'ಮುಂದಿನ ವರ್ಷ ಮಹಿಳಾ ಅಗ್ನಿವೀರರ ನೇಮಕಾತಿ'- ಏರ್ ಚೀಫ್ ಮಾರ್ಷಲ್

•   Sat, Oct 08 2022 12:45:35 PM



• ಚಂಡೀಗಢ, ಅ 08 (DaijiworldNews/DB): ಭಾರತೀಯ ವಾಯುಪಡೆಗೆ ಮುಂದಿನ ವರ್ಷ ಮಹಿಳಾ ಅಗ್ನಿವೀರರನ್ನು ನೇಮಕ ಮಾಡಿಕೊಳ್ಳಲಾಗುವುದು ಎಂದು ಐಎಎಫ್ ಮುಖ್ಯಸ್ಥ ಏರ್ ಚೀಫ್ ಮಾರ್ಷಲ್ ವಿವೇಕ್ ರಾಮ್ ಚೌಧರಿ ಶನಿವಾರ ಘೋಷಣೆ ಮಾಡಿದ್ದಾರೆ.

  ಭಾರತೀಯ ವಾಯುಪಡೆಯ 90ನೇ ಸಂಸ್ಥಾಪನಾ ದಿನಾಚರಣೆಯ ಪ್ರಯುಕ್ತ ಚಂಡೀಗಢದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಅಗ್ನಿವೀರರಾಗಿ ಮಹಿಳೆಯರೂ ಗುರುತಿಸಿಕೊಳ್ಳಬೇಕು. ಇದಕ್ಕಾಗಿ ಅವರಿಗೆ ಅವಕಾಶ ಕಲ್ಪಿಸಲಾಗುತ್ತಿದೆ ಎಂದರು.

  ಭಾರತೀಯ ವಾಯುಪಡೆಯ ಅಧಿಕಾರಿಗಳಿಗಾಗಿ 'ವೆಪನ್ ಸಿಸ್ಟಂ ಬ್ರಾಂಚ್' ತೆರೆಯಲು ಕೇಂದ್ರ ಸರ್ಕಾರ ಅನುಮೋದನೆ ನೀಡಿದ್ದು, ಸ್ವಾತಂತ್ರ್ಯದ ನಂತರ ವಾಯುಪಡೆಯಲ್ಲಿ ಇದು ಹೊಸ ಕಾರ್ಯಾಚರಣೆಯ ಶಾಖೆಯಾಗಿದೆ. ಇದರಿಂದ ಫ್ಲೈಯಿಂಗ್ ತರಬೇತಿಯಲ್ಲಿ ವೆಚ್ಚದಲ್ಲಿ ನಿಯಂತ್ರಣ ಸಾಧಿಸಲು ಸಾಧ್ಯವಾಗುತ್ತದೆ. ಈಗಿನ ವೆಚ್ಚಕ್ಕೆ ಹೋಲಿಸಿದರೆ ವೆಪನ್ ಸಿಸ್ಟಂ ಬ್ರಾಂಚ್‌ನಿಂದ 3,400 ಕೋಟಿ ರೂ. ಉಳಿತಾಯವಾಗಲಿದೆ ಎಂದು ತಿಳಿಸಿದರು.

  ಮೇಲ್ಮೈಯಿಂದ ಮೇಲ್ಮೈಗೆ ಹಾರುವ ಕ್ಷಿಪಣಿಗಳು, ಮೇಲ್ಮೈಯಿಂದ ಗಾಳಿಗೆ ಚಿಮ್ಮುವ ಕ್ಷಿಪಣಿಗಳು, ಪೈಲಟ್ ರಹಿತ ಯುದ್ಧ ವಿಮಾನಗಳು ಮತ್ತು ಅವಳಿ ಹಾಗೂ ಬಹು ಸಿಬಂದಿ ಯುದ್ಧ ವಿಮಾನಗಳಲ್ಲಿ ಶಸ್ತ್ರಾಸ್ತ್ರ ವ್ಯವಸ್ಥೆ ನಿರ್ವಹಣೆಗಳ ಕಾರ್ಯಾಚರಣೆ ವೆಪನ್ ಸಿಸ್ಟಂ ಬ್ರಾಂಚ್ ಮೂಲಕ ನಡೆಯಲಿದೆ ಎಂದವರು ವಿವರಿಸಿದರು.