ಯುವತಿ ಹೆಸರಲ್ಲಿ ನಕಲಿ ಫೇಸ್ಬುಕ್ ಖಾತೆ-19 ಲಕ್ಷ ರೂ. ವಂಚಿಸಿದ್ದ ಆರೋಪಿ ಅರೆಸ್ಟ್‌

•   Sat, Jul 30 2022 03:24:25 PM



• ಬೆಳಗಾವಿ, ಜು 30 (DaijiworldNews/DB): ಯುವತಿಯ ಹೆಸರಿನಲ್ಲಿ ಫೇಸ್ಬುಕ್, ಇನ್‌ಸ್ಟಾಗ್ರಾಂನಲ್ಲಿ ನಕಲಿ ಖಾತೆ ತೆರೆದು ಯುವಕರನ್ನು ಸೆಳೆದುಕೊಂಡು19 ಲಕ್ಷ ರೂ. ವಂಚಿಸಿದ ಆರೋಪಿಯನ್ನು ಸಿಇಎನ್‌ ಪೊಲೀಸರು ಬಂಧಿಸಿದ್ದಾರೆ.

  ನಿಪ್ಪಾಣಿ ತಾಲೂಕಿನ ನಾಯಿಂಗ್ಲಜ್‌ ಗ್ರಾಮದ ಮಹಾಂತೇಶ ಮುಡಸೆ ಬಂಧಿತ ಆರೋಪಿ. ದುಬೈಯಲ್ಲಿರುವ ಬೆಳಗಾವಿಯ ಯುವತಿಯ ಫೋಟೋ ಕದ್ದು ಫೇಸ್ಬುಕ್‌ನಲ್ಲಿ ಎಂ. ಸ್ನೇಹಾ ಎಂಬ ಹೆಸರಿನಲ್ಲಿ ನಕಲಿ ಖಾತೆ ತೆರೆದಿದ್ದ. ಬಳಿಕ ಹಲವರಿಗೆ ಫ್ರೆಂಡ್‌ ರಿಕ್ವೆಸ್ಟ್‌ ಕಳುಹಿಸಿ ಸ್ನೇಹ ಬೆಳೆಸಿದ್ದಾನೆ. ಅಲ್ಲದೆ ಅನೇಕ ಫೋಟೋಗಳನ್ನು ಫೇಸ್ಬುಕ್‌ನಲ್ಲಿ ಅಪ್ಲೋಡ್ ಮಾಡಿ ಯುವಕರನ್ನು ಸೆಳೆಯುತ್ತಿದ್ದನು. ಇದರಿಂದ ಆಕೆ ಯುವತಿ ಎಂದು ನಂಬಿ ಯುವಕರು ಸುಲಭವಾಗಿ ಯಾಮಾರಿದ್ದಾರೆ. ಯುವಕರು ಹೆಚ್ಚು ಸನಿಹವಾದಂತೆ ತಂದೆ, ತಾಯಿಗೆ ಅನಾರೋಗ್ಯದ ಹಿನ್ನೆಲೆಯಲ್ಲಿ ಆಸ್ಪತ್ರೆಗೆ ಬಂದಿದ್ದೇನೆ. ಹಣ ಸ್ವಲ್ಪ ಕಡಿಮೆ ಇದ್ದು ಅಕೌಂಟ್‌ಗೆ ಹಣ ಹಾಕುವಂತೆ ಮನವಿ ಮಾಡಿದ್ದ ಕಾರಣ ಯುವಕರೂ ನಂಬಿ ಹಣ ಜಮೆ ಮಾಡಿದ್ದಾರೆ. ಹೀಗೆ ಅನೇಕರೊಂದಿಗೆ ಚಾಟ್ ಮಾಡಿ ಅವರನ್ನು ಬಲೆಗೆ ಬೀಳಿಸಿಕೊಳ್ಳುತ್ತಿದ್ದ ಈತ ಈವರೆಗೆ 50ಕ್ಕೂ ಹೆಚ್ಚು ಯುವಕರಿಂದ 19 ಲಕ್ಷ ರೂ. ವರೆಗೆ ದೋಚಿದದ್ದಾನೆ.

  ತನ್ನ ಫೋಟೋ ನಕಲಿ ಖಾತೆಯಲ್ಲಿ ಅಪ್ಲೋಡ್ ಆಗಿರುವ ಕುರಿತು ದುಬೈಯಲ್ಲಿರುವ ಯುವತಿಗೆ ಗಮನಕ್ಕೆ ಬಂದಿದ್ದು, ಕೂಡಲೇ ಆಕೆ ಬೆಳಗಾವಿಗೆ ಬಂದು ಸಿಇಎನ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಈ ಪ್ರಕರಣದ ಬೆನ್ನತ್ತಿದ ಪೊಲೀಸರಿಗೆ ಆರೋಪಿಯ ನಿಜ ಬಣ್ಣ ಗೊತ್ತಾಗಿದೆ. ಬಳಿಕ ಆತನನ್ನು ಬಂಧಿಸಿದ್ದಾರೆ. ಆರೋಪಿ ಮಹಾಂತೇಶ ಮುಡಸೆ ಪಿಎಸ್‌ಐ ಪರೀಕ್ಷೆಗಾಗಿ ಸಿದ್ಧತೆ ಮಾಡಿಕೊಳ್ಳುತ್ತಿದ್ದು, ದೈಹಿಕ ಪರೀಕ್ಷೆ ಮುಗಿಸಿ ಲಿಖೀತ ಪರೀಕ್ಷೆ ಬರೆಯಲು ತಯಾರಾಗುತ್ತಿದ್ದ ಎನ್ನಲಾಗಿದೆ.