ಶ್ರೀನಗರ, ಸೆ 16 (DaijiworldNews/DB): ಜಮ್ಮು ಮತ್ತು ಕಾಶ್ಮೀರದ ಕುಪ್ವಾರ ಜಿಲ್ಲೆಯಲ್ಲಿ ಮೂರು ಮಕ್ಕಳ ತಾಯಿಯೊಬ್ಬರು 10ನೇ ತರಗತಿಯ ದ್ವೈವಾರ್ಷಿಕ ಬೋರ್ಡ್ ಪರೀಕ್ಷೆಯಲ್ಲಿ ಶೇ. 93 ಅಂಕ ಗಳಿಸುವ ಮೂಲಕ ಟಾಪರ್ ಆಗಿ ಗಮನ ಸೆಳೆದಿದ್ದಾರೆ.
ಸಬ್ರಿನಾ ಖಾಲಿಕ್ ಅವರೇ ಅಗ್ರಸ್ಥಾನ ಪಡೆದ ಮಹಿಳೆ. ಇವರು 500ರಲ್ಲಿ 467 ಅಂಕ ಗಳಿಸಿ ಉತ್ತೀರ್ಣರಾಗಿದ್ದಾರೆ. 10ನೇ ತರಗತಿ ಪರೀಕ್ಷೆಯ ಫಲಿತಾಂಶ ಮಂಗಳವಾರ ಪ್ರಕಟವಾಗಿದ್ದು, ಉತ್ತಮ ಫಲಿತಾಂಶವನ್ನು ಸಬ್ರಿನಾ ಪಡೆದಿದ್ದಾರೆ. ಸಬ್ರಿನಾ 2012ರಲ್ಲಿ 9ನೇ ತರಗತಿ ಪಾಸಾದ ಬಳಿಕ ಮದುವೆಯಾದರು. ಹೀಗಾಗಿ ವಿದ್ಯಾಭ್ಯಾಸವನ್ನು ನಿಲ್ಲಿಸಬೇಕಾಯಿತು. ಬಳಿಕ ಮೂರು ಮಕ್ಕಳಾದ ಬಳಿಕ ಶಿಕ್ಷಣ ಮುಂದುವರಿಸಲು ಸಾಧ್ಯವೇ ಆಗಿರಲಿಲ್ಲ. ಇದೀಗ ಹತ್ತು ವರ್ಷ ಕಳೆದ ಬಳಿಕ ಮತ್ತೆ ಎಸೆಸ್ಸೆಲ್ಸಿಗೆ ಪರೀಕ್ಷೆ ತೆಗೆದುಕೊಂಡು ಉತ್ತಮ ಅಂಕಗಳೊಂದಿಗೆ ಉತ್ತೀರ್ಣರಾಗಿದ್ದಾರೆ.
ಅಗ್ರಸ್ಥಾನ ಪಡೆದಿರುವ ಬಗ್ಗೆ ಖುಷಿ ಹಂಚಿಕೊಂಡಿರುವ ಸಬ್ರಿನಾ, ಅಧ್ಯಯನ ಮತ್ತು ಪರೀಕ್ಷೆಗಾಗಿ ನನ್ನ ಕುಟುಂಬ ಬೆಂಬಲ ನೀಡಿದೆ. ಮನೆಕೆಲಸ, ಮಕ್ಕಳನ್ನು ನೋಡಿಕೊಳ್ಳುವುದು, ಜೊತೆಗೇ ವಿದ್ಯಾಭ್ಯಾಸ ಮಾಡುವುದು ಸವಾಲಾಗಿತ್ತು. ಆದರೆ ಕಷ್ಟಗಳನ್ನು ಹಿಮ್ಮೆಟ್ಟಿ ಗುರಿ ತಲುಪಲು ನಿರ್ಧರಿಸಿ ಆ ಬಗ್ಗೆ ಹೆಚ್ಚು ಗಮನ ಹರಿಸಿದ್ದರಿಂದ ಟಾಪರ್ ಆಗಲು ಸಾಧ್ಯವಾಯಿತು ಎಂದಿದ್ದಾರೆ.