ಹಣ್ಣು ಆಮದು ನೆಪದಲ್ಲಿ 1,476 ಕೋಟಿ ರೂ. ಮೌಲ್ಯದ ಡ್ರಗ್ಸ್ ಕಳ್ಳಸಾಗಣೆ

•   Wed, Oct 05 2022 01:19:50 PM



• ಮುಂಬೈ, ಅ 05 (DaijiworldNews/MS): ಮಹಾರಾಷ್ಟ್ರದಲ್ಲಿ ಮಾದಕ ವಸ್ತು ಕಳ್ಳಸಾಗಣೆ ಘಟನೆಗೆ ಸಂಬಂಧಿಸಿದಂತೆ ಕೇರಳದ ಉದ್ಯಮಿಯೊಬ್ಬರನ್ನು ಕಂದಾಯ ಗುಪ್ತಚರ ನಿರ್ದೇಶನಾಲಯ (ಡಿಆರ್‌ಐ) ಭಾನುವಾರ ಬಂಧಿಸಿದೆ.

  ಬಂಧಿತನನ್ನು ಎರ್ನಾಕುಲಂನ ಕಾಲಡಿ ಮೂಲದ ಯಮ್ಮಿಟ್ಟೋ ಇಂಟರ್‌ನ್ಯಾಶನಲ್ ಫುಡ್ಸ್ ಪ್ರೈವೇಟ್ ಲಿಮಿಟೆಡ್‌ನ ವ್ಯವಸ್ಥಾಪಕ ನಿರ್ದೇಶಕ ವಿಜಿನ್ ವರ್ಗೀಸ್ ಎಂದು ಗುರುತಿಸಲಾಗಿದೆ. ಘಟನೆಗೆ ಸಂಬಂಧಿಸಿದಂತೆ ಮೋರ್ ಫ್ರೆಶ್ ಎಕ್ಸ್‌ಪೋರ್ಟ್ಸ್ ಎಸ್‌ಎ ಪ್ರೈವೇಟ್ ಲಿಮಿಟೆಡ್‌ನ ಮಾಲೀಕ ಮನ್ಸೂರ್ ಥಾಚಪರ್ಮಬನ್ ಮತ್ತೊಬ್ಬ ಆರೋಪಿ ಪತ್ತೆಗೆ ಶೋಧ ಕಾರ್ಯಾಚರಣೆ ನಡೆಯುತ್ತಿದೆ.

  ವರದಿಯ ಪ್ರಕಾರ, ಡಿಆರ್‌ಐ ಅಧಿಕಾರಿಗಳು ಮಹಾರಾಷ್ಟ್ರದ ವಾಶಿಯಲ್ಲಿ ನಡೆಸಿದ ಕಾರ್ಯಾಚರಣೆಯಲ್ಲಿ 1,476 ಕೋಟಿ ರೂ. ಮೌಲ್ಯದ 198 ಕೆಜಿ ಮೆಥಾಂಫೆಟಮೈನ್ ಮತ್ತು 9 ಕೆಜಿ ಕೊಕೇನ್ ಅನ್ನು ವಶಪಡಿಸಿಕೊಂಡಿದ್ದಾರೆ.

  ಮುಂಬೈ ಬಂದರಿನ ಮೂಲಕ ಹಣ್ಣು ಆಮದು ಮಾಡಿಕೊಳ್ಳುವ ನೆಪದಲ್ಲಿ ಡ್ರಗ್ಸ್ ಕಳ್ಳಸಾಗಣೆ ಮಾಡುವ ದಂಧೆ ಮಾಡುತ್ತಿದ್ದರು.

  ಅಧಿಕಾರಿಗಳ ಪ್ರಕಾರ, ಕೊವೀಡ್ ಸಾಂಕ್ರಾಮಿಕ ಸಮಯದಲ್ಲಿ, ವಿಜಿನ್ ಮನ್ಸೂರ್ ಅವರ ಸಹಾಯದಿಂದ ದುಬೈಗೆ ಮಾಸ್ಕ್ ಗಳನ್ನು ರಫ್ತು ಮಾಡಿತ್ತು. ಆ ಬಳಿಕ ಅವರು ದಕ್ಷಿಣ ಆಫ್ರಿಕಾದಿಂದ ಕಿತ್ತಳೆ ಆಮದು ಮಾಡಿಕೊಳ್ಳುವ ಮೂಲಕ ಭಾರಿ ಲಾಭ ಗಳಿಸಿದ್ದರು.

  ಇವರು ವಾಟ್ಸಾಪ್ ಮೂಲಕ ಡ್ರಗ್ಸ್ ಆರ್ಡರ್ ಮಾಡುತ್ತಿದ್ದರು ಎನ್ನಲಾಗಿದೆ. ಈ ಅವ್ಯವಹಾರದಲ್ಲಿ ಶೇ 70ರಷ್ಟು ಲಾಭವನ್ನು ವಿಜಿನ್ ಇಟ್ಟುಕೊಂಡಿದ್ದರೆ, ಉಳಿದ ಶೇ 30ರಷ್ಟು ಮನ್ಸೂರ್ ತೆಗೆದುಕೊಳ್ಳುತ್ತಿದ್ದ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

  ವಿಚಾರಣೆ ವೇಳೆ ವಿಜಿನ್, ತನ್ನನ್ನು ಈ ಪ್ರಕರಣದಲ್ಲಿ ಬಲಿಪಶು ಮಾಡಲಾಗಿದ್ದು ತಾನು ಯಾವುದೇ ಕಳ್ಳಸಾಗಣೆಯಲ್ಲಿ ಭಾಗಿಯಾಗಿಲ್ಲ ಎಂದು ಡಿಆರ್‌ಐ ಅಧಿಕಾರಿಗಳಿಗೆ ತಿಳಿಸಿದ್ದಾನೆ ಎಂದು ಹೇಳಲಾಗಿದೆ