ಆಗ್ರಾ, ಅ 24 (DaijiworldNews/DB): ಸ್ನೇಹಿತನ ನಾಲ್ಕು ವರ್ಷದ ಮಗುವನ್ನು ವ್ಯಕ್ತಿಯೊಬ್ಬ ಕ್ಷುಲ್ಲಕ ಕಾರಣಕ್ಕೆ ಅಪಹರಿಸಿ ಕೊಲೆಗೈದ ಘಟನೆ ಆಗ್ರಾದಲ್ಲಿ ನಡೆದಿದೆ. ಪ್ರಕರಣದ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.
ಬಂಟಿ (23) ಬಂಧಿತ ಆರೋಪಿ. ಮನೆಯ ಹೊರಗೆ ಶನಿವಾರ ರಾತ್ರಿ ಬಾಲಕ ಆಟವಾಡುತ್ತಿದ್ದ ವೇಳೆ ಆರೋಪಿ ಬಾಲಕನನ್ನು ಅಪಹರಿಸಿದ್ದಾನೆ. ಬಾಲಕ ಕಾಣೆಯಾದ ಹಿನ್ನೆಲೆಯಲ್ಲಿ ಕೂಡಲೇ ಮನೆಯವರು ಹುಡುಕಾಡಿದ್ದು, ಈ ವೇಳೆ ಆರೋಪಿಯೂ ಕುಟುಂಬದೊಂದಿಗಿದ್ದ. ಬಳಿಕ ಬಾಲಕ ಇರುವ ಸ್ಥಳದ ಬಗ್ಗೆ ಬಾಬಾ ತನಗೆ ಮಾಹಿತಿ ನೀಡಿದ್ದಾರೆ ಎಂದು ಹೇಳಿ ಆತ ಬಾಲಕನ ಶವವಿರುವ ಸ್ಥಳಕ್ಕೆ ಎಲ್ಲರನ್ನೂ ಕರೆದೊಯ್ದಿದ್ದ. ಬಳಿಕ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ. ಆರೋಪಿ ಬಂಟಿಯನ್ನು ಬಂಧಿಸಲಾಗಿದೆ ಎಂದು ಆಗ್ರಾದ ಛಟ್ಟಾ ವೃತ್ತ ಅಧಿಕಾರಿ ಸುಕನ್ಯಾ ಶರ್ಮಾ ತಿಳಿಸಿದ್ದಾರೆ.
ಆರೋಪಿಯು ಕೊಲೆಯಾದ ಬಾಲಕನ ತಂದೆಯ ಸ್ನೇಹಿತನಾಗಿದ್ದ. ಭಂಡಾರದ ಸಂಘಟಕರ ಪಟ್ಟಿಯಿಂದ ತನ್ನ ಹೆಸರನ್ನು ತೆಗೆದು ಹಾಕಿದ್ದಕ್ಕೆ ಆರೋಪಿ ಬಾಲಕನ ತಂದೆ ವಿರುದ್ದ ದ್ವೇಷ ಸಾಧಿಸುತ್ತಿದ್ದ ಎಂದು ತಿಳಿದು ಬಂದಿದೆ. ಅಲ್ಲದೆ ಬಾಲಕನ ತಂದೆಯೊಂದಿಗೆ ವಿವಾದ ಇರುವುದಾಗಿ ಆರೋಪಿ ವಿಚಾರಣೆ ವೇಳೆ ಬಾಯ್ಬಿಟ್ಟಿದ್ದಾನೆ ಎನ್ನಲಾಗಿದೆ. ಸೇಡು ತೀರಿಸಿಕೊಳ್ಳುವುದಾಗಿ ಈ ಕೃತ್ಯ ಎಸಗಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.