ಖಾಸಗಿ ಅಂಗ ಕತ್ತರಿಸುವುದಾಗಿ ಹಾಸ್ಟೆಲ್ ವಿದ್ಯಾರ್ಥಿಗೆ ಸೀನಿಯರ್ಸ್ ಬೆದರಿಕೆ-ಇಬ್ಬರ ಬಂಧನ

•   Sun, Oct 23 2022 12:44:22 PM



• ಗುಜರಾತ್​​, ಅ 23 (DaijiworldNews/DB): ಹಾಸ್ಟೆಲ್‌ನಲ್ಲಿದ್ದ ವಿದ್ಯಾರ್ಥಿಗೆ ಹಿರಿಯ ವಿದ್ಯಾರ್ಥಿಗಳು ಲೈಂಗಿಕ ದೌರ್ಜನ್ಯ ನೀಡಿದ್ದಲ್ಲದೆ, ಖಾಸಗಿ ಅಂಗವನ್ನು ಕತ್ತರಿಸುವ ಬೆದರಿಕೆಯೊಡ್ಡಿದ ಘಟನೆ ಗುಜರಾತ್‌ನ ರಾಜಕೋಟ್​​ನಲ್ಲಿರುವ ಮಾರ್ವಾಡಿ ವಿಶ್ವವಿದ್ಯಾನಿಲಯದ ಹಾಸ್ಟೆಲ್‌ನಲ್ಲಿ ನಡೆದಿದೆ.

  ವಿದ್ಯಾರ್ಥಿ ತನ್ನ ಸಹೋದರಿಯೊಂದಿಗೆ ಫೋನ್‌ನಲ್ಲಿ ಮಾತನಾಡುತ್ತಾ, ನಾನು ಹಾಸ್ಟೆಲ್‌ನಲ್ಲಿರುವುದಿಲ್ಲ, ಮನೆಗೆ ಕರೆದುಕೊಂಡು ಹೋಗಿ ಎಂದು ಅತ್ತಿದ್ದಾನೆ. ಇದರಿಂದ ಅನುಮಾನಗೊಂಡ ಸಹೋದರಿ ತಂದೆಯೊಂದಿಗೆ ಹಾಸ್ಟೆಲ್‌ಗೆ ಬಂದಾಗ ವಿಷಯ ಗೊತ್ತಾಗಿದೆ. ಅದೇ ವಿವಿಯಲ್ಲಿ ಓದುತ್ತಿದ್ದ ಹಾಸ್ಟೆಲ್‌ನಲ್ಲಿದ್ದ ಹಿರಿಯ ವಿದ್ಯಾರ್ಥಿಗಳು ಈ ಹುಡುಗ ಸ್ನಾನ ಮಾಡುವ ವೀಡಿಯೋ ಚಿತ್ರೀಕರಿಸಿಕೊಂಡು ಬ್ಲಾಕ್‌ಮೇಲ್ ಮಾಡಲು ಆರಂಭಿಸಿದ್ದಾರೆ. ಅಲ್ಲದೆ ತಾವು ಹೇಳಿದಂತೆ ಕೇಳದಿದ್ದರೆ ವೀಡಿಯೋ ಲೀಕ್ ಮಾಡುವುದಾಗಿ ಬೆದರಿಕೆಯೊಡ್ಡಿದ್ದಾರೆ. ಹುಡುಗನ ಖಾಸಗಿ ಅಂಗಕ್ಕೆ ಸ್ಯಾನಿಟೈಸರ್‍, ಜೇನುತುಪ್ಪ ಸುರಿದು, ಟೂತ್‌ಬ್ರಷ್, ಪೆನ್ಸಿಲ್ ತುರುಕಿ ವಿಕೃತಿ ಮೆರೆದಿದ್ದರು. ಎಲ್ಲಾ ವಿಚಾರಗಳನ್ನು ಪೊಲೀಸರೆದುರು ವಿದ್ಯಾರ್ಥಿ ಹೇಳಿಕೊಂಡಿದ್ದು, ಐವರ ವಿರುದ್ದ ಪೊಲೀಸರು ದೂರು ದಾಖಲು ಮಾಡಿದ್ದಾರೆ. ಇಬ್ಬರನ್ನು ವಶಕ್ಕೆ ಪಡೆಯಲಾಗಿದೆ ಎಂದು ತಿಳಿದು ಬಂದಿದೆ.

  ಒಂದೋ ನೀನು ಹಾಸ್ಟೆಲ್‌ನ ಟೆರೇಸ್‌ನಿಂದ ಹಾರಬೇಕು, ಇಲ್ಲವಾದರೆ ಕಿವಿ ಕತ್ತರಿಸಲು ಬಿಡಬೇಕು. ಅದೂ ಆಗದಿದ್ದಲ್ಲಿ ನಿನ್ನ ಖಾಸಗಿ ಅಂಗ ಕತ್ತರಿಸುತ್ತೇವೆ ಎಂದು ಬೆದರಿಕೆ ಹಾಕಿದ್ದು, ಇದರಿಂದ ತೀವ್ರ ಭಯಗೊಂಡ ವಿದ್ಯಾರ್ಥಿ ಮನೆಗೆ ಕರೆದೊಯ್ಯಲು ಸಹೋದರಿಗೆ ಫೋನ್ ಮಾಡಿ ಅತ್ತಿದ್ದ ಎಂದು ಪೊಲೀಸರು ತಿಳಿಸಿರುವುದಾಗಿ ವದರಿಯಾಗಿದೆ.