ನೆಚ್ಚಿನ ಯೂಟ್ಯೂಬರ್ ಭೇಟಿಯಾಗಲು 250 ಕಿಮೀ ಸೈಕಲ್‌ ತುಳಿದ ಬಾಲಕ!

•   Sat, Oct 08 2022 11:41:21 AM



• ನವದೆಹಲಿ, ಅ 08 (DaijiworldNews/DB): ನೆಚ್ಚಿನ ಯೂಟ್ಯೂಬರ್‌ನನ್ನು ಭೇಟಿಯಾಗಲು ಬಾಲಕನೊಬ್ಬ ಮನೆಯಲ್ಲಿಹೇಳದೇ ಸೈಕಲ್‌ನಲ್ಲೇ 250 ಕಿಲೋಮೀಟರ್ ಸಂಚರಿಸಿದ್ದಾನೆ. ಆದರೆ ಕೊನೆಗೆ ಯೂಟ್ಯೂಬರ್‌ನನ್ನು ನೋಡಲಾಗದೆ ನಿರಾಶೆಗೊಂಡಿದ್ದಾನೆ.

  ಪಂಜಾಬ್‌ನ ಪಟಿಯಾಲದ 13 ವರ್ಷದ ಬಾಲಕ ಸುಮಾರು 1.7 ಕೋಟಿ ಚಂದಾದಾರರನ್ನು ಹೊಂದಿರುವ ‘ಟ್ರಿಗ್ಗರ್ಡ್ ಇನ್ಸಾನ್’ ಹಾಸ್ಯ ಯೂಟ್ಯೂಬ್ ಚಾನೆಲ್‌ನ ಯೂಟ್ಯೂಬರ್ ನಿಶ್ಚಯ್ ಮಲ್ಹಾನ್‌ನನ್ನು ಭೇಟಿಯಾಗಲು ದೂರದ ದೆಹಲಿಗೆ ಬಂದಾತ. ಬಾಲಕ ಮನೆಯಲ್ಲಿ ಹೇಳದೇ ಪಟಿಯಾಲದಿಂದ 250 ಕಿಲೋಮೀಟರ್ ದೂರದಲ್ಲಿರುವ ದೆಹಲಿಗೆ ಸೈಕಲ್ ತುಳಿದುಕೊಂಡೇ ಬಂದಿದ್ದಾನೆ. ಮೂರು ದಿನಗಳ ಸಂಚಾರದ ಬಳಿಕ ಯೂಟ್ಯೂಬರ್‌ನ ಅಪಾರ್ಟ್‌ಮೆಂಟ್‌ಗೆ ತೆರಳಿದ್ದಾನೆ. ಆದರೆ ಅಲ್ಲಿ ಆತನಿಗೆ ನಿರಾಸೆಯಾಗಿದೆ. ಕಾರಣ ಯೂಟ್ಯೂಬರ್‌ ಆ ವೇಳೆ ದುಬೈಗೆ ಪ್ರಯಾಣಿಸಿದ್ದ.

  ಇತ್ತ ಬಾಲಕ ನಾಪತ್ತೆಯಾಗಿರುವುದು ಮನೆಯವರ ನಿದ್ದೆಗೆಡಿಸಿದೆ. ಕೂಡಲೇ ಶಾಲೆಗೆ ಹೋದ ಬಾಲಕ ಮನೆಗೆ ಮರಳಿದಿರುವ ಬಗ್ಗೆ ಸ್ಥಳೀಯ ಪೊಲೀಸ್ ಠಾಣೆಗೆ ಪೋಷಕರು ದೂರು ನೀಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಶಾಲೆಗೆ ಹೋಗುವ ದಾರಿಯಲ್ಲಿನ ಸಿಸಿಟಿವಿ ಪರಿಶೀಲಿಸಿದಾಗ ಆತ ಶಾಲೆಗೆ ಹೋಗದಿರುವುದು ಗೊತ್ತಾಗಿದೆ. ಬಳಿಕ ಆತ ತೆರಳಿದ ದಾರಿಯನ್ನು ಪತ್ತೆ ಹಚ್ಚಿ ಸಿಸಿಟಿವಿಗಳನ್ನು ಪರಿಶೀಲಿಸಿದಾಗ ಆತ ದೆಹಲಿಯತ್ತ ತೆರಳಿರುವುದು ಕಂಡು ಬಂದಿದೆ. ಆನಂತರ ದೆಹಲಿ ಪೊಲೀಸರಿಗೆ ಮಾಹಿತಿ ನೀಡಿ ಪೋಷಕರನ್ನು ಕರೆದುಕೊಂಡು ಪೊಲೀಸರ ತಂಡ ದೆಹಲಿಗೆ ತೆರಳಿದೆ. ಆ ವೇಳೆಗಾಗಲೇ ದೆಹಲಿ ಪೊಲೀಸರು ಬಾಲಕನನ್ನು ಯೂಟ್ಯೂಬರ್‌ನ ಅಪಾರ್ಟ್‌ಮೆಂಟ್ ಬಳಿ ಪತ್ತೆ ಹಚ್ಚಿದ್ದಾರೆ.

  ಆತನಲ್ಲಿ ವಿಚಾರಿಸಿದಾಗ ತಾನು ‘ಟ್ರಿಗ್ಗರ್ಡ್ ಇನ್ಸಾನ್’ ಯೂಟ್ಯೂಬರ್ ಅಭಿಮಾನಿಯಾಗಿದ್ದು, ಆತನನ್ನು ಭೇಟಿಯಾಗಲು ದೆಹಲಿಗೆ ಬಂದಿದ್ದೇನೆ ಎಂದಿದ್ದಾನೆ. ಕೊನೆಗೆ ಬಾಲಕನಿಗೆ ಬುದ್ದಿ ಹೇಳಿ ದೆಹಲಿ ಪೊಲೀಸರು ಪಟಿಯಾಲ ಪೊಲೀಸರ ಸಮ್ಮುಖದಲ್ಲಿ ಬಾಲಕನನ್ನು ಪೋಷಕರಿಗೆ ಹಸ್ತಾಂತರಿಸಿದ್ದಾರೆ ಎಂದು ವರದಿಯಾಗಿದೆ.