'ಪಾಕ್‌ ಡ್ರೋನ್‌ಗಳ ಮೇಲೆ ಹದ್ದಿನ ಕಣ್ಣಿಡಿ'-ಬಿಎಸ್‌ಎಫ್‌ಗೆ ಅಮಿತ್ ಶಾ ಸೂಚನೆ

•   Sat, Oct 08 2022 12:11:32 PM



• ಜಮ್ಮು ಮತ್ತು ಕಾಶ್ಮೀರ, ಅ 08 (DaijiworldNews/DB): ಪಾಕ್‌ ಕಡೆಯಿಂದ ಬರುವ ಎಲ್ಲಾ ಡ್ರೋನ್‌ಗಳ ಮೇಲೆ ಹದ್ದಿನ ಕಣ್ಣಿಡುವಂತೆ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಬಿಎಸ್‌ಎಫ್‌ಗೆ ನಿರ್ದೇಶಿಸಿದ್ದಾರೆ.

  ಡ್ರೋನ್‌ಗಳ ಮೂಲಕ ಪಾಕ್‌ ಗಡಿಯಿಂದ ಶಸ್ತ್ರಾಸ್ತ್ರ ಹಾಗೂ ಹೆರಾಯಿನ್ ಕಳುಹಿಸುತ್ತಿರುವ ಪ್ರಕರಣಗಳು ಘಟಿಸುತ್ತಿರುವ ಬೆನ್ನಲ್ಲೇ ಅಮಿತ್ ಶಾ ಈ ನಿರ್ದೇಶನ ನೀಡಿದ್ದಾರೆ. ಕಳೆದ ವರ್ಷ 15ಕ್ಕೂ ಹೆಚ್ಚು ಸ್ಪೋಟಕಗಳು ಮತ್ತು ಮಾದಕ ವಸ್ತುಗಳ ಕಳ್ಳಸಾಗಾಣೆ ಪ್ರಯತ್ನಗಳನ್ನು ನಡೆದಿವೆ ಎಂದು ಗೃಹ ಇಲಾಖೆ ಇದೇ ವೇಳೆ ಕಳವಳ ವ್ಯಕ್ತಪಡಿಸಿದೆ.

  ಡ್ರೋನ್‌ ಕಾರ್ಯಾಚರಣೆ ಮೂಲಕ ಕಣಿವೆ ರಾಜ್ಯದಲ್ಲಿ ಭಯೋತ್ಪಾದನಾ ಚಟುವಟಿಕೆ ಹೆಚ್ಚಿಸಲು ಪಾಕ್ ಪ್ರಯತ್ನ ನಡೆಸುತ್ತಿದೆ. ಹೀಗಾಗಿ ಶಸ್ತ್ರಾಸ್ತ್ರ, ಸ್ಪೋಟಕ, ಮಾದಕ ವಸ್ತುಗಳನ್ನು ಕಳುಹಿಸಲು ಆ ದೇಶ ಪ್ರಯತ್ನಿಸುತ್ತಿದೆ. ಲಷ್ಕರ್-ಎ-ತೊಯ್ಬಾ ಸಂಘಟನೆ ಇದರ ಹಿಂದಿದೆ ಎಂದು ಜಮ್ಮು ಮತ್ತು ಕಾಶ್ಮೀರ ಪೊಲೀಸರು ಹೇಳಿರುವುದಾಗಿ ವರದಿಯಾಗಿದೆ.

  2021ರಲ್ಲಿ ಸಾಂಬಾದಲ್ಲಿ ಐದು, ಜಮ್ಮುವಿನಲ್ಲಿ ಆರು ಮತ್ತು ರಾಜೌರಿ ಸೆಕ್ಟರ್‌ನಲ್ಲಿ ಒಂದು ಡ್ರೋನ್‌ಗಳನ್ನು ಸೆರೆ ಹಿಡಿಯಲಾಗಿದೆ. 15ಕ್ಕೂ ಹೆಚ್ಚು ಡ್ರೋನ್‌ಗಳನ್ನು ಗಡಿ ಭದ್ರತಾ ಪಡೆ ತಡೆಹಿಡಿದಿತ್ತು. ಇವೆಲ್ಲವೂ ಪಾಕ್‌ನಿಂದ ಕಳುಹಿಸಲ್ಪಟ್ಟವೇ ಆಗಿದ್ದವು. ಇದರಲ್ಲಿ 7 ಎಕೆ ಸರಣಿ ರೈಫಲ್‌ಗಳು, 27 ಪಿಸ್ತೂಲ್‌ಗಳು, 25 ಹೆಚ್ಚಿನ ಸಾಮರ್ಥ್ಯದ ಸ್ಫೋಟಕ ಗ್ರೆನೇಡ್‌ಗಳು ಮತ್ತು 22 ಇತರ ಸ್ಫೋಟಕಗಳನ್ನು ವಶಪಡಿಸಿಕೊಳ್ಳಲಾಗಿತ್ತು.