ಪಾವತಿ ಆ್ಯಪ್‌ಗಳ 46.67 ಕೋಟಿ ರೂ. ಹಣ ಇಡಿಯಿಂದ ಮುಟ್ಟುಗೋಲು

•   Fri, Sep 16 2022 04:12:49 PM



• ನವದೆಹಲಿ, ಸೆ 16 (DaijiworldNews/DB): ಚೀನಾ ನಿಯಂತ್ರಿತ ಲೋನ್ ಆ್ಯಪ್‌ಗಳು ಮತ್ತು ಹೂಡಿಕೆಗೆ ಸಂಬಂಧಿಸಿದಂತೆ ಜಾರಿ ನಿರ್ದೇಶನಾಲಯದಿಂದ ದಾಳಿ ಮುಂದುವರಿದಿದ್ದು, ಪಾವತಿ ಆ್ಯಪ್‌ಗಳಾದ ಈಸ್‌ಬಝ್‌, ರೇಜರ್‌ಪೇ, ಕ್ಯಾಶ್‌ಫ್ರೀ ಮತ್ತು ಪೇಟಿಎಂನ 46.67 ಕೋಟಿ ರೂ. ಹಣವನ್ನು ಮುಟ್ಟುಗೋಲು ಹಾಕಿಕೊಂಡಿದೆ.

  ಈ ಕುರಿತು ಶುಕ್ರವಾರ ಮಾಹಿತಿ ನೀಡಿರುವ ಜಾರಿ ನಿರ್ದೇಶನಾಲಯ, ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆ ಅಡಿಯಲ್ಲಿ ಈ ಮುಟ್ಟುಗೋಲು ಪ್ರಕ್ರಿಯೆ ನಡೆದಿದೆ ಎಂದು ತಿಳಿಸಿದೆ.

  ದೆಹಲಿ, ಮುಂಬೈ, ಗಾಜಿಯಾಬಾದ್, ಲಖನೌ ಮತ್ತು ಗಯಾದಲ್ಲಿ ಸೆಪ್ಟೆಂಬರ್ 14 ರಂದು ಇಡಿಯಿಂದ ಶೋಧ ಕಾರ್ಯ ನಡೆದಿತ್ತು. ಎಚ್‌ಪಿಝಡ್‌ ಹೆಸರಿನ ಅಪ್ಲಿಕೇಶನ್ ಆಧಾರಿತ ಸಾಲ, ಹೂಡಿಕೆಗೆ ಸಂಬಂಧಿಸಿದ ತನಿಖೆ ಸಲುವಾಗಿ 16 ಬ್ಯಾಂಕ್‌ಗಳು, ಪಾವತಿ ಗೇಟ್‌ವೇಗಳು ಮತ್ತು ಸಂಬಂಧಿಸಿದ ಸಂಸ್ಥೆಗಳ ಮೇಲೆ ಇಡಿ ದಾಳಿ ನಡೆದಿತ್ತು. ಇದರಲ್ಲಿ ದೆಹಲಿ, ಗುರುಗ್ರಾಮ, ಮುಂಬೈ, ಪುಣೆ, ಚೆನ್ನೈ, ಹೈದರಾಬಾದ್, ಜೈಪುರ, ಜೋಧ್‌ಪುರ ಮತ್ತು ಬೆಂಗಳೂರು ಕೂಡಾ ಸೇರಿದೆ. ಶೋಧ ಕಾರ್ಯದ ವೇಳೆ ಮಹತ್ವದ ಹಲವು ದಾಖಲೆಗಳು ಲಭ್ಯವಾಗಿದ್ದು, ತನಿಖೆ ಮುಂದುವರಿಯಲಿದೆ ಎಂದು ಅಧಿಕಾರಿಗಳು ತಿಳಿಸಿರುವುದಾಗಿ ವರದಿಯಾಗಿದೆ.

  ಇನ್ನು ದಾಳಿ ವೇಳೆ ಅನೇಕ ಮಹತ್ವದ ಅಂಶಗಳು ಇಡಿ ಅಧಿಕಾರಿಗಳಿಗೆ ತಿಳಿದು ಬಂದಿದೆ. ಮುಕ್ಯವಾಗಿ ಪಾವತಿ ಆಯಪ್‌ಗಳನ್ನು ಹೊಂದಿರುವ ಸಂಸ್ಥೆಗಳ ವರ್ಚುವಲ್‌ ಖಾತೆಗಳಲ್ಲಿ ಅಪಾರ ಪ್ರಮಾಣದಲ್ಲಿ ಹಣ ಪತ್ತೆಯಾಗಿದೆ ಎನ್ನಲಾಗಿದೆ. ಪುಣೆಯ 'ಈಸ್‌ಬಝ್‌ ಪ್ರೈವೇಟ್ ಲಿಮಿಟೆಡ್‌'ನಲ್ಲಿ 33.36 ಕೋಟಿ ರೂ., ಬೆಂಗಳೂರಿನ 'ರೇಜರ್‌ಪೇ ಸಾಫ್ಟ್‌ವೇರ್ ಪ್ರೈವೇಟ್ ಲಿಮಿಟೆಡ್‌'ನಲ್ಲಿ 8.21 ಕೋಟಿ ರೂ., ಬೆಂಗಳೂರಿನ 'ಕ್ಯಾಶ್‌ಫ್ರೀ ಫೇಮೆಂಟ್ಸ್‌ ಇಂಡಿಯಾ ಪ್ರೈವೇಟ್‌ ಲಿಮಿಟೆಡ್‌'ನಲ್ಲಿ1.28 ಕೋಟಿ ರೂ., ದೆಹಲಿಯ ಫೇಟಿಎಂ ಪೇಮೆಂಟ್‌ ಸರ್ವೀಸ್‌ ಲಿಮಿಟೆಡ್‌ನಲ್ಲಿ 1.11 ಕೋಟಿರೂ. ಪತ್ತೆಯಾಗಿದೆ ಎಂದು ಇಡಿ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆಂದು ತಿಳಿದು ಬಂದಿದೆ.