ಹೈದರಾಬಾದ್ , ಜೂ 04 (DaijiworldNews/MS): ಪಬ್ ಗೆ ತೆರಳಿದ್ದ ಅಪ್ರಾಪ್ತಯು ಮನೆಗೆ ವಾಪಾಸು ತೆರಳುವಾಗ ಯುವಕರ ಗ್ಯಾಂಗ್ ಒಂದು ಆಕೆಯ ಮೇಲೆ ಸಾಮೂಹಿಕ ಅತ್ಯಾಚಾರ ಎಸಗಿರುವ ಪ್ರಕರಣಕ್ಕೆ ಸಂಬಂಧಿಸಿದಂತೆ ಓರ್ವ ವ್ಯಕ್ತಿಯನ್ನು ಬಂಧಿಸಲಾಗಿದ್ದು, ಆರೋಪಿಗಳು ಎಂದು ಗುರುತಿಸಲಾದ ಐದು ಜನರಲ್ಲಿ, ಮೂವರು ಅಪ್ರಾಪ್ತ ವಯಸ್ಕರು ಎಂದು ಪೊಲೀಸರು ತಿಳಿಸಿದ್ದಾರೆ.
ಪೊಲೀಸರಿಗೆ ದೊರಕಿರುವ ಸಿಸಿ ಟಿವಿ ದೃಶ್ಯಾವಳಿಯಲ್ಲಿ ಬಾಲಕಿಯೂ ಶಂಕಿತ ಆರೋಪಿಗಳೊಂದಿಗೆ ಪಬ್ ಹೊರಗೆ ನಿಂತಿರುವುದನ್ನು ತೋರಿಸುತ್ತದೆ, ಅಲ್ಲಿ ಸಂತ್ರಸ್ತೆ ಅವರನ್ನು ಭೇಟಿಯಾಗಿದ್ದು ಯುವಕರು ಆಕೆಯನ್ನು ಮನೆಗೆ ಬಿಡಲು ಮುಂದಾಗಿದ್ದರು. ಆದರೆ ಮನಗೆ ಕರೆದೊಯ್ಯದೇ ನಿರ್ಜನ ಪ್ರದೇಶಕ್ಕೆ ಕರೆದೊಯ್ದು, ಸಾಮೂಹಿಕ ಅತ್ಯಾಚಾರ ನಡೆಸಿದ್ದರು.
ಐಷಾರಾಮಿ ಕಾರುಗಳನ್ನು ಓಡಾಡುವ ರಾಜಕಾರಣಿಗಳ ಮಕ್ಕಳು ಮತ್ತು ಮೊಮ್ಮಕ್ಕಳು ಭಾಗಿಯಾಗಿದ್ದಾರೆ ಎಂದು ಆರೋಪಿಸಲಾದ ತೆಲಂಗಾಣ ರಾಜಧಾನಿಯ ಹೃದಯಭಾಗದಲ್ಲಿ ನಡೆದ ಈ ಅಪರಾಧವು ಪ್ರತಿಭಟನೆಯ ಕಾರಣವಾಗಿದೆ. ಶಾಸಕರೊಬ್ಬರ ಮಗ ಈ ಗುಂಪಿನ ಭಾಗವಾಗಿರುವ ಬಗ್ಗೆ ಕೇಳಿಬಂದಿದ್ದು, ಆದರೆ ಈತ ಸಾಮೂಹಿಕ ಅತ್ಯಾಚಾರದಲ್ಲಿ ಭಾಗಿಯಾಗಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ. ಪ್ರಕರಣದಲ್ಲಿ ಹೆಸರು ಕೇಳಿಬಂದಿರುವ ಶಾಸಕರ ಪುತ್ರ ಹಲ್ಲೆಗೂ ಮುನ್ನ ಕಾರು ಇಳಿದು ಓಡಿ ಹೋಗಿದ್ದಾರೆ ಎನ್ನಲಾಗಿದೆ.
ಕಳೆದ ಶನಿವಾರ ಈ ಘಟನೆ ನಡೆದಿದ್ದು, ಯುವತಿಯನ್ನು ಮನೆಗೆ ಬಿಡುವುದಾಗಿ ಹೇಳಿಸಂಜೆ ೫.೩೦ ರ ಹೊತ್ತಿಗೆ ಮರ್ಸಿಡಿಸ್ ಕಾರಿನಲ್ಲಿ ಆಕೆಯನ್ನು ಕರೆದುಕೊಂಡು ಹೋಗಿ ಜುಬಿಲಿ ಹಿಲ್ಸ್ ಬಳಿ ಹೋದಾಗ ಕಾರು ನಿಲ್ಲಿಸಿ ಆಕೆಯ ಮೇಲೆ ಅತ್ಯಾಚಾರ ಮಾಡಿದ್ದಾರೆ. ಬಾಲಕಿ ಮನೆಗೆ ಬಂದಾಗ ಕುತ್ತಿಗೆಯಲ್ಲಾಗಿದ್ದ ಗಾಯಾ ಕಂಡು ತಂದೆ ಪ್ರಶ್ನಿಸಿದ್ದು, ಈ ವೇಳೆ ಹುಡುಗರು ಹಲ್ಲೆ ಮಾಡಿರುವ ವಿಚಾರ ತಿಳಿಸಿದ್ದಾಳೆ. ಈ ವಿಚಾರವಾಗಿ ತಂದೆ ಪೊಲೀಸರಿಗೆ ದೂರು ನೀಡಿದ್ದು, ಈ ಸಂದರ್ಭ ತನ್ನ ಮೇಲೆ ಸಮೂಹಿಕ ಅತ್ಯಾಚಾರವಾಗಿದ್ದನ್ನು ಹೇಳಿಕೊಂಡಿದ್ದಾಳೆ.
ಸಂತ್ರಸ್ತೆಗೆ ಆರೋಪಿಗಳ ಬಗ್ಗೆ ಗುರುತಿನ ಮಾಹಿತಿ ನೀಡದಿದ್ದರೂ, ಒಬ್ಬನ ಹೆಸರು ತನಿಖೆ ವೇಳೆ ಹೇಳಿದ್ದು ದೃಶ್ಯಾವಳಿಗಳು ಮತ್ತು ತಾಂತ್ರಿಕ ಪುರಾವೆಗಳ ಆಧಾರದ ಮೇಲೆ ನಾವು ಶಂಕಿತರನ್ನು ಹುಡುಕುತ್ತಿದ್ದೇವೆ ಎಂದು ಪೊಲೀಸರು ತಿಳಿಸಿದ್ದಾರೆ. ಇನ್ನೊಂದೆಡೆ ಅಪ್ರಾಪ್ತರಿಗೆ ಪ್ರವೇಶ ನೀಡಿದ ಪಬ್ ಬಗ್ಗೆಯೂ ತನಿಖೆ ನಡೆಯುತ್ತಿದೆ.