ಡಾ.ಪದ್ಮಿನಿ ಪ್ರಸಾದ್ ಹೆಸರಿನಲ್ಲಿ ನಕಲಿ ಖಾತೆ ತೆರೆದು ಕಿರುಕುಳ - ಆರೋಪಿ ಸೆರೆ

•   Sat, Oct 22 2022 12:40:58 PM



• ಬೆಂಗಳೂರು, ಅ 22(DaijiworldNews/MS): ಖ್ಯಾತ ಲೈಂಗಿಕ ತಜ್ಞೆ ಪದ್ಮಿನಿ ಪ್ರಸಾದ್‌ ಹೆಸರಿನಲ್ಲಿ ನಕಲಿ ಫೇಸ್‌ಬುಕ್‌ ಖಾತೆಗೆ ತೆರೆದು ಮಹಿಳೆಯರಿಗೆ ಅಶ್ಲೀಲ ಫೋಟೋ ,ಧ್ವನಿ ಸಂದೇಶ ಹಾಗೂ ಚಿತ್ರಗಳನ್ನು ಕಳುಹಿಸುತ್ತಿದ್ದ ಆರೋಪಿಯನ್ನು ಬೆಂಗಳೂರು ಪೊಲೀಸರು ಬಂಧಿಸಿದ್ದಾರೆ.

  ದಾವಣಗೆರೆ ಕೆಂಚಿಕೊಪ್ಪದ ನಿವಾಸಿ ಜಗದೀಶ್‌ (32) ಬಂಧಿತ. ಈತ ನಿಂದ ಕೃತ್ಯಕ್ಕೆ ಬಳಸಿದ್ದ ಮೊಬೈಲ್‌ ಜಪ್ತಿ ಮಾಡಲಾಗಿದೆ.

  ಇದೇ ಹೆಸರಿನ ಫೇಸ್​​ಬುಕ್ ಖಾತೆಯಲ್ಲಿ ಮಹಿಳೆಯರ ಜೊತೆ ಅಸಭ್ಯವಾಗಿ ಚಾಟ್ ಮಾಡುತ್ತಿದ್ದನಂತೆ. ಅಲ್ಲದೇ ಅಶ್ಲೀಲ ಭಂಗಿಯ ಫೋಟೋ ಕಳುಹಿಸಿ ವಿಕೃತಿ ಮೆರೆದಿದ್ದಾನೆ. ಆರೋಪಿಯ ಬಲೆಯ ಸುಳಿಗೆ ಸಿಲುಕಿದ್ದ ಹಲವು ಮಹಿಳೆಯರಿಗೆ ಈ ಬಗ್ಗೆ ಅನುಮಾನ ಬಂದು ಪದ್ಮಿನಿ ಪ್ರಸಾದ್‌ ಅವರಿಗೆ ಈ ಸಂಗತಿ ತಿಳಿಸಿದ್ದರು. ಆತಂಕಗೊಂಡ ಪದ್ಮಿನಿ ಪ್ರಸಾದ್‌ ಉತ್ತರ ವಿಭಾಗದ ಸೈಬರ್‌ ಕ್ರೈಂ ಪೊಲೀಸ್‌ ಠಾಣೆಗೆ ಕಳೆದ ಫೆ.17ರಂದು ಈ ಕುರಿತು ದೂರು ನೀಡಿದ್ದರು

  ಈ ಬಗ್ಗೆ ಎಫ್ಐಆರ್‌ ದಾಖಲಿಸಿಕೊಂಡ ಉತ್ತರ ವಿಭಾಗದ ಪೊಲೀಸರು ತಾಂತ್ರಿಕ ಕಾರ್ಯಾಚರಣೆ ನಡೆಸಿ ಆರೋಪಿಯನ್ನು ಬಂಧಿಸಿದ್ದಾರೆ ಎಂದು ಡಿಸಿಪಿ ವಿನಾಯಕ್ ಪಾಟೀಲ್ ತಿಳಿಸಿದ್ದಾರೆ.