ವೃದ್ದನ ಥೈರಾಯ್ಡ್ ಗ್ರಂಥಿಯಲ್ಲಿತ್ತು ತೆಂಗಿನಕಾಯಿ ಗಾತ್ರದ ಗಡ್ಡೆ!

•   Sun, Oct 30 2022 05:33:47 PM



• ಪಾಟ್ನಾ, ಅ 30 (DaijiworldNews/DB): ವೃದ್ದರೊಬ್ಬರ ಥೈರಾಯ್ಡ್ ಗ್ರಂಥಿಯಲ್ಲಿ ತೆಂಗಿನಕಾಯಿ ಗಾತ್ರದ ಗಡ್ಡೆ ಬೆಳೆದ ಅಚ್ಚರಿಯ ವಿದ್ಯಾಮಾನ ಬಿಹಾರದಲ್ಲಿ ನಡೆದಿದೆ. ಸಾಮಾನ್ಯವಾಗಿ 3-4 ಸೆಂ.ಮೀ ಗಾತ್ರ ಹೊಂದಿರುವ ಥೈರಾಯ್ಡ್ ಗ್ರಂಥಿಯಲ್ಲಿ 18-20 ಸೆ.ಮೀ. ಗಾತ್ರದ ಗಡ್ಡೆ ಬೆಳೆದಿರುವುದನ್ನು ನೋಡಿ ವೈದ್ಯರೇ ಶಾಕ್ ಆಗಿದ್ದಾರೆ.

  ಬಿಹಾರ ಮೂಲದ 72 ವರ್ಷದ ರಘುಬೀರ್ ಅವರಿಗೆ ಆರು ತಿಂಗಳಿನಿಂದ ಉಸಿರಾಟದ ಸಮಸ್ಯೆ ಎದುರಾಗಿತ್ತು. ಅಲ್ಲದೆ ಆಹಾರ ಸೇವಿಸಲಾಗದೇ ಸಂಕಷ್ಟಕ್ಕೊಳಗಾಗಿದ್ದರು. ಈ ಹಿನ್ನೆಲೆಯಲ್ಲಿ ಅವರು ದೆಹಲಿ ಶ್ರೀ ಗಂಗಾರಾಮ್ ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದರು. ವೃದ್ದನನ್ನು ಪರಿಶೀಲಿಸಿದ ವೈದ್ಯರು ಥೈರಾಯ್ಡ್ ಗ್ರಂಥಿಯಲ್ಲಿ ತೆಂಗಿನಕಾಯಿ ಗಾತ್ರದ ಗಡ್ಡೆ ಇರುವುದನ್ನು ಗಮನಿಸಿದರು. ಹೀಗಾಗಿ ವೈದ್ಯರ ತಂಡವು ಅವರನ್ನು ಶಸ್ತ್ರಚಿಕಿತ್ಸೆಗೊಳಪಡಿಸಿ ಗಡ್ಡೆಯನ್ನು ತೆಗೆದು ಹಾಕುವಲ್ಲಿ ಯಶಸ್ವಿಯಾದರು.

  ಇನ್ನು ವೃದ್ದನಿಗೆ ತುಂಬಾ ವಯಸ್ಸಾಗಿದ್ದರಿಂದ ಶಸ್ತ್ರಚಿಕಿತ್ಸೆ ನಡೆಸುವುದೂ ವೈದ್ಯರಿಗೆ ಸವಾಲಾಗಿತ್ತು. ಸವಾಲುಗಳನ್ನು ಎದುರಿಸಿ ಕೊನೆಗೂ ಯಶಸ್ವಿಯಾಗಿ ಗಡ್ಡೆಯನ್ನು ಹೊರತೆಗೆದಿದ್ದಾರೆ. ಈ ಬಗ್ಗೆ ಆಸ್ಪತ್ರೆಯ ಇಎನ್‌ಟಿ ವಿಭಾಗದ ಸಲಹೆಗಾರ ಡಾ. ಸಂಗೀತ್ ಅಗರ್‌ವಾಲ್ ಪ್ರತಿಕ್ರಿಯಿಸಿ, ನಾನು ಸುಮಾರು 250 ಕಠಿಣ ಶಸ್ತ್ರಚಿಕಿತ್ಸೆಗಳನ್ನು ನಡೆಸಿದ್ದೇನೆ. ಆದರೆ ಇದು ತುಂಬ ಸವಾಲಿನದ್ದಾಗಿತ್ತು. ಸಾಮಾನ್ಯವಾಗಿ ಥೈರಾಯ್ಡ್ ಗ್ರಂಥಿ 3-4 ಸೆಂ.ಮೀ ಗಾತ್ರ ಹೊಂದಿರುತ್ತದೆ. ಆದರೆ ಈ ಗಡ್ಡೆ18-20 ಗಾತ್ರದ ತೆಂಗಿನಕಾಯಿಗಿಂತ ದೊಡ್ಡದಾಗಿತ್ತು ಎಂದು ಹೇಳಿದ್ದಾರೆ.