ನವದೆಹಲಿ, ಸೆ 03 (DaijiworldNews/MS): ಜನನದ ಸಮಯದಲ್ಲಿ ಅಥವಾ ಆ ಬಳಿಕ ಮಗುವಿನ ಮರಣ ಸಂಭವಿಸಿದರೆ ಎಲ್ಲಾ ಮಹಿಳಾ ಕೇಂದ್ರ ಸರ್ಕಾರಿ ನೌಕರರು 60 ದಿನಗಳ ವಿಶೇಷ ಹೆರಿಗೆ ರಜೆಗೆ ಅರ್ಹರಾಗಿರುತ್ತಾರೆ ಎಂದು ಸಿಬ್ಬಂದಿ ಮತ್ತು ತರಬೇತಿ ನಿರ್ದೇಶನಾಯ (ಡಿಒಪಿಟಿ) ಶುಕ್ರವಾರ ಹೊರಡಿಸಿದ ಆದೇಶದಲ್ಲಿ ತಿಳಿಸಿದೆ.
ಜನನದ ವೇಳೆ ಹಾಗೂ ಜನಿಸಿದ ನಂತರ ಮಗು ಮೃತಪಟ್ಟಿದ್ದಲ್ಲಿ ತಾಯಿಗೆ ಆಗುವ ಆಘಾತ ಗಮನದಲ್ಲಿಟ್ಟುಕೊಂಡು 60 ದಿನ ವಿಶೇಷ ರಜೆ ನೀಡಲಾಗುವುದು ಎಂದು ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದ ಜೊತೆ ಚರ್ಚೆ ನಡೆಸಿದ ಬಳಿಕ ಕೇಂದ್ರ ಸರ್ಕಾರ ಈ ಘೋಷಣೆ ಮಾಡಿದೆ.
ಮಗು ಹುಟ್ಟಿದ ಸಂದರ್ಭದಲ್ಲಿಯೇ ಅಸುನೀಗಿದರೆ, ಅದರಿಂದ ತಾಯಿಗೆ ಗಂಭೀರ ರೀತಿಯ ಆಘಾತ ಉಂಟಾಗುತ್ತದೆ. ದೀರ್ಘಾವಧಿಗೆ ಕಹಿನೆನಪು ಕಾಡುತ್ತದೆ. ಆ ದುಃಖವನ್ನು ತಾಯಿ ಮರೆಯುವಂತಾಗಲು ಈ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ತಿಳಿಸಿದೆ.ಹೆರಿಗೆ ರಜೆ ಎಂದರೆ ಕೇವಲ ಮಗುವನ್ನು ಹೆತ್ತರೆ ಮಾತ್ರವೇ ಅನ್ವಯವಾಗುತ್ತದೆಯೋ ಅಥವಾ ಜನನದ ಹಂತದಲ್ಲಿ ಅಥವಾ ಜನನದ ಬಳಿಕ ಮಗು ಅಸುನೀಗಿದರೂ ರಜೆ ನೀಡಲಾಗುತ್ತದೆಯೇ ಎಂಬ ಬಗ್ಗೆ ಸಾವಿರಾರು ಮಂದಿ ಮಾಹಿತಿ ಕೋರಿದ್ದರು.
ಮಹಿಳಾ ಉದ್ಯೋಗಿ ಈಗಾಗಲೇ ಹೆರಿಗೆ ರಜೆ ಪಡೆದುಕೊಂಡಿದ್ದರೆ ಅವರು ಮಗುವಿನ ಸಾವಿಗಿಂತ ಮೊದಲು ಪಡೆದ ರಜೆಯನ್ನು ಅವರ ಖಾತೆಯಲ್ಲಿದ್ದ ಬೇರೆ ರಜೆಯಾಗಿ ಪರಿವರ್ತಿಸಬೇಕು. ಇದಕ್ಕಾಗಿ ವೈದ್ಯಕೀಯ ಪ್ರಮಾಣ ಪತ್ರ ಪಡೆಯುವ ಅಗತ್ಯವಿಲ್ಲ. ಯಾವುದೇ ವೈದ್ಯಕೀಯ ಪ್ರಮಾಣ ಪತ್ರ ಕೇಳದೇ ಮಗು ಮೃತಪಟ್ಟ ಬಳಿಕ 60 ದಿನಗಳ ವಿಶೇಷ ಹೆರಿಗೆ ನೀಡಬೇಕು ಎಂದು ಹೇಳಿದೆ.
ಒಂದು ವೇಳೆ ಕೇಂದ್ರ ಸರ್ಕಾರಿ ಸೇವೆಯಲ್ಲಿ ಇರುವ ಮಹಿಳೆ ಹೆರಿಗೆ ರಜೆಯನ್ನು ಈಗಾಗಲೇ ಪಡೆದುಕೊಂಡಿದ್ದು, ಅದು ಮುಕ್ತಾಯದ ಹಂತದಲ್ಲಿ ಇರುವಾಗ ಶಿಶು ಅಸುನೀಗಿದರೆ, ಹೆಚ್ಚುವರಿಯಾಗಿ ರಜೆಯ ಮುಕ್ತಾಯದಿಂದ 60 ದಿನಗಳ ಕಾಲ ವಿಶೇಷ ಹೆರಿಗೆ ರಜೆ ನೀಡಲೂ ಅವಕಾಶ ಇದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.