ನವದೆಹಲಿ, ನ 04 (DaijiworldNews/HR): ಪ್ರಧಾನಿ ನರೇಂದ್ರ ಮೋದಿ ಅವರು ಕುನೋ ರಾಷ್ಟ್ರೀಯ ಉದ್ಯಾನವನದಲ್ಲಿ ಇರಿಸಲಾಗಿರುವ ಎಂಟು ನಮೀಬಿಯಾದ ಚೀತಾಗಳಿಗೆ ಶೀಘ್ರದಲ್ಲೇ ಹೊಸ ಹೆಸರುಗಳನ್ನು ಸಲಹೆ ಮಾಡುವಂತೆ ಸೂಚಿಸಿದ ಬೆನ್ನಲ್ಲೇ ದೇಶಾದ್ಯಂತ 11,000 ಕ್ಕೂ ಹೆಚ್ಚು ಹೆಸರುಗಳನ್ನು ಜನರು ಸೂಚಿಸಿದ್ದಾರೆ.
ಅಕ್ಟೋಬರ್ ತಿಂಗಳು 25ರಂದು ನಡೆದ ಮನ್ ಕಿ ಬಾತ್ ಕಾರ್ಯಕ್ರಮದಲ್ಲಿ ಚೀತಾಗಳಿಗೆ ಹೆಸರಿಡುವ ಸ್ಪರ್ಧೆ ಆರಂಭಿಸುವುದಾಗಿ ಮೋದಿ ಹೇಳಿದ್ದು, ನಮ್ಮ ದೇಶಕ್ಕೆ ಬಂದಿರುವ ಚೀತಾಗಳಿಗೆ ಯಾವ ಹೆಸರಿಡಬೇಕು ಎಂದು ಸೂಚಿಸಿ. ಈ ಸ್ಪರ್ಧೆಯಲ್ಲಿ ಭಾಗವಹಿಸುವವರು ಹೆಸರುಗಳ ವಿಷಯದಲ್ಲಿ ಎಚ್ಚರಿಕೆ ವಹಿಸಬೇಕು ಮತ್ತು ಭಾರತೀಯ ಸಂಸ್ಕೃತಿ ಮತ್ತು ಪರಂಪರೆಗೆ ಅನುಗುಣವಾಗಿ ಹೆಸರುಗಳು ಸಾಂಪ್ರದಾಯಿಕವಾಗಿರಬೇಕು ಎಂದು ತಿಳಿಸಿದ್ದರು.
ಇನ್ನು ಸೆಪ್ಟೆಂಬರ್ 26ರಂದು ಆರಂಭವಾದ ಪ್ರಕ್ರಿಯೆ ಅಕ್ಟೋಬರ್ 31ರವರೆಗೆ ಪೋರ್ಟಲ್ನಲ್ಲಿ ದಾಖಲಾದ ಮಾಹಿತಿಯ ಪ್ರಕಾರ, ದೇಶಾದ್ಯಂತ 11,565 ಜನರು ತಮಗೆ ತಿಳಿದಿರುವ ಹೆಸರನ್ನು ಸೂಚಿಸಿದ್ದಾರೆ.