'ವಿಪಕ್ಷ ಸ್ಥಾನ ಕಟ್ಟಿಟ್ಟಬುತ್ತಿ ನಿಮಗೆ' - ಸಿದ್ದರಾಮಯ್ಯಗೆ ಬಿಜೆಪಿ ಲೇವಡಿ

•   Mon, May 09 2022 12:27:30 PM



• ಬೆಂಗಳೂರು, ಮೇ 09 (DaijiworldNews/MS): " ನೀವು ನಿಂತ ನೆಲವೇ ಭದ್ರವಾಗಿಲ್ಲ, ವಿಪಕ್ಷ ಸ್ಥಾನ ಕಟ್ಟಿಟ್ಟಬುತ್ತಿ ನಿಮಗೆ " ಎಂದು ಸಿದ್ದರಾಮಯ್ಯ ಕುರಿತು ರಾಜ್ಯ ಬಿಜೆಪಿ ಘಟಕ ವ್ಯಂಗ್ಯವಾಡಿದೆ.

  ಈ ಬಗ್ಗೆ ಟ್ವೀಟ್ ಮಾಡಿರುವ ಬಿಜೆಪಿಯೂ, " ಸಿದ್ದರಾಮಯ್ಯ ಅವರೇ,ಚಾಮುಂಡೇಶ್ವರಿಯಲ್ಲಿ ಸೋತು, ಬಾದಾಮಿಗೆ ಪಲಾಯನ ಮಾಡಿದ್ದೀರಿ. ಅಲ್ಲೂ ಕೂಡಾ ಅತಂತ್ರರಾಗಿದ್ದೀರಿ.ಈಗ ಸುರಕ್ಷಿತ ಕ್ಷೇತ್ರ ಹುಡುಕುತ್ತಿದ್ದೀರಿ, ಕಾಂಗ್ರೆಸ್ ನಾಯಕರು ನಿಮ್ಮ ಕ್ಷೇತ್ರ ಹುಡುಕಾಟಕ್ಕೆ ತಿರುಗಿ ಬೀಳುತ್ತಿದ್ದಾರೆ.ವಿರುದ್ಧವಾದ ಅಭಿಪ್ರಾಯ ಮೂಡುತ್ತಿದ್ದರೂ ಬುರುಡೆರಾಮಯ್ಯ ಅವರ ಚರ್ಮವೇಕೆ ಇಷ್ಟು ದಪ್ಪ" ಎಂದು ಟೀಕಿಸಿದೆ.

  ಮತ್ತೊಂದು ಟ್ವೀಟ್ ನಲ್ಲಿ, "ಕಾಂಗ್ರೆಸ್ ಪಕ್ಷವನ್ನು ಅಧಿಕಾರಕ್ಕೆ ತನ್ನಿ ಎಂದು ಸಿದ್ದರಾಮಯ್ಯ ಅವರು ಕೈಮುಗಿದು ಕೇಳಿಕೊಳ್ಳುತ್ತಿದ್ದಾರೆ.ಮತದಾರರು 2018 ರಲ್ಲೇ ಕೈ ಮುಗಿದಿದ್ದರೂ, ನೀವು ಹಿಂದಿನ ಬಾಗಿಲಲ್ಲಿ ನುಗ್ಗುವ ಪ್ರಯತ್ನ ಮಾಡಿದ್ದೀರಿ. 2023 ಮತ್ತದೇ ತಪ್ಪು ಮರುಕಳಿಸುವುದಿಲ್ಲ" ಎಂದು ಲೇವಡಿ ಮಾಡಿದೆ.

  "ಬಿಜೆಪಿ ತೊಲಗಿಸಲು ಅಧಿಕಾರಕ್ಕೆ ಬರಬೇಕು ಎಂದು ಹಗಲು ಕನಸು ಕಾಣುತ್ತಿರುವ ಸಿದ್ದರಾಮಯ್ಯ ಅವರೇ, ಕಾಂಗ್ರೆಸ್ ಪಕ್ಷ ಬುಡಸಮೇತ ನಿರ್ಮೂಲನೆ ಆಗುತ್ತಿರುವ ಹತಾಶೆಯೇ ನಿಮ್ಮನ್ನು ಕಾಡುತ್ತಿದೆಯೇ? ನೀವು ನಿಂತ ನೆಲವೇ ಭದ್ರವಾಗಿಲ್ಲ, ವಿಪಕ್ಷ ಸ್ಥಾನ ಕಟ್ಟಿಟ್ಟಬುತ್ತಿ ನಿಮಗೆ" ಎಂದು ಹೇಳಿದೆ.