ನವದೆಹಲಿ, ಅ 12 (DaijiworldNews/DB): ಜನಪ್ರಿಯ ಸಾಮಾಜಿಕ ಮಾಧ್ಯಮ ಫೇಸ್ಬುಕ್ನಲ್ಲಿ ಲಕ್ಷಾಂತರ ಮಂದಿ ಫಾಲೋವರ್ಸ್ಗಳನ್ನು ಹೊಂದಿದವರ ಫಾಲೋವರ್ಸ್ ಸಂಖ್ಯೆ ರಾತ್ರೋರಾತ್ರಿ ಕುಸಿತ ಕಂಡಿದ್ದು, 9 ಸಾವಿರದ ಆಸುಪಾಸಿಗೆ ತಲುಪಿದೆ. ಆದರೆ ಏಕಾಏಕಿ ಫಾಲೋವರ್ಸ್ ಸಂಖ್ಯೆಯಲ್ಲಿ ಈ ರೀತಿಯ ಕುಸಿತ ಆಗಿರುವುದು ಯಾಕೆಂದು ತಿಳಿದು ಬಂದಿಲ್ಲ.
ಫೇಸ್ಬುಕ್ ಸಂಸ್ಥಾಪಕ ಜುಕರ್ಬರ್ಗ್ ಅವರಿಗೂ ಈ ಸಮಸ್ಯೆ ಕಾಡಿದ್ದು, 100 ಮಿಲಿಯನ್ ಇದ್ದ ಅವರ ಫಾಲೋವರ್ಗಳ ಸಂಖ್ಯೆ ಬುಧವಾರ ಬೆಳಗ್ಗೆ 9993ಕ್ಕೆ ಇಳಿದಿತ್ತು. ಇನ್ನು ಲೇಖಕಿ ತಸ್ಲೀಮಾ ನಸ್ರೀನ್ ಅವರ 900,000 ಫಾಲೋವರ್ಸ್ಗಳನ್ನು ಫೇಸ್ಬುಕ್ ತೆಗೆದು ಹಾಕಿದ್ದು, 9 ಸಾವಿರದ ಸನಿಹದಲ್ಲಿ ಸದ್ಯ ಸಂಖ್ಯೆ ನಿಂತಿದೆ ಎಂಬುದಾಗಿ ಅವರು ಟ್ವೀಟ್ ಮಾಡಿದ್ದಾರೆ. ಇನ್ನು ಖ್ಯಾತನಾಮರಿಗಷ್ಟೇ ಅಲ್ಲದೆ, ಅಧಿಕ ಫಾಲೋವರ್ಸ್ಗಳನ್ನು ಹೊಂದಿದ ಬಹುತೇಕರಿಗೆ ಈ ಅನುಭವ ಆಗಿದೆ. ಈ ಬಗ್ಗೆ ಹಲವರು ಸಾಮಾಜಿಕ ಜಾಲತಾಣಗಳಲ್ಲಿ ಬರೆದುಕೊಂಡಿದ್ದಾರೆ. ಫಾಲೋವರ್ಸ್ ಸಂಖ್ಯೆ ಕುಸಿತವಾಗಿರುವ ಬಗ್ಗೆ ಹಲವಾರು ಟ್ರೋಲ್ಗಳು, ಮೆಮ್ಸ್ಗಳೂ ಹರಿದಾಡುತ್ತಿವೆ. ಫೇಸ್ಬುಕ್ ಪೇಜ್ನಲ್ಲಿ ಫಾಲೋವರ್ಸ್ ಸಂಖ್ಯೆ ಕಡಿಮೆಯಾಗಿರುವುದು ಕಂಡು ಬಂದರೂ, ಫಾಲೋವ್ಡ್ ಬೈ ಎಂಬಲ್ಲಿ ಕ್ಲಿಕ್ ಮಾಡಿದರೆ ಸರಿಯಾದ ಸಂಖ್ಯೆಯನ್ನೇ ತೋರಿಸುತ್ತಿದೆ. ಹೀಗಾಗಿ ಇದು ಫೇಸ್ಬುಕ್ ಸಂಸ್ಥೆ ತೆಗೆದು ಹಾಕಿರುವುದಲ್ಲ ಎಂಬುದು ಸ್ಪಷ್ಟವಾಗಿದೆ.
ಅಮೆರಿಕಾದಲ್ಲಿ ಕಳೆದೊಂದು ವಾರದಿಂದ ಫೇಸ್ಬುಕ್ನಲ್ಲಿ ಈ ಸಮಸ್ಯೆ ಆಗುತ್ತಿರುವ ಬಗ್ಗೆ ಜನ ಹೇಳಿಕೊಂಡಿದ್ದಾರೆ ಎಂದು ಅಮೆರಿಕಾ ಮೂಲದ ಮಾಧ್ಯಮಗಳು ವರದಿ ಮಾಡಿವೆ. ತಾಂತ್ರಿಕ ದೋಷದಿಂದ ಫಾಲೋವರ್ಸ್ಗಳ ಸಂಖ್ಯೆ ದಿಢೀರ್ ಕುಸಿತ ಆಗಿದೆ ಎನ್ನಲಾಗುತ್ತಿದೆ. ಆದರೆ ಫೇಸ್ಬುಕ್ ಸಂಸ್ಥೆಯ ಕಡೆಯಿಂದ ಈ ಬಗ್ಗೆ ಯಾವುದೇ ಮಾಹಿತಿಗಳು ಬಂದಿಲ್ಲ.