ಉತ್ತರಪ್ರದೇಶ, ಅ 26 (DaijiworldNews/DB): ಡೆಂಗ್ಯೂ ರೋಗಿಗೆ ಪ್ಲೇಟ್ಲೆಟ್ ಎಂದು ನಂಬಿಸಿ ಮೂಸಂಬಿ ಜ್ಯೂಸ್ ನೀಡಿ ರೋಗಿಯ ಸಾವಿಗೆ ಕಾರಣವಾಗಿದ್ದ ಗ್ಲೋಬಲ್ ಆಸ್ಪತ್ರೆಗೆ ಇದೀಗ ಕಂಟಕ ಎದುರಾಗಿದೆ. ಕಟ್ಟಡ ಅಕ್ರಮವಾಗಿದ್ದು, ಧ್ವಂಸಗೊಳಿಸುವುದಾಗಿ ಪ್ರಯಾಗ್ರಾಜ್ ಅಭಿವೃದ್ಧಿ ಪ್ರಾಧಿಕಾರ ನೋಟಿಸ್ ನೀಡಿದೆ.
ಅಕ್ಟೋಬರ್ 28ರೊಳಗೆ ಕಟ್ಟಡ ಖಾಲಿ ಮಾಡುವಂತೆ ಪ್ರಾಧಿಕಾರವು ಆಸ್ಪತ್ರೆ ಆಡಳಿತ ಮಂಡಳಿಗೆ ಸೂಚಿಸಿದೆ. ಇತ್ತೀಚೆಗೆ ಈ ಆಸ್ಪತ್ರೆಯ ಸಿಬಂದಿ ಡೆಂಗ್ಯೂ ರೋಗಿಯೊಬ್ಬನಿಗೆ ಪ್ಲೇಟ್ಲೆಟ್ ಎಂದು ಹೇಳಿ ಮೂಸಂಬಿ ಜ್ಯೂಸ್ ನೀಡಿದ್ದರು. ಇದರಿಂದ ರೋಗಿಯ ಆರೋಗ್ಯ ಸ್ಥಿತಿ ಉಲ್ಬಣಗೊಂಡು ಆತ ಮೃತಪಟ್ಟಿದ್ದ ಎಂಬುದಾಗಿ ಕುಟುಂಬಸ್ಥರು ಆರೋಪಿಸಿದ್ದರು. ಪ್ರಕರಣ ಸಂಬಂಧ 12 ಮಂದಿಯನ್ನು ಬಂಧಿಸಲಾಗಿತ್ತು.
ಇನ್ನು ಪ್ರಕರಣದ ಕುರಿತಂತೆ ನಿಷ್ಪಕ್ಷಪಾತ ತನಿಖೆ ನಡೆಯಲಿದ್ದು, ಈಗಾಗಲೇ ಆಸ್ಪತ್ರೆಯನ್ನು ಸೀಲ್ ಮಾಡಲಾಗಿದೆ. ತಪ್ಪಿತಸ್ಥರು ಯಾರೇ ಆದರೂ ಅವರ ವಿರುದ್ದ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದು ಉತ್ತರ ಪ್ರದೇಶ ಉಪ ಮುಖ್ಯಮಂತ್ರಿ ಬ್ರಜೇಶ್ ಪಾಠಕ್ ಹೇಳಿದ್ದರು.