಲಾಗುತ್ತಿದೆ.

  ಒಂದೇ ಹಾಸಿಗೆಯಲ್ಲಿ ಇಬ್ಬರು ರೋಗಿಗಳು ಮಲಗಿರುವುದು, ಬೆಡ್‌ಶೀಟ್‌ನಲ್ಲಿ ವೃದ್ದರೋಗಿಯನ್ನು ಆಸ್ಪತ್ರೆಗೆ ಕರೆ ತಂದಿರುವುದು ಮತ್ತು ರೋಗಿಗಳು ಬೆಡ್‌ ಸಿಗದೆ ನೆಲದ ಮೇಲೆ ಮಲಗಿರುವ ದೃಶ್ಯಗಳುಳ್ಳ ಫೋಟೋಗಳೂ ವೈರಲ್ ಆಗಿವೆ. ಉತ್ತರ ಪ್ರದೇಶದ ಬಲ್ಲಿಯಾ ಜಿಲ್ಲಾಸ್ಪತ್ರೆಯಲ್ಲಿ ಈ ಎಲ್ಲಾ ಅವ್ಯವಸ್ಥೆಗಳಿವೆ ಎಂದು ಸಾರುವ ಫೋಟೋಗಳನ್ನು ಸಾರ್ವಜನಿಕರು ವೈರಲ್ ಮಾಡಿದ್ದಾರೆ.

  ಸ್ಟ್ರೆಚರ್‍ ಇಲ್ಲದ ಕಾರಣ ಬೆಡ್‌ಶೀಟ್‌ನಲ್ಲಿ ರೋಗಿಯನ್ನು ಮಲಗಿಸಿ ಆಸ್ಪತ್ರೆಗೆ ಕರೆ ತರಲಾಗಿದೆ. ಸ್ಟ್ರೆಚರ್‍ ಇಲ್ಲದ ಕಾರಣ ರೋಗಿಗಳ ಸಂಬಂಧಿಕರೇ ಬೆಡ್‌ಶೀಟ್ ವ್ಯವಸ್ಥೆ ಮಾಡಿಕೊಂಡು ರೋಗಿಯನ್ನು ಕರೆ ತಂದಿದ್ದಾರೆ. ಇದೇ ವೇಳೆ ಈ ಆಸ್ಪತ್ರೆಯಲ್ಲಿ ಸ್ವಚ್ಛತೆಗೂ ಆದ್ಯತೆ ನೀಡುತ್ತಿಲ್ಲ ಎಂದು ರೋಗಿಗಳ ಸಂಬಂಧಿಕರು ಆರೋಪಿಸಿದ್ದಾರೆ ಎಂಬುದಾಗಿ ವರದಿಯಾಗಿದೆ. ವೈದ್ಯರು ಸುತ್ತಾಡಲು ಬರುವುದಿಲ್ಲ. ನಿರ್ಲಕ್ಷ್ಯಗಳಿಗೂ, ತಮಗೂ ಸಂಬಂಧವಿಲ್ಲ ಎಂಬಂತೆ ವರ್ತಿಸುತ್ತಿರುವುದಾಗಿಯೂ ಆರೋಪ ಕೇಳಿ ಬಂದಿದೆ.