ನವದೆಹಲಿ, ಅ 14 (DaijiworldNews/DB): ಮದುವೆ ಎಂದರೇನು? ಎಂದು ಪರೀಕ್ಷೆಯಲ್ಲಿ ಕೇಳಲಾದ ಪ್ರಶ್ನೆಗೆ ವಿದ್ಯಾರ್ಥಿಯೊಬ್ಬ ಬರೆದ ಉತ್ತರ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ನೆಟ್ಟಿಗರನ್ನು ನಗೆಗಡಲಲ್ಲಿ ತೇಲಿಸಿದೆ.
ಆಂಗ್ಲ ಮಾಧ್ಯಮದ ಸಾಮಾಜಿಕ ಅಧ್ಯಯನ ವಿಭಾಗದ ಪ್ರಶ್ನೆ ಪತ್ರಿಕೆಯಲ್ಲಿ ಮದುವೆ ಎಂದರೇನು? ಎಂಬ ಪ್ರಶ್ನೆಯನ್ನು ಕೇಳಲಾಗಿದೆ. ಅದಕ್ಕೆ ವಿದ್ಯಾರ್ಥಿ ಬಹಳ ಆಲೋಚಿಸಿ ಉತ್ತರಿಸಿದ್ದಾನೆ. ಮನೆಯಲ್ಲಿ ಮಕ್ಕಳನ್ನು ತರಾಟೆಗೆ ತೆಗೆದುಕೊಳ್ಳಲು ತಮಾಷೆಗಾಗಿ ಬಳಸುವ ಪದಗಳನ್ನೇ ಗಂಭೀರವಾಗಿ ತೆಗೆದುಕೊಂಡು ವಿದ್ಯಾರ್ಥಿ ಉತ್ತರ ಬರೆದಿದ್ದಾನೆ. ನೀನೀಗ ದೊಡ್ಡವಳಾಗಿದ್ದು, ನಿನಗೆ ಊಟ ಹಾಕಲು ನಮಗೆ ಆಗುವುದಿಲ್ಲ. ಹೀಗಾಗಿ ಬೇರೆ ವ್ಯಕ್ತಿಯನ್ನು ನೀನು ಹುಡುಕಿಕೊ. ಆತ ನಿನಗೆ ಊಟ ಹಾಕುತ್ತಾನೆ ಮತ್ತು ನಿನ್ನನ್ನು ಸಲಹುತ್ತಾನೆ ಎಂದು ಯುವತಿಯ ಹೆತ್ತವರು ಹೇಳುತ್ತಾರೆ. ಹೀಗೆಯೇ ಯುವಕನ ಹೆತ್ತವರು ಕೂಡಾ ನೀನು ದೊಡ್ಡವನಾಗಿದ್ದು, ದಯವಿಟ್ಟು ಮದುವೆಯಾಗು ಎನ್ನುತ್ತಾರೆ. ಇಬ್ಬರ ಹೆತ್ತವರೂ ಹೀಗೆ ಹೇಳಿದ ಮೇಲೆ ಅವರಿಬ್ಬರ ನಡುವೆ ಮದುವೆಯಾಗುತ್ತದೆ. ಆನಂತರ ಇಬ್ಬರೂ ಒಟ್ಟಿಗೇ ಬಾಳಲು ಮುಂದಾಗುತ್ತಾರೆ. ಆಮೇಲೆ ಅವರು ಮಕ್ಕಳನ್ನು ಪಡೆಯಲು ಬಯಸಿ ಅದಕ್ಕಾಗಿ ತಪ್ಪು ಕೆಲಸಗಳನ್ನು ಮಾಡಲು ಆರಂಭಿಸುತ್ತಾರೆ ಎಂದು ವಿದ್ಯಾರ್ಥಿ ಇಂಗ್ಲಿಷ್ನಲ್ಲಿ ಬರೆದಿದ್ದಾನೆ.
ವಿದ್ಯಾರ್ಥಿಯ ಈ ಉತ್ತರದಿಂದ ಶಿಕ್ಷಕರೇ ಆಶ್ಚರ್ಯಚಕಿತರಾಗಿದ್ದು, ಈ ಉತ್ತರಕ್ಕೆ ಶೂನ್ಯ ಅಂಕ ನೀಡಿ ನಾನ್ಸೆನ್ಸ್ ಎಂದು ಬರೆದಿದ್ದಾರೆ. ಅಲ್ಲದೆ, ನನ್ನನ್ನು ಭೇಟಿಯಾಗು ಎಂದೂ ಬರೆದಿದ್ದಾರೆ. ಇನ್ನು ವಿದ್ಯಾರ್ಥಿಯು ಮದುವೆ ವಿಷಯವಾಗಿ ಬರೆದ ಈ ಫನ್ನೀ ಸಾಲುಗಳಿರುವ ಉತ್ತರ ಪತ್ರಿಕೆಯ ಫೋಟೋವನ್ನು ವೇಲು ಎಂಬ ಟ್ವಿಟರ್ ಬಳಕೆದಾರರೊಬ್ಬರು ತಮ್ಮ ಟ್ವಿಟರ್ನಲ್ಲಿ ಹಂಚಿಕೊಂಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಇದೀಗ ವೈರಲ್ ಆಗುತ್ತಿದೆ. ಆದರೆ ಇದು ಯಾವ ಶಾಲೆಯಲ್ಲಿ ನಡೆದಿರುವ ಪ್ರಸಂಗ ಎಂಬುದು ತಿಳಿದು ಬಂದಿಲ್ಲ.