ಮುಂಬೈ, ನ 04 (DaijiworldNews/DB): ಬಾಕಿ ವಿದ್ಯುತ್ ಬಿಲ್ ಪಾವತಿಸುವಂತೆ ಬಂದ ಕರೆಗೆ ಸ್ಪಂದಿಸಿ ಆನ್ಲೈನ್ ಮೂಲಕ ಬಿಲ್ ಪಾವತಿಸಲು ಹೋಗಿ ಭಾರತೀಯ ನೌಕಾಪಡೆಯ ಕಮಾಂಡರ್ವೊಬ್ಬರು ತಮ್ಮ ಕ್ರೆಡಿಟ್ ಕಾರ್ಡ್ನಿಂದ 1.5 ಲಕ್ಷ ರೂಪಾಯಿಗಳನ್ನು ಕಳೆದುಕೊಂಡಿದ್ದಾರೆ.
ವಿದ್ಯುತ್ ಬಿಲ್ ಪಾವತಿಸದಿದ್ದರೆ ಸಂಪರ್ಕ ಕಡಿತಗೊಳಿಸಲಾಗುವುದು ಎಂಬುದಾಗಿ ಕಮಾಂಡರ್ ಅವರ ಪತ್ನಿಯ ಮೊಬೈಲ್ಗೆ ಸಂದೇಶ ಬಂದಿದ್ದು, ಆ ಸಂದೇಶವನ್ನು ಅವರು ತಮ್ಮ ಪತಿಗೆ ಕಳುಹಿಸಿದ್ದಾರೆ. ಕೂಡಲೇ ಅಧಿಕಾರಿ ಸಂದೇಶ ಬಂದಿದ್ದ ಸಂಖ್ಯೆಗೆ ಕರೆ ಮಾಡಿದ್ದಾರೆ. ಆಗ ಕರೆ ಮಾಡಿದ ವ್ಯಕ್ತಿ ಕ್ವಿಕ್ ಸಪೋರ್ಟ್ ಆಪ್ ಡೌನ್ಲೋಡ್ ಮಾಡುವಂತೆ ಹೇಳಿದ್ದು, ಕಮಾಂಡರ್ ಹಾಗೆಯೇ ಮಾಡಿದ್ದಾರೆ. ಬಳಿಕ ಹತ್ತು ರೂ.ಗಳನ್ನು ಆಪ್ ಮುಖಾಂತರ ಕಳುಹಿಸಲು ಹೇಳಿದ್ದಾರೆ. ಹತ್ತು ರೂ. ಕಳುಹಿಸಿದಾಗ ಅವರ ಅಕೌಂಟ್ನಿಂದ ಕ್ರಮವಾಗಿ 48,999 ಮತ್ತು ರೂ. 98,000 ವಿತ್ ಡ್ರಾ ಆಗಿದೆ. ಕೂಡಲೇ ವಂಚನೆಯನ್ನು ಅರಿತ ಕಮಾಂಡರ್ ಕಾರ್ಡ್ ಬ್ಲಾಕ್ ಮಾಡಿದ್ದಾರೆ.
ಕಾರ್ಡ್ ಬ್ಲಾಕ್ ಮಾಡದೇ ಇದ್ದಲ್ಲಿ ಇನ್ನೂ 1.35 ಲಕ್ಷ ರೂ. ಕಳೆದುಕೊಳ್ಳುವ ಸಾಧ್ಯತೆ ಇತ್ತು ಎನ್ನಲಾಗಿದೆ. ಬಳಿಕ ಕೂಡಲೇ ಪೊಲೀಸರಿಗೆ ದೂರು ನೀಡಿದ್ದಾರೆ.