ಮುಂಬೈ, ಜೂ 10 (DaijiworldNews/DB): ಕೊರೊನಾ ಸಂಕಷ್ಟದ ವೇಳೆ ಅವಶ್ಯವುಳ್ಳವರ ಪಾಲಿಗೆ ಆಪತ್ಬಾಂಧವನಾಗಿದ್ದ ನಟ ಸೋನು ಸೂದ್ ಈಗ ಮತ್ತೊಮ್ಮೆ ಅಂತಹುದೇ ಪುಣ್ಯದ ಕೆಲಸ ಮಾಡಿದ್ದಾರೆ. ನಾಲ್ಕು ಕಾಲು, ನಾಲ್ಕು ಕೈಗಳೊಂದಿಗೆ ಜನಿಸಿದ್ದ ಬಾಲಕಿಗೆ ನಟ ಸೋನು ಸೂದ್ ಸಯಾದಿಂದ ಯಶಸ್ವಿ ಶಸ್ತ್ರಚಿಕಿತ್ಸೆ ನಡೆದಿದೆ.
ಬಿಹಾರದ ಪುಟ್ಟ ಹಳ್ಳಿಯಲ್ಲಿ ಜನಿಸಿದ್ದ ಚಾಹುಮುಖಿ ಎಂಬ ಬಾಲಕಿಗೆ ನಾಲ್ಕು ಕಾಲು, ನಾಲ್ಕು ಕೈಗಳಿದ್ದವು. ಆದರೆ, ಇದನ್ನು ಶಸ್ತ್ರಚಿಕಿತ್ಸೆ ಮೂಲಕ ತೆಗೆಯಬಹುದಿತ್ತಾದರೂ, ಬಾಲಕಿ ಹೆತ್ತವರ ಬಳಿ ಹಣವಿಲ್ಲದ್ದರಿಂದ ಅದು ಸಾಧ್ಯವಾಗಿರಲಿಲ್ಲ. ಆದರೆ, ಈ ವಿಚಾರ ನಟ ಸೋನು ಸೂದ್ ಗಮನಕ್ಕೆ ಬಂದ ತತ್ಕ್ಷಣ ಅವರು ಬಾಲಕಿಗೆ ಸಹಾಯ ಮಾಡುವುದಾಗಿ ಪ್ರಕಟಿಸಿದ್ದರು. ಅಲ್ಲದೆ, ಬಾಲಕಿಗೆ ಶಸ್ತ್ರಚಿಕಿತ್ಸೆಗೆ ವ್ಯವಸ್ಥೆ ಮಾಡುವಂತೆ ಹೇಳಿದ್ದರು. ಅದರಂತೆ ವಾರದ ಹಿಂದೆ ಬಾಲಕಿಯನ್ನು ಶಸ್ತ್ರಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಇದೀಗ ಬಾಲಕಿಯ ಶಸ್ತ್ರಚಿಕಿತ್ಸೆ ಯಶಸ್ವಿಯಾಗಿ ನಡೆದಿದ್ದು, ಸದ್ಯ ಬಾಲಕಿ ಚೇತರಿಸಿಕೊಳ್ಳುತ್ತಿದ್ದಾಳೆ. ಅಲ್ಲದೆ, ಮನೆಗೆ ಹಿಂತಿರುಗಲು ಸಿದ್ದವಾಗಿದ್ದಾಳೆ.
ಗುರುವಾರ ರಾತ್ರಿ ಈ ವಿಚಾರನ್ನು ಬಾಲಕಿಯ ಫೋಟೊ ಸಮೇತ ತನ್ನ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿರುವ ಸೋನು ಸೂದ್ ಬಾಲಕಿ ಚೇತರಿಕೆಯ ಬಗ್ಗೆ ಖುಷಿ ವ್ಯಕ್ತಪಡಸಿದ್ದಾರೆ. ಸದ್ಯ ಮಗು ಚೇತರಿಸಿಕೊಂಡಿದ್ದು, ಮಗುವಿನ ಆರೋಗ್ಯಕಾರಿ ಚೇತರಿಕೆಯ ಕುರಿತು ಸೋನು ಸೂದ್ ತಮ್ಮ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ಅತ್ಯುತ್ತಮ ಕೆಲಸಕ್ಕಾಗಿ ನಟ ನೆಟ್ಟಿಗರ ಮನಗೆದ್ದಿದ್ದಾರೆ. ಇದಕ್ಕೆ ನಟರಾದ ಸುನಿಲ್ ಶೆಟ್ಟಿ, ರಿಧಿಮಾ ಪಂಡಿತ್, ಇಶಾ ಗುಪ್ತಾ ಮೊದಲಾದವರು ಹೃದಯದ ಇಮೋಜಿಗಳನ್ನು ಹಾಕಿದ್ದರೆ, ಭೂಮಿಯ ಮೇಲಿನ ಅತ್ಯುತ್ತಮ ವ್ಯಕ್ತಿ, ನಿಮ್ಮಂತಹವರ ಅಗತ್ಯ ಈ ಸಮಾಜಕ್ಕಿದೆ ಎಂದು ಅಭಿಮಾನಿಗಳು ಕಮೆಂಟ್ ಮಾಡಿದ್ದಾರೆ.