ಮುಂಬೈ , ಆ 17 (DaijiworldNews/DB): ಅಕಾಲಿಕವಾಗಿ ಜನಿಸಿದ ಅವಳಿ ನವಜಾತ ಶಿಶುಗಳನ್ನು ಆಸ್ಪತ್ರೆಗೆ ಸಾಗಿಸಲು ರಸ್ತೆ ಸಂಪರ್ಕವಿಲ್ಲದ ಪರಿಣಾಮ ಶಿಶುಗಳು ತಾಯಿ ಮುಂದೆಯೇ ಕೊನೆಯುಸಿರೆಳೆದ ಹೃದಯ ವಿದ್ರಾವಕ ಘಟನೆ ಮಹಾರಾಷ್ಟ್ರದ ಪಾಲ್ಟರ್ ಜಿಲ್ಲೆಯಲ್ಲಿ ನಡೆದಿದೆ.
ಪಾಲ್ಘರ್ ಜಿಲ್ಲೆಯ ಮೊಖಾಡಾ ತಹಸಿಲ್ ನಿವಾಸಿ ವಂದನಾ ಬುಧರ್ ಅವರು ಏಳು ತಿಂಗಳಲ್ಲೇ ಅವಳಿ ಶಿಶುಗಳಿಗೆ ಮನೆಯಲ್ಲೇ ಜನ್ಮ ನೀಡಿದ್ದರು. ತಿಂಗಳುಪೂರ್ತಿಯಾಗದ ಕಾರಣ ಶಿಶುಗಳು ದುರ್ಬಲವಾಗಿದ್ದು, ಅವಶ್ಯ ವೈದ್ಯಕೀಯ ಆರೈಕೆ ಅಗತ್ಯವಿತ್ತು. ಆದರೆ ವಂದನಾ ಅವರ ಮನೆಯಿಂದ ಆಸ್ಪತ್ರೆಗೆ ಸಾಗಿಸಲು ರಸ್ತೆ ಸಂಪರ್ಕವಿಲ್ಲದ ಕಾರಣ ತತ್ಕ್ಷಣ ಶಿಶುಗಳನ್ನು ಆಸ್ಪತ್ರೆಗೆ ಕೊಂಡೊಯ್ಯಲು ಸಾಧ್ಯವಾಗಲಿಲ್ಲ. ಹೀಗಾಗಿ ಶಿಶುಗಳು ತಾಯಿ ಕಣ್ಮುಂದೆಯೇ ಸಾವನ್ನಪ್ಪಿವೆ.
ಹೆರಿಗೆ ಬಳಿಕ ವಂದನಾಗೆ ಭಾರೀ ರಕ್ತಸ್ರಾವವಾಗುತ್ತಿದ್ದ ಹಿನ್ನೆಲೆಯಲ್ಲಿ ಸುಮಾರು ಮೂರು ಕಿಮೀವರೆಗಿನ ಕಲ್ಲಿನ ಭೂ ಪ್ರದೇಶದಲ್ಲೇ ಹೊತ್ತೊಯ್ದು ಕುಟುಂಬಿಕರು ಆಕೆಯನ್ನು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಹಗ್ಗ, ಬೆಡ್ಶೀಟ್ ಮತ್ತು ಮರವನ್ನು ಬಳಸಿ ತಾತ್ಕಾಲಿಕ ಸ್ಟ್ರೆಚರ್ ತಯಾರಿಸಿ ಆಕೆಯನ್ನು ಆಸ್ಪತ್ರೆಗೆ ಸಾಗಿಸಲಾಯಿತು. ಸದ್ಯ ಆಕೆ ಚೇತರಿಸಿಕೊಳ್ಳುತ್ತಿದ್ದಾರೆಂದು ತಿಳಿದು ಬಂದಿದೆ.
ಘಟನೆಗೆ ವಿಷಾದ ವ್ಯಕ್ತಪಡಿಸಿರುವ ಮಹಾರಾಷ್ಟ್ರ ಬಿಜೆಪಿಯ ರಾಜ್ಯ ಉಪಾಧ್ಯಕ್ಷೆ ಚಿತ್ರಾ ಕಿಶೋರ್ ವಾಘ್ , ಈ ಘಟನೆ ನೋವಿನ ಸಂಗತಿ. ಸಕಾಲದಲ್ಲಿ ಆರೋಗ್ಯ ಸೇವೆ ಲಭಿಸದ ಕಾರಣ ಶಿಶುಗಳೆರಡು ಸಾವನ್ನಪ್ಪಿವೆ ಎಂದು ಟ್ವೀಟ್ ಮಾಡಿದ್ದಾರೆ.