ಗೃಹ ಸಚಿವ ಅಮಿತ್ ಶಾ ಮನೆ ಆವರಣದಲ್ಲಿ ಐದಡಿ ಉದ್ದದ ಹಾವು!

•   Sat, Oct 15 2022 12:24:17 PM



• ನವದೆಹಲಿ, ಅ 15 (DaijiworldNews/DB): ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರ ಮನೆಯ ಆವರಣದಲ್ಲಿ ಐದು ಅಡಿ ಉದ್ದದ ಹಾವೊಂದು ಕಂಡು ಬಂದಿದ್ದು, ಇದರಿಂದ ಮನೆ ಮಂದಿ, ಭದ್ರತಾ ಸಿಬಂದಿ ಕೆಲ ಕಾಲ ಆತಂಕಕ್ಕೀಡಾದ ಪ್ರಸಂಗ ನಡೆಯಿತು.

  ಏಷ್ಯಾಟಿಕ್ ವಾಟರ್ ಸ್ನೇಕ್ ಎಂದು ಕರೆಯಲಾಗುವ ಐದು ಅಡಿ ಉದ್ದದ ಚೆಕ್ಕರ್ಡ್‌ ಕೀಲ್‌ಬ್ಯಾಕ್ ಹಾವು ಸಚಿವರ ಮನೆಯ ಆವರಣದಲ್ಲಿತ್ತು. ಬಳಿಕ ಈ ಬಗ್ಗೆ ಅಧಿಕಾರಿಗಳಿಗೆ ಮಾಹಿತಿ ನೀಡಿ ಹಾವನ್ನು ರಕ್ಷಿಸಲಾಯಿತು. ಇದು ಗುರುವಾರ ನಡೆದಿದೆ ಎಂದು ಹೇಳಲಾಗಿದೆ.

  ಭದ್ರತಾ ಸಿಬಂದಿಯ ಕಾವಲು ಕೊಠಡಿಯ ಬಳಿ ಹಾವು ಹರಿದಾಡುತ್ತಿತ್ತು. ಆದರೆ ಇದು ವಿಷಕಾರಿಯಾಗಿರಲಿಲ್ಲ. ವನ್ಯಜೀವ ರಕ್ಷಣೆ ಮತ್ತು ಸಂರಕ್ಷಣೆ ಕರ್ತವ್ಯ ನಿರ್ವಹಿಸುತ್ತಿರುವ ಎನ್‌ಜಿಒ ವನ್ಯಜೀವಿ ಎಸ್‌ಒಎಸ್‌ಗೆ ಮಾಹಿತಿ ನೀಡಿದ ಬಳಿಕ ರಕ್ಷಣಾ ಉಪಕರಣಗಳೊಂದಿಗೆ ಸಿಬಂದಿ ಆಗಮಿಸಿ ಹಾವನ್ನು ರಕ್ಷಣೆ ಮಾಡಿದರು. ಹಾವು ಕಾವಲು ಕೊಠಡಿಯ ಸುತ್ತ ಇರುವ ಮರದ ಫಲಕಗಳ ನಡುವೆ ಅವಿತಿತ್ತು.

  ಸಾಮಾನ್ಯವಾಗಿ ಸರೋವರ, ನದಿ, ಕೊಳ, ಚರಂಡಿ, ಕೃಷಿ ಭೂಮಿ, ಬಾವಿಯಂತಹ ಜಲಮೂಲ ಪ್ರದೇಶಗಳಲ್ಲಿ ಈ ಹಾವು ವಾಸಿಸುತ್ತದೆ ಎಂದು ತಿಳಿದು ಬಂದಿದೆ.