ತಿಂಡಿ ಕದ್ದ ಅಮ್ಮನ ವಿರುದ್ದ ಪೊಲೀಸ್ ಠಾಣೆ ಮೆಟ್ಟಿಲೇರಿದ ಮೂರರ ಪೋರ!
Tue, Oct 18 2022 05:18:46 PM
ಬುರ್ಹಾನ್ಪುರ (ಮಧ್ಯಪ್ರದೇಶ), ಅ 18 (DaijiworldNews/DB): ಮೂರರ ಪೋರನೊಬ್ಬ ತನ್ನ ತಾಯಿ ತಿಂಡಿ ಕದ್ದು ಕೆನ್ನೆಗೆ ಹೊಡೆದದಕ್ಕಾಗಿ ಪೊಲೀಸ್ ಠಾಣೆ ಮೆಟ್ಟಿಲೇರಿ ಅಮ್ಮನ ವಿರುದ್ದ ದೂರು ನೀಡಿದ್ದಾನೆ!
ಮಧ್ಯಪ್ರದೇಶದ ಬುರ್ಹಾನ್ಪುರ ಜಿಲ್ಲೆಯ ದೆಡ್ತಲೈ ಗ್ರಾಮದ ಸದ್ಸಾಂ ಹೆಸರಿನ ಮೂರು ವರ್ಷದ ಮಗುವೊಂದು ತನ್ನ ತಂದೆಯನ್ನು ಕರೆದುಕೊಂಡು ಪೊಲೀಸ್ ಠಾಣೆಗೆ ತೆರಳಿದೆ. ಅಲ್ಲಿ ತನ್ನ ಮುಗ್ದ ಭಾಷೆಯಲ್ಲಿ ತಾಯಿ ನನ್ನ ಪಾಲಿನ ತಿಂಡಿ ಕದ್ದು, ನನ್ನ ಕೆನ್ನೆಗೆ ಹೊಡೆದಿದ್ದಾಳೆ ಎಂದು ಪೊಲೀಸರಿಗೆ ದೂರಿತ್ತಿದ್ದಾನೆ. ಅಲ್ಲದೆ ತಿಂಡಿ ಕದ್ದ ತಾಯಿಯನ್ನು ಜೈಲಿಗೆ ಹಾಕಬೇಕೆಂದೂ ಹೇಳಿದೆ. ಮಗುವಿನ ದೂರ ಕೇಳಿದ ಸಬ್ ಇನ್ಸ್ಪೆಕ್ಟರ್ ಪ್ರಿಯಾಂಕಾ ನಾಯಕ್ ಸಹಿತ ಎಲ್ಲಾ ಆರಕ್ಷಕರು ಬಿದ್ದೂ ಬಿದ್ದು ನಕ್ಕಿದ್ದಾರೆ. ಬಳಿಕ ಶೀಘ್ರ ನಿನ್ನ ಅಮ್ಮನನ್ನು ಜೈಲಿಗೆ ಕಳುಹಿಸುವುದಾಗಿ ಹೇಳಿ ಮಗುವಿನಿಂದ ಸಹಿ ಹಾಕಿಸಿಕೊಂಡು ಪೊಲೀಸರು ಆತನನ್ನು ಕಳುಹಿಸಿಕೊಟ್ಟಿದ್ದಾರೆ.
ಮಗುವಿನ ಮುಗ್ದತನದ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ವೀಡಿಯೋ ನೋಡಿದ ರಾಜ್ಯ ಗೃಹ ಸಚಿವ ನರೋತ್ತಮ್ ಮಿಶ್ರಾ ಮಗುವಿಗೆ ಕರೆ ಮಾಡಿ ಮಾತನಾಡಿದ್ದಾರೆ. ದೀಪಾವಳಿಯಂದು ಚಾಕೋಲೇಟ್ ಹಾಗೂ ಸೈಕಲ್ ಕಳುಹಿಸುವುದಾಗಿ ಮಗುವಿಗೆ ಭರವಸೆ ನೀಡಿದ್ದಾರೆ.