ಜೆಇಇ ಮೇನ್ 2021 ಪ್ರಶ್ನೆ ಪತ್ರಿಕೆ ಸೋರಿಕೆ ಪ್ರಕರಣ-ರಷ್ಯಾ ಪ್ರಜೆ ಸಿಬಿಐ ಕಸ್ಟಡಿಗೆ

•   Tue, Oct 04 2022 05:13:09 PM



• ನವದೆಹಲಿ, ಅ 04 (DaijiworldNews/DB): ಜೆಇಇ ಮೇನ್ 2021 ಪ್ರಶ್ನೆ ಪತ್ರಿಕೆ ಸೋರಿಕೆ ಪ್ರಕರಣ ಸಂಬಂಧಿಸಿ ರಷ್ಯಾದ ಪ್ರಜೆಯನ್ನು ಎರಡು ದಿನಗಳ ಕಾಲ ಸಿಬಿಐ ಕಸ್ಟಡಿಗೆ ವಹಿಸಿ ದೆಹಲಿ ನ್ಯಾಯಾಲಯ ಮಂಗಳವಾರ ಆದೇಶಿಸಿದೆ.

  ಮಿಖಾಯಿಲ್ ಶರ್ಗಿನ್ ಬಂಧಿತ. ಕಜಕಿಸ್ತಾನದ ಅಲ್ಮಾಟಿಯಿಂದ ವಿಚಾರಣೆಗಾಗಿ ಆಗಮಿಸಿದ್ದ ರಷ್ಯಾ ಪ್ರಜೆಯನ್ನು ಅಕ್ಟೋಬರ್ 3 ರಂದು ಇಂದಿರಾ ಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಸಿಬಿಐ ಬಂಧಿಸಿತ್ತು. ಸಿಬಿಐ ಹೊರಡಿಸಿದ ಲುಕ್ ಔಟ್ ಸುತ್ತೋಲೆ ಆಧಾರದಲ್ಲಿ ಈ ಬಂಧನ ನಡೆದಿತ್ತು ಎಂದು ಸುದ್ದಿಸಂಸ್ಥೆಯೊಂದು ವರದಿ ಮಾಡಿದೆ.

  ಪ್ರಶ್ನೆ ಪತ್ರಿಕೆ ಸೋರಿಕೆ ಪ್ರಕರಣವು ಸುಮಾರು ಒಂದು ವರ್ಷದ ಹಿಂದಿನ ಪ್ರಕರಣವಾಗಿದೆ. ಬಂಧಿತ ಮಿಖಾಯಿಲ್ ಶರ್ಗಿನ್ ಸಾಫ್ಟ್‌ವೇರ್‌ನ್ನು ಹ್ಯಾಕ್‌ ಮಾಡಲು ಇತರ ಆರೋಪಿಗಳಿಗೆ ಸಹಾಯ ಮಾಡಿದ್ದಾರೆ ಎಂಬ ಶಂಕೆಯ ಮೇರೆಗೆ ಅವರ ವಿರುದ್ದ ಪ್ರಕರಣ ದಾಖಲಾಗಿತ್ತು. ತನಿಖೆ ವೇಳೆ ವಿದೇಶದ ಹಲವು ಮಂದಿ ಜೆಇಇ ಮೈನ್ ಮತ್ತು ಇತರ ಆನ್‌ಲೈನ್ ಪರೀಕ್ಷೆ ಸಂಬಂಧಿಸಿದ ಅಕ್ರಮಗಳಲ್ಲಿ ಭಾಗಿಯಾಗಿದ್ದರು ಎಂದು ತಿಳಿದು ಬಂದಿದೆ ಎನ್ನಲಾಗಿದೆ.