ಸಹಾಯವಾಣಿಗೆ ಕರೆ ಮಾಡಿ ತನ್ನದೇ ಮದುವೆ ನಿಲ್ಲಿಸಿದ ಬಾಲಕಿ

•   Mon, Oct 24 2022 02:42:53 PM



• ಪುರುಲಿಯಾ (ಪಶ್ಚಿಮ ಬಂಗಾಳ), ಅ 24 (DaijiworldNews/DB): ಬಾಲಕಿಯೊಬ್ಬಳು ಮಕ್ಕಳ ಸಹಾಯವಾಣಿಗೆ ಕರೆ ಮಾಡಿ ತನ್ನದೇ ಮದುವೆಯನ್ನು ತಡೆದಿರುವ ಪ್ರಸಂಗ ಪಶ್ಚಿಮ ಬಂಗಾಳದ ಪುರುಲಿಯಾ ಜಿಲ್ಲೆಯ ಹಳ್ಳಿಯೊಂದರಲ್ಲಿ ನಡೆದಿದೆ. ಅಲ್ಲದೆ ನರ್ಸ್ ಆಗುವ ತನ್ನ ಕನಸನ್ನು ನನಸು ಮಾಡುವುದೇ ತನ್ನ ಉದ್ದೇಶ ಎಂದು ಹೇಳಿದ್ದಾಳೆ.

  15 ವರ್ಷದ ಬಾಲಕಿಗೆ ಆಕೆಯ ಪೋಷಕರು ಬಲವಂತವಾಗಿ ಮದುವೆ ಮಾಡಿಸಲು ಮುಂದಾಗಿದ್ದರು. ಇದನ್ನು ಅರಿತುಕೊಂಡ ಬಾಲಕಿ ಕೂಡಲೇ ಮಕ್ಕಳ ಸಹಾಯವಾಣಿ 1098ಗೆ ಕರೆ ಮಾಡಿ ತನಗೆ ಬಲವಂತದ ಮದುವೆ ಮಾಡಿಸುತ್ತಿರುವ ಬಗ್ಗೆ ದೂರಿತ್ತಿದ್ದಾಳೆ. ಅಲ್ಲದೆ ವಿದ್ಯಾಭ್ಯಾಸ ಮುಂದುವರಿಸಿ ನರ್ಸ್ ಆಗುವುದೇ ನನ್ನ ಕನಸು ಎಂದು ಹೇಳಿಕೊಂಡಿದ್ದಾಳೆ. ಇತ್ತ ಬಾಲಕಿಯ ಹೆಸರು, ವಿಳಾಸ ಮತ್ತಿತರ ಮಾಹಿತಿಗಳನ್ನು ಸಹಾಯವಾಣಿ ಸಿಬಂದಿ ಪಡೆದುಕೊಂಡಿದ್ದು, ಪೊಲೀಸರೊಂದಿಗೆ ಬಾಲಕಿ ಮನೆಗೆ ಭೇಟಿ ನೀಡಿದರು. ಅಲ್ಲದೆ ಆಕೆ ಅಪ್ರಾಪ್ತಳಾದ ಹಿನ್ನೆಲೆಯಲ್ಲಿ ಆಕೆಯನ್ನು ಮದುವೆ ಮಾಡಿಸದಂತೆ ಪೋಷಕರ ಮನವೊಲಿಸಿದ್ದಾರೆ.

  ಸಾಮಾಜಿಕ ಅನಿಷ್ಟಗಳ ಬಗ್ಗೆ ಜಾಗೃತಿ ಮೂಡಿಸುವ ಕನ್ಯಾಶ್ರೀ ಕ್ಲಬ್ ಸದಸ್ಯೆಯಾಗಿರುವ ಬಾಲಕಿಗೆ ಮದುವೆಯಾಗಲು 18 ವರ್ಷ ಕಾನೂನುಬದ್ದ ವಯಸ್ಸು ಎಂಬ ಅರಿವಿತ್ತು. ಅಲ್ಲದೆ ಯುನಿಸೆಫ್ ತರಬೇತುದಾರರಿಂದ ಮತ್ತು ಆಶಾ ಕಾರ್ಯಕರ್ತೆಯರಿಂದ ಬಾಲ್ಯವಿವಾಹದ ದುಷ್ಪರಿಣಾಮಗಳ ಬಗ್ಗೆ ತಿಳಿದಿದ್ದೇನೆ ಎಂದು ಆಕೆ ಹೇಳಿದ್ದಾಳೆ.