ಕತ್ತೆಗಳನ್ನು ಬಳಸಿ ಸೌರಶಕ್ತಿ ಆವಿಷ್ಕರಿಸಿದ ತೆಲಂಗಾಣದ ವ್ಯಕ್ತಿ!

•   Tue, Sep 20 2022 04:36:18 PM



• ತೆಲಂಗಾಣ, ಸೆ 20 (DaijiworldNews/DB): ಕತ್ತೆ ಸಾಕಾಣಿಕೆ ಮಾಡುತ್ತಿರುವ ತೆಲಂಗಾಣದ ವ್ಯಕ್ತಿಯೊಬ್ಬರು ಅದೇ ಕತ್ತೆಗಳ ಮೂಲಕ ಸೌರಶಕ್ತಿಯನ್ನು ಆವಿಷ್ಕರಿಸಿದ್ದಾರೆ!

  ಹೌದು. ತೆಲಂಗಾಣದ ನಾರಾಯಣಪೇಟ್ ಜಿಲ್ಲೆಯ ಮಕ್ತಲ್ ಮಂಡಲದ ಜಕ್ಲೇರ್ ಗ್ರಾಮದ ಹುಸೇನಪ್ಪ ಎಂಬುವವರೇ ಕತ್ತೆಗಳಿಂದ ಸೌರಶಕ್ತಿ ಉತ್ಪಾದಿಸಿ ಯಶಸ್ವಿಯಾದವರು. ಕತ್ತೆ ಸಾಕುವುದನ್ನೇ ಕಸುಬನ್ನಾಗಿಸಿಕೊಂಡಿರುವ ಹುಸೇನಪ್ಪ ಮೇಯಲು ಬಿಟ್ಟ ಕತ್ತೆಗಳ ಬೆನ್ನಿನ ಮೇಲೆ ಸೌರಶಕ್ತಿ ಸಂಗ್ರಹಣಾ ಬೋರ್ಡ್‌ ಹಾಗೂ ಬ್ಯಾಟರಿಗಳನ್ನು ನೇತು ಹಾಕಿದ್ದಾರೆ. ಬಿಸಿಲಿನ ವೇಳೆ ಕತ್ತೆಗಳು ಮೇಯಲು ಹೋದಾಗ ಈ ಬೋರ್ಡ್‌ಗಳಲ್ಲಿ ಸೌರಶಕ್ತಿ ಸಂಗ್ರಹವಾಗುತ್ತದೆ. ಮೊಬೈಲ್ ಚಾರ್ಜ್ ಮಾಡಲು, ದೀಪಗಳನ್ನು ಉರಿಸಲು ಈ ಸೌರಶಕ್ತಿ ತುಂಬಾ ಉಪಯೋಗಕ್ಕೆ ಬರುತ್ತದೆ. ಕಾಡಿನ ಮಧ್ಯೆ ವಾಸಿಸುವ ಜನರಿಗೆ ಇದು ಉಪಕಾರಿ ಎನ್ನುತ್ತಾರೆ ಹುಸೇನಪ್ಪ.

  ನಲ್ಲಮಲ ಅರಣ್ಯ ಪ್ರದೇಶಕ್ಕೆ ಪ್ರತಿದಿನ ಅವರು ಕತ್ತೆಗಳನ್ನು ಮೇಯಿಸಲು ಕೊಂಡೊಯ್ಯುತ್ತಾರೆ. ಇದೇ ವೇಳೆ ಅವರಿಗೆ ಕತ್ತೆಗಳಿಂದ ಸೌರಶಕ್ತಿ ಪಡೆದುಕೊಳ್ಳುವ ಆಲೋಚನೆ ಹುಟ್ಟಿತ್ತು. ಆಲೋಚನೆಯನ್ನು ಕಾರ್ಯರೂಪಕ್ಕೂ ತಂದ ಅವರಿಗೆ ಹಲವರಿಂದ ಶ್ಲಾಘನೆ ವ್ಯಕ್ತವಾಗಿದೆ. ಅವರ ಈ ಆವಿಷ್ಕಾರದಿಂದಾಗಿ ಕತ್ತಲಿನಲ್ಲಿದ್ದ ಹಲವು ಕುಟುಂಬಗಳು ಬೆಳಕು ಕಂಡಿವೆ.