ಕಾರಿಗೆ ಆ್ಯಂಬುಲೆನ್ಸ್ ಸೈರನ್ ಹಾಕಿಕೊಂಡು ಚಾಲನೆ-ಮಾಜಿ ಸಂಸದರ ಅಳಿಯನಿಗೆ ಬಿತ್ತು ದಂಡ

•   Wed, Aug 17 2022 10:46:40 AM



• ಬೆಂಗಳೂರು, ಆ 17 (DaijiworldNews/DB): ಪ್ರಭಾವಿ ರಾಜಕಾರಣಿಯೊಬ್ಬರ ಅಳಿಯ ಆ್ಯಂಬುಲೆನ್ಸ್ ಸೈರೆನ್​ನ್ನು ಕಾರಿಗೆ ಅಳವಡಿಸಿಕೊಂಡು ನಗರದಲ್ಲಿ ಅಡ್ಡಾಡಿ ಪುಂಡಾಟ ಮೆರೆದ ಪ್ರಸಂಗ ಬೆಂಗಳೂರಿನಲ್ಲಿ ನಡೆದಿದ್ದು, ಸಂಚಾರಿ ಪೊಲೀಸರು ದಂಡ ವಸೂಲಿ ಮಾಡಿ ಎಚ್ಚರಿಕೆ ನೀಡಿ ಕಳುಹಿಸಿದ್ದಾರೆ.

  ಮಾಜಿ ಸಂಸದ ಎಲ್​.ಆರ್​. ಶಿವರಾಮೇಗೌಡರ ಅಳಿಯ ರಾಜೀವ್​ ರಾಥೋಡ್​ ಎಂಬಾತನೇ ಕಾರಿಗೆ ಸೈರೆನ್​ ಅಳವಡಿಸಿಕೊಂಡು ಅಡ್ಡಾಡಿದ ಯುವಕ. ಈತ ಸ್ಯಾಂಡಲ್​ವುಡ್​ ನಟ ಕೂಡಾ ಆಗಿದ್ದು, ತನ್ನ ಕೆಎ51 ಎಂಜಿ 9299 ನಂಬರಿನ ಆಡಿ ಕ್ಯೂ 7 ಕಾರಿನಲ್ಲಿ ಆ್ಯಂಬುಲೆನ್ಸ್ ಸೈರನ್ ಹಾಕಿಕೊಂಡು ವಿಜಯನಗರದಲ್ಲಿ ತನ್ನಿಷ್ಟದಂತೆ ಅಡ್ಡಾಡಿದ್ದಾರೆ. ಅಲ್ಲದೆ ಇತರ ಚಾಲಕರು, ಪ್ರಯಾಣಿಕರಿಗೆ ಇದರಿಂದ ಸಮಸ್ಯೆ ಉಂಟಾಗಿದೆ.

  ಇದನ್ನು ಗಮನಿಸಿದ ವಿಜಯನಗರ ಸಂಚಾರಿ ಪೊಲೀಸರು ಸಂಚಾರ ನಿಯಮವನ್ನು ಉಲ್ಲಂಘನೆ ಮಾಡಿದ್ದಕ್ಕೆ ರಾಥೋಡ್‌ನನ್ನು ಪ್ರಶ್ನಿಸಿ ದಂಡ ವಸೂಲಿ ಮಾಡಿದ್ದಾರೆ. ಅಲ್ಲದೆ ಮುಂದೆ ಈ ರೀತಿಯ ವರ್ತನೆ ತೋರದಂತೆ ಎಚ್ಚರಿಕೆ ನೀಡಿ ಕಳುಹಿಸಿದ್ದಾರೆ ಎಂದು ತಿಳಿದು ಬಂದಿದೆ.