ಆಂಧ್ರಪ್ರದೇಶ, ಅ 08 (DaijiworldNews/DB): ವಿಜಯವಾಡದ ಎನ್ಟಿಆರ್ ಆರೋಗ್ಯ ವಿಶ್ವವಿದ್ಯಾಲಯದ ಹೆಸರು ಬದಲಾವಣೆ ವಿವಾದದ ನಡುವೆ ಜಗನ್ ಮೋಹನ್ ರೆಡ್ಡಿ ನೇತೃತ್ವದ ಆಂಧ್ರಪ್ರದೇಶ ಸರ್ಕಾರ ವಿಜಯನಗರ ಜಿಲ್ಲಾ ಮಹಾರಾಜ ಆಸ್ಪತ್ರೆ ಹೆಸರನ್ನು ಜಿಲ್ಲಾ ಜನರಲ್ ಆಸ್ಪತ್ರೆಯಾಗಿ ಬದಲಾಯಿಸಿ ಮತ್ತೊಂದು ವಿವಾದವನ್ನು ಮೈಗೆಳೆದುಕೊಂಡಿದೆ.
ವಿಜಯನಗರ ಜಿಲ್ಲಾ ಮಹಾರಾಜ ಆಸ್ಪತ್ರೆಗೆ ಸುದೀರ್ಘ ಇತಿಹಾಸವಿದ್ದು, ಇದೀಗ ಇದರ ಹೆಸರನ್ನು ರಾತ್ರೋರಾತ್ರಿ ಬದಲಾಯಿಸಲಾಗಿದೆ. ಹಳೆ ಬೋರ್ಡ್ ತೆಗೆದು ಹೊಸ ಹೆಸರುಳ್ಳ ಇನ್ನೊಂದು ಬೋರ್ಡ್ ಅಳವಡಿಸಲಾಗಿದೆ. ಇದು ಸ್ಥಳೀಯರ ಕೆಂಗಣ್ಣಿಗೆ ಗುರಿಯಾಗಿದ್ದು, ಕೂಡಲೇ ಸರ್ಕಾರ ಈ ನಿರ್ಧಾರ ಹಿಂಪಡೆಯಬೇಕು ಎಂದು ಆಗ್ರಹಿಸಿದ್ದಾರೆ.
ಇನ್ನು ಮಹಾರಾಜ ಆಸ್ಪತ್ರೆ ಹೆಸರನ್ನು ಜಿಲ್ಲಾ ಜನರಲ್ ಆಸ್ಪತ್ರೆ ಎಂಬುದಾಗಿ ಬದಲಾಯಿಸಿರುವ ಜಗನ್ ಸರ್ಕಾರದ ವಿರುದ್ಧ ಟಿಡಿಪಿ ನಾಯಕರು ಕೂಡಾ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ರಾತ್ರೋರಾತ್ರಿ ಹೆಸರು ಬದಲಾವಣೆ ಮಾಡಿರುವ ಕ್ರಮ ಸಮಂಜಸವಲ್ಲ. ಬೆಳಗ್ಗೆ ಆಸ್ಪತ್ರೆಗೆ ಹೋದ ರೋಗಿಗಳಿಗೆ ಇದೇನಾ ಆಸ್ಪತ್ರೆ ಎಂಬ ಸಂಶಯ ಬರುವಂತೆ ಆಗಿದೆ. ಸರ್ಕಾರದ ಈ ನಡೆ ಜನರು ಮತ್ತು ಮಹಾರಾಜರ ವಂಶಕ್ಕೆ ಮಾಡಿದ ಅವಮಾನವಾಗಿದೆ ಎಂದು ಟಡಿಪಿ ನಾಯಕರು ಆಕ್ರೋಶಗೊಂಡರು.