ಮೈಸೂರು, ಅ 10 (DaijiworldNews/DB): ವ್ಯಕ್ತಿಯೊಬ್ಬರು ಮನೆಯ ಅಂಗಳದಲ್ಲಿರಿಸಿದ್ದ ಶೂನಲ್ಲಿ ನಾಗರಹಾವು ಅವಿತು ಕುಳಿತ ಘಟನೆ ಮೈಸೂರಿನಲ್ಲಿ ನಡೆದಿದೆ. ಶೂ ಹಾಕಲು ಮುಂದಾದಾಗ ನಾಗರಹಾವು ಹೆಡೆ ಎತ್ತಿ ನಿಂತಿದೆ.
ಶೂನೊಳಗೆ ನಾಗರಹಾವು ಅವಿತಿರುವುದು ವ್ಯಕ್ತಿ ಸಹಿತ ಮನೆಯಲ್ಲಿ ಯಾರಿಗೂ ತಿಳಿದಿರಲಿಲ್ಲ. ವ್ಯಕ್ತಿ ಶೂ ಧರಿಸಲು ಕಾಲನ್ನು ಶೂ ಒಳಗೆ ಇಡಲು ನೋಡಿದಾಗ ಅದರೊಳಗಿದ್ದ ನಾಗರಹಾವು ಒಮ್ಮೆಲೆ ಹೊರ ಬಂದು ಹೆಡೆ ಎತ್ತಿದೆ. ಹಾವನ್ನು ನೋಡಿ ಭಯಗೊಂಡ ವ್ಯಕ್ತಿ ಕಿರುಚಿಕೊಂಡಿದ್ದಾರೆ. ಆತನ ಕಿರುಚಾಟ ಕೇಳಿ ಮನೆಯವರು ಹೊರಗೋಡಿ ಬಂದಾಗ ಹಾವು ಇರುವುದು ತಿಳಿದು ಆತಂಕಕ್ಕೊಳಗಾಗಿದ್ದಾರೆ.
ಕೂಡಲೇ ಹಾವು ಹಿಡಿಯುವವರನ್ನು ಮನೆಗೆ ಕರೆಸಿ ಸಲಾಕೆಯಿಂದ ಶೂನ್ನು ಸರಿಸಿದಾಗ ಹಾವು ಹೆಡೆ ಎತ್ತಿ ನಿಂತಿತು. ಬಳಿಕ ಅದನ್ನು ಹೊರ ತೆಗೆದು ಸುರಕ್ಷಿತವಾಗಿ ಪೆಟ್ಟಿಗೆಯಲ್ಲಿಟ್ಟು ಮುಚ್ಚಿದ್ದಾರೆ.