ಮೊಬೈಲ್ ಫೋನ್‌ಗಾಗಿ ರಕ್ತ ಮಾರಲು ಮುಂದಾದ ಬಾಲಕಿ!

•   Thu, Oct 20 2022 02:56:23 PM



• ಕೋಲ್ಕತ್ತಾ, ಅ 20 (DaijiworldNews/DB): ಆನ್‌ಲೈನ್‌ಲಿ ಆರ್ಡರ್ ಮಾಡಿದ ಮೊಬೈಲ್‌ಗೆ ಡೆಲಿವರಿ ಸಂದರ್ಭದಲ್ಲಿ ಹಣ ಪಾವತಿಸುವುದಕ್ಕಾಗಿ ಬಾಲಕಿಯೊಬ್ಬಳು ರಕ್ತವನ್ನೇ ಮಾರಲು ಮುಂದಾದ ಘಟನೆ ಪಶ್ಚಿಮ ಬಂಗಾಳದಲ್ಲಿ ನಡೆದಿದೆ.

  ಪಶ್ಚಿಮ ಬಂಗಾಳದ 16 ವರ್ಷದ ಬಾಲಕಿಯೊಬ್ಬಳು ತನ್ನ ಸ್ನೇಹಿತರ ಬಳಿಯಲ್ಲಿ ಮೊಬೈಲ್ ಇರುವ ಕಾರಣ ತನಗೂ ಬೇಕೆಂದು ಇಚ್ಚಿಸಿ ಸಂಬಂಧಿಯೊಬ್ಬರ ಮೊಬೈಲ್ ಮೂಲಕ ಅಕ್ಟೋಬರ್​ 16ರಂದು ಆನ್‌ಲೈನ್‌ನಲ್ಲಿ 9 ಸಾವಿರ ರೂ. ಬೆಲೆಯ ಸ್ಮಾರ್ಟ್‌ಫೋನ್ ಆರ್ಡರ್‍ ಮಾಡಿದ್ದಳು. ಅಕ್ಟೋಬರ್‍ 29ರೊಳಗೆ ಆರ್ಡರ್‍ ಮಾಡಿದ ಫೋನ್ ಡೆಲಿವರಿಯಾಗುವುದರಲ್ಲಿತ್ತು. ಆ ವೇಳೆಗಾಗಲೇ 9 ಸಾವಿರ ರೂ.ಗಳನ್ನು ಆಕೆ ಹೊಂದಿಸಬೇಕಿತ್ತು. ಆದರೆ ಕೈಯಲ್ಲಿ ಹಣವಿಲ್ಲದ ಕಾರಣ ಹಣ ಹೊಂದಿಸುವ ದಾರಿಯ ಬಗ್ಗೆ ಯೋಚಿಸಿದ ಆಕೆ ತನ್ನ ರಕ್ತವನ್ನೇ ಮಾರಲು ಮುಂದಾಗಿದ್ದಾಳೆ.

  ಅದರಂತೆ ಬಲೂರ್ಘಾಟ್​​ನಲ್ಲಿರುವ ಜಿಲ್ಲಾಸ್ಪತ್ರೆಗೆ ತೆರಳಿ ರಕ್ತ ನೀಡುತ್ತೇನೆ, ಅದಕ್ಕೆ ಹಣ ಕೊಡಬೇಕು ಎಂದು ಹೇಳಿದ್ದಾಳೆ. ಬಾಲಕಿಯ ಮಾತಿನಿಂದ ಹಣದ ಅವಶ್ಯಕತೆ ಬಗ್ಗೆ ವಿಚಾರಿಸಿದ ಆಸ್ಪತ್ರೆ ಸಿಬಂದಿ ಬಳಿ ಆಕೆ ತನ್ನ ಅಣ್ಣನಿಗೆ ಅಪಘಾತವಾಗಿದ್ದು, ಆತನ ಚಿಕಿತ್ಸೆಗೆ ಹಣಹೊಂದಿಸಬೇಕು. ಅದಕ್ಕಾಗಿ ರಕ್ತ ಮಾರಾಟ ಮಾಡುತ್ತಿದ್ದೇನೆ ಎಂದಿದ್ದಾಳೆ. ಆದರೆ ಆಕೆಯ ವರ್ತನೆಯಿಂದ ಅನುಮಾನಗೊಂಡ ಸಿಬಂದಿ ಮತ್ತಷ್ಟು ವಿಚಾರಿಸಿದಾಗ ಸತ್ಯ ಬಾಯ್ಬಿಟ್ಟಿದ್ದಾಳೆ.

  ಬಾಲಕಿ ಅನುಮಾನಾಸ್ಪದವಾಗಿ ವರ್ತಿಸಲು ಆರಂಭಿಸಿದಾಗ ಸಿಬಂದಿಗೆ ಆಕೆಯ ಮೇಲೆ ಅನುಮಾನ ಬಂದು ಮಕ್ಕಳ ಆರೈಕೆ ಕೇಂದ್ರದ ಸಿಬಂದಿಗೆ ಕರೆ ಮಾಡಿ ವಿಷಯ ತಿಳಿಸಿದ್ದಾರೆ. ಕೂಡಲೇ ಅಲ್ಲಿಗೆ ಆಗಮಿಸಿದ ಮಕ್ಕಳ ಆರೈಕೆ ಕೇಂದ್ರದ ಸದಸ್ಯೆ ರೀಟಾ ಮೆಹ್ತೋ ಬಾಲಕಿ ಬಳಿ ವಿಚಾರಿಸ ಬಳಿಕ ಕೌನ್ಸೆಲಿಂಗ್ ಮಾಡಿ ಮಾಹಿತಿ ಪಡೆದುಕೊಂಡಿದ್ದಾರೆ. ಈ ವೇಳೆ ಆಕೆ ನಿಜ ವಿಚಾರವನ್ನು ಹೇಳಿಕೊಂಡಿದ್ದು, ಬಳಿಕ ಆಕೆಗೆ ಬುದ್ದಿ ಹೇಳಿ ಪೋಷಕರಿಗೆ ಒಪ್ಪಿಸಲಾಯಿತು ಎಂದು ವರದಿಯಾಗಿದೆ.