ಮಗನ ಪಕ್ಷ ತೊರೆದು ಮಗಳ ಪಾರ್ಟಿ ಸೇರಿದ ಆಂಧ್ರ ಸಿಎಂ ತಾಯಿ

•   Fri, Jul 08 2022 05:29:21 PM



• ಗುಂಟೂರು (ಆಂಧ್ರಪ್ರದೇಶ), ಜು 08 (DaijiworldNews/DB): ಆಂಧ್ರಪ್ರದೇಶ ಮುಖ್ಯಮಂತ್ರಿ ಜಗನ್‌ಮೋಹನ್ ರೆಡ್ಡಿ ಅವರ ತಾಯಿ ಮಗನ ಪಕ್ಷ ತೊರೆದು ಮಗಳು ಕಟ್ಟಿದ ನೂತನ ಪಕ್ಷಕ್ಕೆ ಸೇರುವುದಾಗಿ ಘೋಷಿಸಿದ್ದಾರೆ.

  ಆಡಳಿತರೂಢ ವೈಎಸ್​ಆರ್​ ಕಾಂಗ್ರೆಸ್​​ ಪಕ್ಷದಲ್ಲಿ ಗೌರವಾಧ್ಯಕ್ಷೆಯಾಗಿದ್ದ ಮುಖ್ಯಮಂತ್ರಿ ವೈ.ಎಸ್​. ಜಗನ್​ಮೋಹನ್​ ರೆಡ್ಡಿ ಅವರ ತಾಯಿ ವೈ.ಎಸ್.ವಿಜಯಮ್ಮ ಅವರು ತಮ್ಮ ಸ್ಥಾನಕ್ಕೆ ರಾಜೀನಾಮೆ ಘೋಷಿಸಿದ್ದಾರೆ. ಗುಂಟೂರು ಜಿಲ್ಲೆಯ ಚಿನಕಾಕಣಿಯಲ್ಲಿ ನಡೆದ ಪಕ್ಷದ ಸಮಾವೇಶದಲ್ಲಿ ಅವರು ಈ ವಿಚಾರ ತಿಳಿಸಿದ್ದಾರೆ. ಅಲ್ಲದೆ, ಮಗಳು ಶರ್ಮಿಳಾ ಸ್ಥಾಪಿಸಿರುವ ಹೊಸ ಪಕ್ಷದ ಜೊತೆ ತೊಡಗಿಸಿಕೊಳ್ಳುವುದಾಗಿ ಹೇಳಿದ್ದಾರೆ.

  ದಿ. ವೈ.ಎಸ್​. ರಾಜಶೇಖರ ರೆಡ್ಡಿ ಅವರ ಪತ್ನಿಯಾಗಿ ಮತ್ತು ಶರ್ಮಿಳಾ ತಾಯಿಯಾಗಿ ಹೊಸ ಪಕ್ಷದೊಂದಿಗೆ ಕೆಲಸ ಮಾಡುವುದು ನನಗೆ ಅಗತ್ಯವಾಗಿದೆ. ಯಾರಿಗೂ ನನ್ನಿಂದ ಅಭ್ಯಂತರಗಳಾಗಬಾರದು ಎಂಬ ಕಾರಣಕ್ಕೆ ರಾಜೀನಾಮೆಗೆ ನಿರ್ಧರಿಸಿದ್ದೇನೆ ಎಂದಿದ್ದಾರೆ.

  ಜಗನ್ ಮತ್ತು ಶರ್ಮಿಳಾ ಪ್ರತ್ಯೇಕ ಪಕ್ಷಗಳಲ್ಲಿರುವ ಅನಿವಾರ್ಯತೆ ಯಾಕೆ ಸೃಷ್ಟಿಯಾಯಿತೆಂಬುದು ಆ ದೇವರಿಗೇ ಗೊತ್ತು. ಜಗನ್ ಕಷ್ಟದಲ್ಲಿದ್ದಾಗ ಆತನ ಜೊತೆಗಿದ್ದೆ. ಈಗ ಆತ ಸಂತೋಷವಾಗಿದ್ದಾನೆ. ಈ ವೇಳೆ ಮಗಳಿಗೆ ಅನ್ಯಾಯ ಆಗಬಾರದೆಂದು ಮಗಳ ಜೊತೆಗಿದ್ದೇನೆ ಎಂದು ವಿಜಯಮ್ಮ ಹೇಳಿದ್ದಾರೆ.