ಬೆಂಗಳೂರು, ಅ 22 (DaijiworldNews/DB): ಹಾಫ್ ಹೆಲ್ಮೆಟ್ ಧರಿಸಿ ಸ್ಕೂಟರ್ ಓಡಿಸಿದ ಸಂಚಾರಿ ಪೊಲೀಸರೊಬ್ಬರಿಗೆ ಅದೇ ಇಲಾಖೆಯ ಇನ್ನೊಬ್ಬ ಸಂಚಾರಿ ಪೊಲೀಸ್ ದಂಡ ಹಾಕಿದ ಪ್ರಸಂಗ ಬೆಂಗಳೂರಿನಲ್ಲಿ ನಡೆದಿದೆ. ಈ ಫೋಟೋ ಇದೀಗ ಸಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಕಾನೂನು ಎಲ್ಲರಿಗೂ ಒಂದೇ ಎಂಬ ಸಂದೇಶ ಸಾರಿದೆ.
ಬೆಂಗಳೂರಿನ ಆರ್ಟಿ ನಗರದ ಸಂಚಾರಿ ಪೊಲೀಸ್ ಸಿಬಂದಿಯೊಬ್ಬರು ತಮ್ಮ ಸ್ಕೂಟರ್ನಲ್ಲಿ ಮುಖ್ಯ ರಸ್ತೆಯಲ್ಲಿ ಸಂಚರಿಸುತ್ತಿದ್ದರು. ಈ ವೇಳೆ ಅವರು ಇಲಾಖೆಯಿಂದ ನೀಡಿರುವ ಹಾಫ್ ಹೆಲ್ಮೆಟ್ ಧರಿಸಿರುವುದನ್ನು ಕರ್ತವ್ಯನಿರತ ಸಂಚಾರಿ ಪೊಲೀಸ್ ಗಮನಿಸಿದ್ದು, ಸ್ಕೂಟರ್ನ್ನು ತಡೆದು ನಿಲ್ಲಿಸಿದ್ದಾರೆ. ಬಳಿಕ ಹಾಫ್ ಹೆಲ್ಮೆಟ್ ಧರಿಸಿದ್ದಕ್ಕಾಗಿ ಸಂಚಾರಿ ಪೊಲೀಸ್ ಸಿಬಂದಿಗೆ ದಂಡ ಹಾಕಿದ್ದಾರೆ.
ಹಾಫ್ ಹೆಲ್ಮೆಟ್ ಧರಿಸಿದ ಸಂಚಾರಿ ಪೊಲೀಸ್ಗೆ ಮತ್ತೊಬ್ಬ ಸಂಚಾರಿ ಪೊಲೀಸ್ ದಂಡ ವಿಧಿಸುತ್ತಿರುವುದನ್ನು ಸಾರ್ವಜನಿಕರಾರೋ ಫೋಟೋ ತೆಗೆದುಕೊಂಡಿದ್ದು, ಅದನ್ನು ಸಾಮಾಜಿಕ ಜಾಲತಾಣದಲ್ಲಿ ಹರಿಯಬಿಟ್ಟಿದ್ದಾರೆ. ಇದೀಗ ಈ ಫೋಟೋ ಸಾಕಷ್ಟು ವೈರಲ್ ಆಗುತ್ತಿದ್ದು, ಕಾನೂನು ಎಲ್ಲರಿಗೂ ಒಂದೇ ಎಂಬ ಸಂದೇಶವನ್ನು ಸಾರಿದೆ.
ಇನ್ನು ಟ್ವಿಟರ್ನಲ್ಲಿ ಈ ಫೋಟೋಗೆ ಮಿಶ್ರ ಪ್ರತಿಕ್ರಿಯೆಗಳೂ ಬಂದಿವೆ. ಕೆಲವರು ದಂಡ ವಿಧಿಸಿದ ಪೊಲೀಸ್ ಕ್ರಮವನ್ನು ಸಮರ್ಥಿಸಿದರೆ ಇನ್ನು ಕೆಲವರು, ಮೊದಲು ದೋಷಪೂರಿತ ನಂಬರ್ ಪ್ಲೇಟ್, ಸೈಡ್ ಮಿರರ್ ಕಾಣೆ, ಇಯರ್ಫೋನ್ ಹಾಕಿಕೊಂಡು ವಾಹನ ಚಲಾಯಿಸುವುದು ಮುಂತಾದ ನಿಯಮ ಉಲ್ಲಂಘನೆಗಳ ಬಗ್ಗೆ ಗಮನ ಹರಿಸಿ ಎಂದು ಬರೆದುಕೊಂಡಿದ್ದಾರೆ.