ನವದೆಹಲಿ, ಅ 04 (DaijiworldNews/DB): ಅಪರಿಚಿತರನ್ನು ಸಂಬೋಧಿಸಬೇಕಾಗಿ ಬಂದಾಗ ಅಣ್ಣ ಅಥವಾ ಅಂಕಲ್ ಎನ್ನುವುದು ಸಾಮಾನ್ಯ. ಆದರೆ ಇದೇ ಸಂಬೋಧನೆಯಿಂದ ಕಿರಿಕಿರಿಗೊಳಗಾದ ಬಾಡಿಗೆ ಕ್ಯಾಬ್ ಚಾಲಕನೋರ್ವ ತನ್ನನ್ನು ಅಣ್ಣಾ ಅಥವಾ ಅಂಕಲ್ ಎಂದು ಕರೆಯಬೇಡಿ ಎಂಬುದಾಗಿ ಕ್ಯಾಬ್ ಸೀಟಿನ ಮೇಲ್ಭಾಗದಲ್ಲಿ ಬರೆದುಕೊಂಡಿದ್ದಾನೆ. ಸದ್ಯ ಈ ಚಿತ್ರ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.
ಒಂದು ಪ್ರದೇಶದಿಂದ ಇನ್ನೊಂದು ಕಡೆಗೆ ಹೋಗಬೇಕಾದರೆ ಸಾಮಾನ್ಯವಾಗಿ ಆಟೋ, ಬಾಡಿಗೆ ಕಾರು, ಕ್ಯಾಬ್ಗಳನ್ನು ಹಿಡಿಯುತ್ತೇವೆ. ಅಂತಹ ಸಂದರ್ಭದಲ್ಲಿ ಆ ವಾಹನದ ಚಾಲಕನನ್ನು ಅಣ್ಣ, ಭಯ್ಯಾ, ಅಂಕಲ್ ಎಂದೆಲ್ಲಾ ಸಂಬೋಧಿಸಲಾಗುತ್ತದೆ. ಆದರೆ ಕೆಲವರಿಗೆ ಈ ರೀತಿ ಕರೆಯುವುದು ಇಷ್ಟವಿರುವುದಿಲ್ಲ. ಆದರೆ ಗ್ರಾಹಕರಲ್ಲಿ ಹೇಳಲೂ ಸಾಧ್ಯವಾಗುವುದಿಲ್ಲ. ಅದಕ್ಕಾಗಿ ಇಲ್ಲೊಬ್ಬ ಕ್ಯಾಬ್ ಚಾಲಕ ಹೇಳಲಾಗದನ್ನು ಬರೆದು ತೋರಿಸುವ ಮೂಲಕ ತನ್ನನ್ನು ಅಣ್ಣ, ಅಂಕಲ್ ಎಂದು ಸಂಬೋಧಿಸದೆ ನೇರವಾಗಿ ಹೆಸರು ಹಿಡಿದೇ ಕರೆಯಿರಿ ಎಂದು ಸಂದೇಶ ರವಾನಿಸಿದ್ದಾನೆ.
ಕ್ಯಾಬ್ ಸೀಟ್ನ ಮೇಲ್ಭಾಗದಲ್ಲಿ ಹಿಂಬದಿಯಲ್ಲಿ ಕುಳಿತಿರುವವರಿಗೆ ಕಾಣುವಂತೆ ಆತ ಇದನ್ನು ಬರೆದುಕೊಂಡಿದ್ದಾನೆ. ಈ ಬರಹದ ಚಿತ್ರವನ್ನು ಸೋಹಿಣಿ ಎಂ. ಎಂಬವರು ಟ್ವಿಟರ್ನಲ್ಲಿ ಹಾಕಿಕೊಂಡಿದ್ದು, ಕ್ಯಾಬ್ ಚಾಲಕನ ಜಾಣ್ಮೆಯನ್ನು ಹಲವರು ಕೊಂಡಾಡಿದ್ದಾರೆ. ಇನ್ನು ಕೆಲವರು ಇದನ್ನು ಟ್ರೋಲ್ ಮಾಡಿದ್ದು, ಸಿಕ್ಕಾಪಟ್ಟೆ ಹಾಸ್ಯವನ್ನೂ ಮಾಡಿದ್ದಾರೆ.