ಶ್ರೀಹರಿಕೋಟಾ, ಅ 23 (DaijiworldNews/DB): ಚಂದ್ರಯಾನ-3 ಮಿಷನ್ ಉಡಾವಣೆಗೆ ಬಹುತೇಕ ಸಿದ್ದತೆ ಪೂರ್ಣಗೊಂಡಿದ್ದು, ಮುಂದಿನ ಜೂನ್ ತಿಂಗಳಲ್ಲಿ ಉಡಾವಣೆಗೊಳ್ಳುವ ನಿರೀಕ್ಷೆಯಿದೆ ಎಂದು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಅಧ್ಯಕ್ಷ ಡಾ. ಎಸ್. ಸೋಮನಾಥ್ ಹೇಳಿದ್ದಾರೆ.
ಆಂಧ್ರಪ್ರದೇಶದ ಶ್ರೀಹರಿಕೋಟಾದಲ್ಲಿರುವ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ 36 ಸಂವಹನ ಉಪಗ್ರಹಗಳನ್ನು ಇಸ್ರೋದ ಅತ್ಯಂತ ಭಾರವಾದ ರಾಕೆಟ್, ಎಲ್ವಿಎಂ3-ಎಂ2/ಒನ್ವೆಬ್ ಇಂಡಿಯಾ-1 ಮೂಲಕ ಉಡಾವಣೆ ಮಾಡಿದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಭಾನುವಾರ ಮಾತನಾಡಿದ ಅವರು, ಚಂದ್ರಯಾನ-3 ಮಿಷನ್ ಉಡಾವಣೆಗೆ ಬೇಕಾದ ಅಂತಿಮ ಸಿದ್ದತೆಗಳಷ್ಟೇ ಬಾಕಿ ಇವೆ. ಇನ್ನೂ ಕೆಲವು ಪರೀಕ್ಷೆಗಳನ್ನು ನಡೆಸಲಾಗುತ್ತದೆ. ಫೆಬ್ರವರಿಯಲ್ಲಿ ಎರಡು ಸ್ಲಾಟ್ಗಳು ಮತ್ತು ಜೂನ್ನಲ್ಲಿ ಒಂದು ಸ್ಲಾಟ್ ಲಭ್ಯವಿದೆ. ಆ ಬಳಿಕ ಉಡಾವಣೆ ಮಾಡಲಾಗುತ್ತದೆ ಎಂದರು.
36 ಉಪಗ್ರಹಗಳ ಪೈಕಿ ಈಗಾಗಲೇ 16 ಉಪಗ್ರಹಗಳನ್ನು ಪ್ರತ್ಯೇಕಗೊಳಿಸಲಾಗಿದೆ. ಇನ್ನು 20 ಬಾಕಿ ಇದ್ದು, ಶೀಘ್ರ ಅವುಗಳನ್ನು ಪ್ರತ್ಯೇಕಗೊಳಿಸಲಾಗುವುದು. ಶೀಘ್ರ ಅದರ ಡೇಟಾವೂ ತಿಳಿಯಲಿದ್ದು, ವೀಕ್ಷಣೆ ಕಾರ್ಯಾಚರಣೆಯನ್ನು ನಿರ್ವಹಿಸಲಾಗುತ್ತಿದೆ ಎಂದು ತಿಳಿಸಿದರು.