ಕೊನೆಗೂ ಕನಸಿನ ರಾಣಿಯ ಕೈ ಹಿಡಿದ 2.5 ಅಡಿ ಎತ್ತರದ ವ್ಯಕ್ತಿ

•   Fri, Nov 04 2022 01:12:30 PM



• ಶಾಮ್ಲಿ (ಉತ್ತರ ಪ್ರದೇಶ), ನ 04 (DaijiworldNews/DB): ಕಳೆದ ಹಲವು ವರ್ಷಗಳಿಂದ ವಧುವಿನ ಅನ್ವೇಷಣೆಯಲ್ಲಿದ್ದ ಉತ್ತರ ಪ್ರದೇಶದ 2.5 ಅಡಿ ಎತ್ತರದ ಅಜೀಮ್ ಮನ್ಸೂರಿ ಕೊನೆಗೂ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಹಾಪುರ್‌ನ 3 ಅಡಿ ಎತ್ತರದ ಯುವತಿಯನ್ನು ಬಾಳ ಸಂಗಾತಿಯಾಗಿ ಪಡೆದಿದ್ದಾರೆ.

  ಕಳೆದ ಮಾರ್ಚ್‌ನಲ್ಲಿ ಹಾಪುರ್‌ನ ಬುಶ್ರಾ ಎಂಬ ಭೇಟಿಯಾಗಿದ್ದ ಮನ್ಸೂರಿ, ಮುಂದಿನ ತಿಂಗಳು ಅಂದರೆ ಎಪ್ರಿಲ್‌ನಲ್ಲೇ ಆಕೆಯೊಂದಿಗೆ ಮದುವೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. ಆನಂತರ ನವೆಂಬರ್‌ನಲ್ಲಿ ಮದುವೆ ಗೊತ್ತುಪಡಿಸಿದ್ದರು. ಕಳೆದ ವಾರವಷ್ಟೇ ತಮ್ಮ ಮದುವೆಗೆ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರನ್ನು ಆಹ್ವಾನಿಸುವುದಾಗಿ ಹೇಳಿ ಸುದ್ದಿಯಲ್ಲಿದ್ದ ಮನ್ಸೂರಿ, ಇದೀಗ ಕಳೆದ ಬುಧವಾರ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಆದರೆ ಪ್ರಧಾನಿ ಮೋದಿ ಹಾಗೂ ಸಿಎಂ ಯೋಗಿ ಅವರನ್ನು ಆಹ್ವಾನಿಸಿದ್ದರೇ ಎಂಬುದು ತಿಳಿದು ಬಂದಿಲ್ಲ.

  ಮನ್ಸೂರಿ ಅವರು ತನ್ನ ಎತ್ತರಕ್ಕೆ ಸರಿ ಹೊಂದುವ ವಧುವಿನ ಹುಡುಕಾಟದಲ್ಲಿ ಕಳೆದ ಹಲವಾರು ವರ್ಷಗಳನ್ನು ಕಳೆದಿದ್ದಾರೆ. ಎತ್ತರಕ್ಕೆ ಹೊಂದಿಕೆಯಾಗುವ ವಧು ಸಿಗದ ಕಾರಣ 2019ರಲ್ಲಿ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಹಾಗೂ ಮಾಜಿ ಸಿಎಂ ಅಖಿಲೇಶ್ ಯಾದವ್ ಅವರನ್ನು ಭೇಟಿಯಾಗಿ ಸೂಕ್ತ ವಧುವನ್ನು ಹುಡುಕುವಂತೆ ವಿನಂತಿಸಿ ಸುದ್ದಿಯಾಗಿದ್ದರು. ಅಲ್ಲದೆ ಹಲವು ಮಂದಿ ರಾಜಕಾರಣಿಗಳನ್ನು ಭೇಟಿಯಾಗಿ ತನ್ನ ಮನದಾಳದ ಇಂಗಿತವನ್ನು ಹೇಳಿಕೊಂಡು ವಧುವನ್ನು ಹುಡುಕಿಕೊಡುವಂತೆ ಕೇಳಿಕೊಂಡಿದ್ದರು.